Yo 2 - Kalate Zambe Nnomo a Mfefe Mfefé Nkôñelan

Môse Nti ô ntoo bebé

¹ Loñane toñe nlak e Sioñ! Yôta'ane *tyiñ e nkôle wom ô n'étyi! Bôte bese be too *si nyô be fô'ôba'an! Amu môse Nti wo zu, amu ô ntoo bebé.

² Môs ô ne dibi a ékukut *môs ô ne *nkut ne zi'ili. wo zu ane melenda me tyé e minkôle yôp. Tame yen ane nkane bitandak wo zu, bi too abui a angôndô, éfunan an'alu e minkôle yôp. Avale jame di e ngenane te tame yené, a ba ye bo te beta yene de.

³ Ba ndamane jôm ése ba koone je aval'ane nduan ja di'i a tyame biôm, e mvuse jap ba li'i ve si si. Te na be lôté, si é mbe afub Eden, mvuse valé, é ntoo ve bili'i ya ko woñ: teke jôm é nga famelane be!

⁴ O ye'e jô na nkane bikabela, nge na bewulu bikabela ba semb'ôsu.

⁵ Ba yôô akôlô nkôle wu a kui wu ôvok wo ye buni na wo wô'ô éduñe bevagoñ bita, nge ntôtane minkaba'a mi nduan mia di'i minkôte bilok. Ba zu ane nsamba ô ne ngu, be tele minnoñ asu ya wosan.

⁶ Eyoñ ba subu bebé môt ase *a ko woñ, woñ wo bo mesu mese ékukut.

⁷ Ba ke wosan ane bezimbi, ba bete mimfin ane bewosan. Môt ase a ke nlô ô tele ôsu vié teke yale fefele ya zene jé.

⁸ Be nji tômetan amu môt ase a ba'ale nnoñ wé a tôñe zene jé. Ba tulan jôm ése ja tebe be ngame yat a bo be ékolé ôbak; teke jôm é ne ngul ya telé dulu dap.

⁹ Ba mialan e tison été, ba mate mimbil e mimfine *mekok, ba nyiine menda, be lôte bevundi ane miñwuwup.

¹⁰ Si ja fô'ôban éyoñ ba zu bebé, Yôb ebiene fe v'ane jôm ja ye ku, jôp a ngon teke fe faé, ateté da dimili mfaane wop.

¹¹ Nti a bete tyiñe jé ôsu ya nkane bita wé. Minsamba mia bo mebendé mé mi n'abui a éko woñ. Yaa, môse Nti ô n'angôndô, ékowoñ avale môt éziñ a ye bo teke nyiñ.

Eyoñe ya bulane be Nti

¹² Eyoñe ji éyoñ é ngenane na mi bulane be ma nalé Nti a jô. Bo'one jame te a nleme wônan ôse: tyiane bidi, Yônan a ye'elane ma.

¹³ Mvolan ô nji bo na mi nyap ve mengômesane menan, ve minleme mienan mmie mia yiane tyendé. Yaa, bula'an e be Nti, Zambe wônan: a ne *mvam a éngôngo, njiban a mbamba môt. Nkômesan éyoñ ése ya jô'é ayaa dé.

¹⁴ Ndô'ôtô a ye tyendé ôsimesan, a jalé mia ne lut a mbamba be mam. Eyoñe te ñhe bia ye bo nguleya soo nye mimveane mi fôn a woon.

Eyoñe ya tyi bidi a ye'elane Zambe

¹⁵ Loñane toñ e Siôn, Benda'an éyoñe ya tyi bidi bañeta'an ékôane bôt.

¹⁶ Kô'ane bôt asu beta ékôan. Sula'ane minnôm a bisoé bi bôt, ja'an ayôme bongô; bôte bebiene fe be ndôme lu'an be li'ik étune *nda ya éli'iti jap.

¹⁷ Betuni ba saane Nti be yônôk e Nda Zambe été e zañ étune *nda ba jaé biôm a ata'a metuna'a, a ye'elane Zambe ana: A Nti ko bia ayoñe bôte dôé éngôngo, te kañese ve bôte bôé ôsone nyô, te kañese na *meyoñ bikuu me woé bia be jô'ô na: E Zambe wop a bo ñhe jé éyoñe ji'

Nti a yalan ayoñe bôte dé

¹⁸ Nti *a nye'e si jé a ko ayoñe bôte dé éngôngo

¹⁹ a yalane meye'elane mé ana: Ma ye beta ve mia fôn, woon a mbon. Biôm bite bia ye ve mia avak! Ma ye bo te beta kañese na mi ku e bikpwe'ele ya *meyoñ mefe été.

²⁰ Ma ye titane besiñe benan be nga so mfa'a y'akôé, ma ye tindi be ôyap mfa'a mesi me ne bilik a nkôt, ma ye sô'ôlô asuzo'o ya nkane bita wé évele mañ, nkane bita wé ya ô tele mvus ñwô ma ye sô'ôlô e beta mañ été. Mimbime miap mia ye mialane mbia ényum a ye ndamane mfep. Nalé ate ba be nga bo mia abim *abé te ba ye jañ.

²¹ A wo, a si, te beta ko woñ! A ntoo ve bôlé a mevak, amu Nti a bo beta be mam.

²² Mia, betit, te beta koone woñ! Bilo'o ya si ôzôm bi nga beta bo mimfefé, bilé bi mbe'e bibuma, befigié a mindi'i mi woon bi ntoo ne jo'olan.

²³ A mia, bôte be too Siôn, muñan a mevak, amu Nti, e Zambe wônan. E su'u ésep a lôme mia, a noo mveñ ôyôn a mveñ ésep aval'ane melu mvus.

²⁴ Mekañ me ntoo njalan a fôn befandé ba fuluku a woon a mbon.

²⁵ Yaa, Nti a jô na ma tañe bidi mi nga yiane kôan mbie nsamba ôdiidii me nga lôme mia ô nga mane di: minkôñ, bitandak, fos, a bemba'a.

²⁶ Mia ye di a jaé, mia ye kañe ma Nti, e Zambe wônan, nyô a bo bitua bi mam asu denan. A teke fe na ayoñe bôte dam da ye beta bili ôson.

²⁷ Eyoñe te mia ye yeme na me ne zañe jenan éyoñ ése a bone b'Israél, na ma me ne Nti, e Zambe wônan, teke môte mfe! Teke fo'o bebé, ayoñe bôte dam da ye bo te beta bili ôson.