YEREMIA 7 - Kalate Zambe Nnomo a Mfefe Mfefé Nkôñelan

Melep a ayaa

¹ Ajô e nga zu be Yérémi e so'o be Nti na:

² tebe'e *mbé ya *nda Nti a yôtan ajô dina na: vô'ôla'an ajô Nti, mia bese ya Yuda mia nyiine mimbé mi na: Mi kute meboñe si asu Nti!

³ Avale di Nti ya *minsamba mewosan, e Zambe Israél a jô na: kômane mezene menan a mimboone mienan, éyoñe te ma ye suu mia mi tabe vôme nyô.

⁴ Te bunane mejô medu'ane na: *nda Zambe Nti nje nyô, Nda Zambe Nti, Nda Zambe Nti!

⁵ Nge mia kôme fo'o mezene menan a mimboone mienan, nge mia tyi'i fo'o bôte bana a bana mejô *zôsôô,

⁶ nge mi nji fite *ntabe, monenyui a nkus, nge mi nji kuli metyi me môt a ne te bijô e vôme nyô, a nge mi nji lat a bezambe befe, asu bidime bienan,

⁷ éyoñe te ma ye suu mia mi tabe e vôme nyô. E si me nga ve b'ésoo nnôm éto a nnôm éto.

⁸ Ve mia buni mejô medu'an, mme me nji volô jôm.

⁹ Mia! Wup, a wôé bôt, a bo *mejian, a kane mengana me ne minsos, a di'i Baal ôtu, a late mia a bezambe befe mbe mi nji yem!

¹⁰ Mvuse valé mi zu teb'asu dam, e *nda nyô, nje jôé dam da loban, mi na: bi kôtébaneya; nalé a too asu ya bo beangôndô be mam bete bese!

¹¹ Nda jam, e vôme ba loone jôé dam, ye é ntoo kam beze mimfaka e mise menane nga' Mamien me lôô nalé, nalé Nti a jô.

¹² Jiba'ane ñhe keane vôme wom an'étyi e Silô, e vôme me nga taté tooé jôé dam. Yenan avale me nga bo vôm ate, amu *nkpwala ya bôte bam Israél.

¹³ Eyoñe ji, amu mi maneya bo mame mana mese, nalé Nti a jô, amu me kobeya mia, a kobô mia, ja'an ataté mametyé ve mi te wôk, amu me looneya mia, mi te yalan,

¹⁴ ma ye bo Nda jôé dam da loban, nje mi too je mebun, nalé fe vôme me nga ve mia a b'ésoo, avale me nga bo Silô;

¹⁵ ma ye wua mia ôyab asu dam, avale me nga wua bobenyoñe bese, mvoñe bôt Efrayim ése.

¹⁶ Ve wo (a Yérémi), te ye'elan ajô bôte ba. Te bete tyiñe ñyôn nge meye'elan ajô dap, a te vañe ma; amu me nji fe beta wô'ô wo

¹⁷ Ye ô ne te yeme jame ba bo e bitisone ya Yuda a e minjoñe ya Yérusalém'

¹⁸ Bone ba tyaé nja'a, b'ésaa ki ba kôbane nduan, binga be ki ba fu'u avut asu ya yame njô bôte minga ya yôbe biwôlé a asu ya sôôé bezambe befe binyunyui, a dutu ma na me wô'ôlun.

¹⁹ Ye ma ba soñ ayaa, nalé Nti a jô, ye sa bebien a ôsone viab bebien'

²⁰ Ajô te Zambe, nyô a ne Nti, a kobô na: ô lôô ayaa dam a ayo'o dam da sôéban e vôme nyô, e be bôt a betit, e bilé ya fé a bibuma ya si; da ye yôñ teke beta dim.

Ayoñe bôt e ne te wô'ô Zambe wop

²¹ Avale di Nti ya *minsamba mewosan, Zambe y'Israél a jô na: beta'ane mimveane mienan ba di'i ngumba e *bityi'a bienane yôp, a di minsône y'été!

²² Amu me nji tame kobô b'ésoo, nge ve be abendé éziñ, e môse me nga vaa be si y'Ejipte, ajô mimveane ba di'i ngumba a *bityi'a asu metuna'a.

²³ V'abendé me nga ve be nde di: Vô'ôla'ane tyiñe jam, asu ya na me bo Zambe wônan, a mia ki mi bo bôte bam wula'an e mezene mese ma bendé mia, nalé mia ye yene mvaé.

²⁴ Be nji ke wôk, be nji ke kee alo; be nga tôñe mefek a melo ya mbia nleme wop. Be nga tebe mvus, te ke ôsu.

²⁵ Ataté môse b'ésoo be nga kôlô Ejipte a kui môse wu, me nga lôme mia bebo bisaé bame bese, bekulu mejô. Me nga lôme be *môs ôse, nné ane tyé ja lendé.

²⁶ Ve be nji wô'ô ma, be nji kee alo; be nga bo ntip, be nga bo *abé a dañe b'ésaa.

²⁷ Nge wo kate be mejô mete mese, ba ye bo te wô'ô wo; nge wo kobô be tyiñe ngu, ba ye bo te yalane wo.

²⁸ Ajô te jô'ô be na: ô lôô ayoñe bôt e ne te wô'ô tyiñe Nti, e Zambe wé, a nde e nji kômbô nyoñe nye'elan, bebela a maneya, a kôlôya mejô mab été.

²⁹ Tyi'ik ésile jôé é ne ntelan étyi, a wu'a je fé; bo'o na ñyôn ô bet e mebôbône minkôle yôp! Amu a biasé a a bene miaé bôt ô nga soñ ayaa dé.

³⁰ Amu bone be Yuda be boya jam e n'abé mise mam, nalé Nti a jô. Be teléya bitua bi biôme biap e *nda jame jôé dam da loban na be ve je mvin.

³¹ Be lôñeya bito ya bikôndô'ô yôp e tôfét, e mbi'ili Bén-Inom, asu ya di'i bobefame bap a bobebinga babe nduan: e jam ne nji be bendé, jam é nji zu ma ôsimesan.

³² Ajô te tame yen, melu ma zu, nalé Nti a jô, ba ye bo te beta jô na: Tôfét a Mbi'ili Bén-Inom, be na: Mbi'ili ñwôane bôt; a ba ye jame mimbim e Tôfét amu njemban afôla.

³³ Mimbime mi bôte ba mia ye bo mie bidi anone ya yôp, a betite ya si; a môte ya ndeñele be, a ye bo momo.

³⁴ Ma ye bo na bia mefôn a mevak bi bo momo e bitisone ya Yuda, a minjoñe ya Yérusalém; nalé fe bia bi éli'iti; amu si éte ja ye bo bilik.