YEREMIA 8 - Kalate Zambe Nnomo a Mfefe Mfefé Nkôñelan

Bôt be maneya bo mindindim

¹ Eyoñe te, nalé Nti a jô, ba ye vaa bivese bejô bôte ya Yuda, bi biwôlô bebo bisaé bié, bi betuni, e bi bekulu mejô a bi bôte be too Yérusalém e mesoñe mab été.

² Ba ye bôôé bie *mmialan ôsu jôp, di ngon, a di ateté ese ya yôp, mbie be nga nye'e *a kañ, mbie be nga late bie a jeñe bie, a mbie be nga kute meboñe si ôsu viap. Ba ye bo te beta kôane bie nge jame bie, bia ye bo akun étyi'a yôp.

³ Awu da ye bo jôme ya kañese a dañ ényiñ e be *mebuka'a ma ye li'i be mvoñe bôt é ne *nkpwala éte, e mevale mevôm mese me nga mane wôé be, nalé Nti ya *minsamba mewosan a jô.

⁴ Wo ye jô be na: Nti a jô avale di na: ye be wô'ô ku *mbek te beta kôlô si, nge na, ye be wô'ô lume mvus te beta bulan'

⁵ Amu jé ñhe bôte ya Yérusalém ba be bulaneya mvus, mbulane ya nnôm éto' Ba langane medu'an été, ba bene bulan.

⁶ Me too ne séé, me vô'ôlô'ô, be nji kobô, avale be nga yiane kobô; teke wua y'été a jôbane mbia mboone wé, nge jô na: Jé me nga bo ji' Bese ba beta taté mbile wop, aval'an'ékabela ja ke bita.

⁷ Ja'ane ngôkoé, e yôb été, ja yeme mbu wé, ôdu, nguleyebe a bingo, ba fombô éyoñe ba suan, ve bôte bam be nji yeme metiñe me Zambe.

⁸ Mi ne yeme jô aya na: bi ne mimfefek, metiñe me Zambe me ne be bia' Nkôse minsose beyeme bekalate ñwô ô nga tili medu'an.

⁹ Mimfefek mi nga ye wu ôson, woñ ô biya be, be biliya, ô lôô be nga biasé ajô Zambe a fe'e fé be bili'

¹⁰ Ajô te ma ye ve binga bap e be bôte befe a mefube map, e be bôt ba ye wôlé be biôm. Amu ataté nyô a dañ atek a kui nyô a dañ éwôlô, bese, be n'ôzañ akum; ataté *nkulu mejô a kui *ntuni, bese be ne mvô.

¹¹ Ba saé aveñe ngone ya bôte bam éngbwemese nsaan; ba jô na: Mvo'é! Mvo'é! Mvo'é ki é too momo.

¹² Ba yiane wô'ôsone ya beangôndô be mam ba bo, v'ôson ô ne te bi be. Be nji fe beta yeme wô'ôson, ajô te ba ye ku ba be ba ba ku, ba ye kolé éyoñe ma ye wosane be, nalé Nti a jô.

¹³ A maneya e zañe bia be be, nalé Nti a jô. Teke fe bibuma e figié; mekaé ma ye kôt; be maneya ndaman jôme me nga ve be.

¹⁴ Amu jé bi too te fô'ôsan' Sula'ane vôme wua, e nkeane bitison bi bili aleme na bi wu été, amu Nti, e Zambe wongan, a bo na bi wu, a bo na bi nyu mendim me bili nsu, amu bi maneya bo Nti *abé.

¹⁵ Bi nga yange *mvo'é, ve teke jam éziñ é ne mvaé; bi nga yange éyoñe nsaéban, ve woñ e ñwô bi bili.

¹⁶ Eduñe ya bikabela bié ja wô'é mfa'a ya Dañ, a si ése ja fô'ôsan a éduñe mintate ya mingungule bikabela bié; be soya, be mineya si, a biôm bise bi n'été. Tison a bôte be too été.

¹⁷ Amu ma nyô! Ma lôme benyo a mekpwe be mia, teke jôm é ne te'e be; ba ye lôbe mia, nalé Nti a jô.

Nkulu mejô a tat

¹⁸ Ôlune wom ô ne teke biañ, nyôle jam ése é ne nte'an.

¹⁹ Tame yene miñyône mi ngone y'ayoñe dam. mia so si é n'ôyap. Ye Nti a nji fe bo Sioñ' Ye njô bôte wé a nji fe bo e zañe jé' Amu jé be nga soñe ma me yaa a minkpwelane bive'ela miap, a bemomo be mame ya bikuu'

²⁰ Nkôane bidi ô maneya, ésebe fe é lôteya, a bia bi nji nyiiban!

²¹ Me ne ntya'an amu aveñe ngone ya bôte bam, me ne ne lumaa, atek e biya ma.

²² Ye biañ é nji fe bo Galad' Ye *dokita a nji fe bo wé' Amu jé ñyetane ngone ya bôte bam wo bo te yaé'

²³ Za a ye tyendé nlô wom ô bo anjeñe mendim, nge mise mam anjeñe milik, me nga ye yône mimbim mi ngone ya bôte bam alu ba *môs.