YEREMIA 9 - Kalate Zambe Nnomo a Mfefe Mfefé Nkôñelan

Bebela a nji fe bo

¹ Ngo'é nge me too ye bi *nda afan été, vôme bewulu dulu be ne nguleya sobô! Me nga ye li'i bôte bam a ke be ôyap! Amu bese be ne bebo *mejian, nsamba bekoñe bôt.

² Ba kolé ôyem an'élaé, asu ya laane minsos; be nji beta bo ngu e si jab été, amu nkobane benya mejôô; ba mane bo mbia jame va, a beta bo nyô mbo'o valé, a be ne te yeme ma, nalé Nti a jô.

³ Môt ase a tabe'e ba bevo'o ntye, a te buni wua ya bobenyoñe bôé; amu monyoñ ase a ne mvômvôle mvamban, a mvôé ése ja miase bibôta.

⁴ Ba bo du'adu'an e zañe jap, teke kobô bebela; ba belan ôyeme viap asu ya kobô mam me ne minsos. Ba te'e nyôle jap a mboon *abé.

⁵ Eto jôé é ne medu'ane zañ; ba bene yeme ma e medu'ane yôp, nalé Nti a jô.

Nti a yaa

⁶ Amu ajô te Nti ya minsamba mewosan a jô na: ô lôô ma zu nyemé be a ve'ele be; amu ô ne bo ngone y'ayoñe bôte dam za jam afe'

⁷ Ôyeme viap ô ne nsoñetan akoñ *élaé. Ba kobô ve medu'an; ba kobô ébemôtô *mvo'é ve biyaé ve *nlem été be lame nye melam.

⁸ Ye ma ye bo te yaa be amu nalé, nalé Nti a jô. Ye ma ye bo te kune mamien e b'aval ayoñe dina nga'

⁹ Ma zu yi a tat e miñyanebe y'afan; ma lomé du; amu be maneya di'iban, teke yene môt a lôtôk, tyiñe mimbame biyem é nji fe wô'é; biôm bise bi maneya ke, ataté anone ya yôp a kui betit.

¹⁰ Ma ye bo Yérusalém avise mbuan, éto bemvu y'afan. A ma ye veñesane bitisone ya Yuda jôme melunga, môte momo été.

¹¹ Mfefe'e môt wo wô'ô mame ma ô ne vé' A kate ñhe de, nyô Nti a nga kobô nye a anyu dé! Si jenan ja jañ amu jé, a amu jé é ntoo ndi'an ane *nkôte si, vôme môt éziñ a nji fe lôt'

¹² Nti a jô na: amu be nga li'i metiñe mam, ma me nga telé ôsu viap; amu be nga bo te vô'ôlô tyiñe jam, a bo te wulu ane ma jô,

¹³ amu be nga tôñe melo ya minleme miap, a tôñe fe Bebaal, avale b'ésaa bap be nga ye'ele be.

¹⁴ Ajô te Nti ya *minsamba mewosan, e Zambe Israél a jô avale di na: ô lôô ma zu bôte ba ôvuta be di, a ve be mendim me bili nsu, be nyu.

¹⁵ Ma ye mialane be e meyoñe bikul été, mme to'o bebien, to'o b'ésaa, be nji tame yem. A ma ye lôme nkpwaté mekôn mvuse jap, akekui me maneya jiane be.

¹⁶ Avale di Nti ya minsamba mewosan a jô na: fasan! Lo'one binga ba yeme yi, be za'ak! Lômane bôt be ke loone binga be n'atyeñ, be zu!

¹⁷ Be bo'o avôle ya bete tyiñe du jap ajô dangan, nalé milik ma ye kui bia mis, a mendim ma ye kui bia bivula.

¹⁸ Amu miñyôn mia so Sioñ; jia! Be maneya sa bia! Oson ô jaéya bia nyô. Amu bia yiane li'i si jangan, a be maneya sô'ôlô menda mangane si!

¹⁹ A binga, vô'ôla'ane ñhe ajô Nti, a alo denan e wô'ôk jam anyu dé da jô! Ye'ela'ane bobebinga benan ane ba yôn, ye'ela'ane mevale me du ézezañe jenan, bana a ba bevok.

²⁰ Amu awu e beteya bevundi bangan, e nyiineya menda bejô bôte mangan, da wôé *bon be ne minjoñ, bendôman be ne mevôm me ne ndam.

²¹ Jô'ô na: Avale di nde Nti a jô na: mimbim mi bôt mia ye ku afan été ane mebi, a ane mbome nkôane bidi a li'i mvuse jé; teke môt a to'é wô!

Fek a ntyi'iban atyele ya nlem

²² Avale di Nti a jô na: mfefek ô bo'o te wumu ôbien amu fe'e jé, a ngungu ô bo'o te wumu ôbien amu ngule jé, nkukum ô bo'o te wumu ôbien amu akume dé.

²³ Ve môt a kômbô wumulu émien a wumulu'u amu na a ne atyeñ a a yeme ma, amu a yeme na: Me ne Nti, nyô a liti *mvam, *zôsôô a nya ntyi'ane mejôô e *si nyô. Amu jame te nde ma yene mvaé nalé Nti a jô.

²⁴ Tame yen, melu ma zu, nalé Nti a jô, ma ye yaa bentyi'iban atyele bese be nji tu'a bo nalé e minleme biab été:

²⁵ Ejipte, Yuda, Edom, Beamônit, Môab, e ba bese ba tyeñeban ntyi'i, ba be too afan; amu *meyoñ mese me ne tee ntyi'iban metye, a *nda bôt Israél ése é ne tee ntyi'iban metye mfa'a ya minleme miab été.