Yo 1 - Kalate Zambe Nnomo a Mfefe Mfefé Nkôñelan

¹ Nkobô Nti wu ô nga kui be Yôél, e mone Pétuél.

Kpwatôla bitandak a beta mfum

² Vô'ôla'ane jame dina, a mia bemvendé be bôt ku'ane melo menane mese a mia bôt mi too Yuda! Ye avale jame di e tameya boban nté mi nyiñeya, nge melu benyô *mvam'

³ Kañeta'ane jame te e be bone benan, a bone benane ki e be bone bap a bone bap e be miaé wo tôñe valé!

⁴ Jôme nkôñ ô nga lik, étandak é mineya je, a jôm étandak é li'iya, aselek é diya je; jôm aselek é nga lik, mba'a a diya je.

⁵ Ve'an ayo, mia beso'o bilam, mi yôn! Mia benyuu bilam, yônane mia bese; mia ye bo teke mfefé woon amu bibuma bi ndi'i woone momo.

⁶ Nkane bitandak ô yianeya si jangan. Bi n'ayok, tek'alañé, bia jiane jôm ése ane mesôñe me ngbwengbwem nge minkeke'e mi ngale ngbwengbwem.

⁷ Nkane te ô maneya di mefube mindi'i miangan, a mane ndamane befigié bangan ne meñ. Ba mane kpwele be, a mane soé be bikôbe biap a li'i ve bifumulu mintyaé.

⁸ Yônan an'ésoé minga é bili ôlun a yônôk nnôme wé a ndôme luk.

⁹ Mimveane mi fôn nge mi mi woon mi nji fe beta kui *nda Zambe. Ajô te betuni be ne meyeb été, mbe be ne ntelane ya saane Nti.

¹⁰ Mefup me maneya diban, si ébien é nyoñeya ôlun été. Te ke fe fôn, teke fe mendime ya ébuma ndik, teke fe atoé mbon ô ne mfefé.

¹¹ Bebé mefup be kuya avem Bebé mefube mindik ba yôn amu ate'e *nlem é biya be. Avute fôn a nlisi bi maneya, a bidi bise ba kôan bi ntoo momo.

¹² Ndi'i woon ô maneya kôt befigié ki be maneya jo'olan, bilé bia wum bibuma: begrenadié, bedatié a bepômié be maneya wulan. Avak ese e maneya e bôt été.

Nloone ya tyi bidi a ye'elane Nti

¹³ A mia betuni, jaane minkuta a tabane meyeb été! Yônan, mia mia bo ésaé ata'a metuna'a! Za'an a lôtan alu mi be'e minkuta, mia mia bo Zambe wom ésaé! Amu mimveane mi fôn, nge mi mi woon mi nji fe beta vebane *nda Zambe.

¹⁴ Benda'an éyoñe *ntyiane bidi, a bañete bôt be sulan; sula'ane bemvendé be bôt a jama bôte mbo'o ase e *nda Nti, e Zambe wongan, ye'ela'ane nye.

Môs ayaa Zambe

¹⁵ Angônda *môs wo zu, *môs ayaa Nti! Baa njañ be ne nsamba Zambe a ne ngul ése a tyi'iya nalé.

¹⁶ Bidi biangan bia jañ mise mangan été, mefôn a mevak bi se ke fe bebé a ndaa Zambe wongan.

¹⁷ Mefese mevoñ me maneya kôt e bibañe bi tyia si. Fôn é ntoo momo! Mengun teke jôm été a mekañ bikôkoé.

¹⁸ Vô'ôla'an ane betit ba tat! Mimbame biyem mia ndeñ li a li, amu teke fe bidi ya di. to'o na mintômba, mie fe mia wu.

Meye'elane me nkulu mejô

¹⁹ A Nti ma yône be wo! Nduan ja di'i bilo'o y'ôzôm, minkaba'a mi nduan mia di'i bilé bise ya mefup.

²⁰ Betite ya fé bebiene fe ba kôñelane nlô wop mfa'a ô né, amu atôñe mendim e maneya vele. Nduan ja di'i bilo'o y'ôzôm.