YEREMIA 6 - Kalate Zambe Nnomo a Mfefe Mfefé Nkôñelan

Yérusalém a ye dilibane bita

¹ Kôla'ane Yérusalém a bone be Bényamin, loñane toñ e Tékôa, beta'ane nlinga e Bét-Akévem! Amu bidim a beta nzameta'an bia yené bi so'o akôé.

² Ma tyame ngone Sioñ, nyô a n'abeñ a biye'e!

³ Beba'ale mintômba a mimbame miap ba zu mfa'a a né, ba lôñe nye menda bindelé nyôle mbôma'an; môt ase a kendé ngabe jé.

⁴ Kômesa'ane bita mi wosane nye, teba'ane tetele! Mbetan e zañe *môs! Ve nju'u wongan ô ne na: Môs ô nga ndeñ, minsisiñ ya mamengô'é mi nga limetan

⁵ Teba'ane tetele! Mbetan a alu! Ntyamane biwôlô menda bejô bôt!

⁶ Amu avale di nde Nti ya minsamba mewosan a jô na: baka'ane bilé, bô'ane bikolé ôbak, asu ya wosane Yérusalém! Tison éte ja yiane nyoñe *melep, amu jam ese da boban été é ne ve étibela'a.

⁷ Aval? anjeñ da kuli mendime mé, avale te Yérusalém a kuli mbia mboone wé, éduñe ja boban été, é ne ve ji y'évô a éndaman; jôme ja yené mise mam éyoñ ése, é ne ve mintaé a meveñ,

⁸ a Yérusalém, nyoñe nye'elan, me za kôlô be wo. Me za bo wo élik, e si môt a nji beta tabe!

⁹ Avale di Nti ya minsamba mewosan a jô na: Ba ye sondô kolé *mebuka'a y'Israél ane ndi'i woon. Beta'a kee wo ane nkôane bibuma a kee wo e mintyaé mi ndi'i woon.

¹⁰ Me kobô za' A za nye me nyoñe ngaa ane ba ye vô'ôlô ma' Ô lôô melo map me ne teke ntyi'iban, a be n'ate'e ya yeme vô'ôlô; ô lôô ajô Nti e ne jam ôson e be be, be nji yene mvaé éziñ été.

¹¹ Me ne njalan a ayaa Nti, me n'ate'e ya kamane de. miala'ane de e be mon a tele njoñe yôp, avale te fe e be bendôman. Amu fam a minga ba ye bili, nalé fe nnôme môt a nyô a ntoo melu abui.

¹² Menda map ma ye kalan e be bôte befe, nalé fe mefup a binga, éyoñe ma ye same wo wom e be bôt be too *si nyô,

¹³ Amu na, ataté be nyô ya be be a ne tyôtyoé, a kui nyô a dañ anen, bese be n'ôzañ akum; ataté *nkulu mejô a kui *ntuni, bese ba belane medu'an.

¹⁴ Ba saé aveñe bôte bam égbwemese nsaan; ba jô na: Mvo'é! Mvo'é; ve *mvo'é ke momo;

¹⁵ ba yiane wô'ôsone ya b'angôndô be mam ba bo, ve ôson ô ne te bi be, be ne teke fe yeme wô'ôson, ajô te ba ye ku ba be ba ba ku. Ba ye kolé éyoñe ma ye wosane be nalé Nti a jô.

¹⁶ Avale di Nti a jô na: teba'ane mezen, fomba'an, yemela'an ajô mezene ya melu mvus; nya zene a ne ñhe vé' Wula'an été, a yen awo'one ya minleme mienan! Ve ba yalane na: bia ye bo te wulu été.

¹⁷ Me teléya mia bemombô; vô'ôla'ane tyiñe toñ! Ve ba yalane na: bia ye bo te vô'ôlô.

¹⁸ Ajô te vô'ôla'an a meyoñe bikuu! A wo a ékôane bôt, yeme jam da lôt e be be!

¹⁹ Vô'ôlô'ô a si! O lôô: ma ma zuu bidim e be bôte ba; bibuma y'asimesane dap; amu be nji vô'ôlô mejô mam; a be nga biasé metiñe mam

²⁰ ma bo ôtu wo so Saba a nkaé ya si é n'ôyap wo nyume mvaé jé' Me nji yene mimveane mienan ba di'i ngumba mvaé, a me nji nye'e *bityi'a bienan.

²¹ Ajô te Nti a jô avale di na: me nyô, ma bôôé ékolé ôba'a mekok ôsu ya bôte ba, vôm ate *bon a b'ésaa ba ye kolé ôba'a nsamba wua; nalé fe bemvôé, a bôt be too vôme wua, ba ye wu.

Kpwatôlô

²² Avale di Nti a jô na: ô lôô bôte ba so éfuse si y'akôé, beta ayoñe bôt a vee e meku'u ya *si nyô.

²³ Ba samese *élaé a ayab akoñ; be ne njet, te k'éngôngo; tyiñe jap ja sôk ane mañ; be bete bikabela yôp, nta'ane nsamba ane môte wua asu mewosan, wo ba zu wosane nye, a ngone Sioñ!

²⁴ Bi wô'ôya foé a mo mangan me maneya tek, biyebe bi biya bia, nalé fe mintaé ane mi minga a biaé.

²⁵ Te kean afan, te keane mezen; amu nsiñ a ne wé a bili nkpwaté mekôn wé, a miase woñe meku'u mese!

²⁶ A ngone bôte bam, jaék nkuta ane kandé, a bum asub été. Nyoñe meyep ane atyi'i monafam, juu womien abui du été amu nsa biôm a ye kui be bia atemetem.

²⁷ Me teléya wo ane nyô a ve'ele bôte bam, ane ôlem, nalé ate ô yeme na wo ve'ele mezene map.

²⁸ Be ne mbia mimbenan bese, bôte bibôta, be too ane mvot a an'étyé, bese ba bo mbia be mam

²⁹ nkôm ô n'ayôñ abui afiti a maneya nyemé e nduan été. Ba jañele éyoñe ya fubu étyé ésôm é nji kôlô.

³⁰ Ajô te ba loone be na, argent ba biasé. Amu Nti a biaséya be.