YEREMIA 51 - Kalate Zambe Nnomo a Mfefe Mfefé Nkôñelan

¹ Avale di Nti a jô na: ô lôô, ma ye bete évuñulu ja tyam, é wosane Babilôn a bôte be too Léb-Kamayi.

² Ma lôme bese'ese be wosane Babilôn mbe ba ye se'ese nye. Mbe ba ye li'i si jé ne ngeññ; amu môse bidim, ba ye su'ulane nye yôbe mimfa'a mise.

³ Be kolé'é *élaé e nyôle môt a kolé *élaé, e nyôle môt a bo mebun alô'ô bityé dé été! Te léane bendômane bé! Ji'ane nsamba mewosane wé ne meñ!

⁴ Bebalé meveñ a kui awu be kpwa'ak e si Bekaldééñ, a ba be ne nlumane mekoñ e minjoñe ya Babilôn.

⁵ Amu Israél a Yuda be nji bo minkuse mi Zambe wop, mi mi Nti ya *minsamba mewosan. Akôsa bo na si jab é bili mekua ntet a ntet asu Nyô y'Israél a n'étyi.

⁶ Tubane Babilôn, a môt ase a nyi'i ényiñe jé, te taban évô amu ékobe jé! Amu éyoñ akuna'a Nti nje ji; a ye bulane nye jôme ja yiane nye!

⁷ Babilôn a mbe *élaé or e wo Nti été, nje é nga bo *si nyô ése na é sok; *meyoñ me nga nyu woone wé, ajô te me nga taté na ma fôtan ane mekut.

⁸ Atemeteme na Babilôn ve ku, a ntoo mbôlan! Ko'one nye mvôñ, nyoñane biañ asu fôle jé, ndô'ôtô na ja ye yet.

⁹ Bi nga kômbô yete Babilôn, ve a nji ke bo *mvo'é. Nli'ane nye, a e nkean, môt ase, e si jangan, amu ntyi'an ajô wé wo bet a kui yôp, a kui minkut.

¹⁰ Nti a bo na *zôsôô wongan a yené, za'ane bi kañete ésaé Nti, e Zambe wongan Sioñ.

¹¹ Jebane mekoñ m'élaé, jala'an mimfe'e miap! Nti a fô'ôya nsisime bejô bôte ya Beméde, amu a bili nkômban ya tyame Babilôn. Amu akuna'a Nti le, akuna'a ya *nda Zambe jé.

¹² Beta'ane nlinga wo wosane mimfine ya Babilôn! Yemeta'ane mmomban, tela'ane bemombô, kômane mevôme ya yabe asoé! Amu Nti a bili jam a kômbô bo, a a bo jam a nga tote na a bo bôte be too Babilôn.

¹³ Wo ô too mfôm abui asôé a ô bili jama akum, asu'ulane dôé e soya e too abim ane ôzañ akume viôé ô né!

¹⁴ Nti ya *minsamba mewosan a kaneya de ngana a Emiene na: yaa, ma ye jalé wo a bôt ane nge be mbe meselek, a ba ye yôtane wo miñyône mevak,

¹⁵ a nga bo si a ngule jé a nga bo mbôka'a y'émo a fe'e jé, a nga ndamé yôp a atyeñe dé.

¹⁶ Eyoñ a ve *tyiñ, mendim ma kôane yôp; a bo na minkut mi bet mi so'o aku'u si. A bo feleves asu mveñ a kuli évuñulu e vôm é solô.

¹⁷ Môt ase a ntoo asuk e ñyemane wé été, mmé or ase a wô'ôson, amu éve'ela jé é ne nkpwelan; amu bengunemelane bé be ne ve minsos, mveb'ényiñ ô nji bo be be.

¹⁸ Be ne fo'o ve momo, ésaé é ne teke jam; ba ye bo momo éyoñ melebe mab ma ye so.

¹⁹ Nyô a ne ngabe Yakob, a nji bo ane be; amu nye a mé biôme bise, a dañe dañ ayoñe ya ngabe jé, jôé dé e ne na Nti ya *minsamba mewosan.

Amané Babilôn

²⁰ Ô nga too ôkuta'a wom, mengale bita. A wo, me nga bômôlô *meyoñ. A wo, me nga tyame bijôé.

²¹ A wo me nga bômôlô ékabela ba môt a bete je yôp. A wo, me nga bômôlô vagoñe bita a môt a too nye yôp.

²² A wo, me nga bômôlô fam a minga. A wo, me nga bômôlô nnôme môt a mongô. A wo, me nga bômôlô ndôman a ngone minga.

²³ A wo, me nga bômôlô mba'ale mintômba a mbame wé. A wo, me nga bômôlô nsenane si a bivôle bié a bo bie ésaé. A wo, me nga bômôlô bengovina a bôte metiñ;

²⁴ ma ye bulane Babilôn a bôte bese be too si Bekaldééñ *abé ese be nga bo Sioñ mise menan me lôô, nalé Nti a jô.

²⁵ Me nyô, me ne wo ngame yat a nkôle wo tyam, nalé Nti a jô, wo ô nga tyetyame si ése! Ma ye same wo e wo wome ngame yat, a ma ye bi'iti wo ô so'o mekôme yôp, a ma ye bo wo nkôle wo yôñe nduan.

²⁶ E be wo, ba ye bo te dutu to'o meko'o y'abu'u *nda, to'o meko'o ya mbôka'a; amu wo ye bo melunga nnôm éto, nalé Nti a jô.

²⁷ Beta'ane nlinga e si! Loñane toñ e *meyoñ été! Kômane *meyoñ me ke wosane nye; lo'one bijôé y'Arara, ya Mini, y'Akenaz bi wosane nye, tobane beta njôô bezimbi a wosane nye! Bo'one na bikabela bi subu ôsu ane meselek ma kamane mebien!

²⁸ Kômane *meyoñ me wosane nye, baa be bejô bôte Beméde, bengovina bé, bôte metiñe bé a si ése é n'éjôé jabe si.

²⁹ Si é bulekaneya, é fô'ôsaneya; éyoñe ôsimesane Nti ya wosane Babilôn wo tôéban: a bo si ya Babilône bili'i bi ne teke môt.

³⁰ Bewosane ya Babilôn be jô'éya mewosan, be li'iya be too e bitison bi bili alem; be vuaneya éwôlô jap, be ntoo ane binga; be futiya nduane menda mé, be téya mengôñe mé.

³¹ Mmate mbi a mate a ke tôbane mmate mbile mbok, nkatefoé ki nkatefoé mbok asu ya kate njô bôte ya Babilône foé na tisone jé é nyoñebaneya ataté aku'u di a kui aku'u avok.

³² Mebôñ (m'asôé) me nyoñebaneya, a be nga di'i bingas a nduan a bôte mewosan ba ko woñ.

³³ Amu avale di Nti ya *minsamba mewosan, e Zambe Israél a jô na: a ngone ya Babilôn ô ntoo ane vôme ba vaa bidi bikôla'a éyoñe ba tya'a bie a mebo; étun éyoñ é ngenane na éyoñe ya nkôane bidi ô so asu dé.

Zambe a ye kune bôte bé

³⁴ Nébukatnétzar, njô bôte ya Babilôn a maneya mine ma, a maneya kandé ma; a veñesaneya ma me bo viek ô n'ékôkoé; a maneya mine ma ane beta tit, a jaléya abume dé a jôme me nga bili é too édima; a vaaya ma.

³⁵ Evô é maneya bobane nyôle jam a minsône miam é kpwa'a Babilône yôp! Nalé minga a too Sioñ a jô. A metyi mam me tabe'e be bôt be too si Bekaldééñ! Nalé Yérusalém a jô.

³⁶ Ajô te nde Nti a jô na: ô lôô ma ye kaman ajô dôé, ma ye kune wo! Ma ye vele mañe ya Babilôn, ma ye kôtô anjeñe dé.

³⁷ Babilôn a ye veñesan avise *mekok, étaba'a bemvu ya fé, jôme ba kpwe'ele anyu a mo a éwovioé; bôte ba tab'été ba ye bo momo.

³⁸ Ba ye nyé nsamba ane bone bengbwengbwem, a bam ane bitoñe bengbwengbwem.

³⁹ Eyoñe be maneya wobane nduan, ma ye kômesane dina wop, a ma ye bo be na be bili bilam, nalé ba ye bo mevak, *a ke ôyo melom, te nguleya beta vee, nalé Nti a jô.

⁴⁰ Ma ye bo na be ke vôme ba tyi'i betit ane bone mintômba, ane beyôme mintômba a bikela.

⁴¹ Ngo'o Sésak a nyoñebaneya! Duma ya si ése e vasebaneya! Ngo'o Babilôn a ntoo bilik e *meyoñ été!

⁴² Mañ me beteya Babilône yôp, ézu'u mendime jé é yandaneya nye yôp.

⁴³ Bitisone bié bi ntoo bilik, a ntoo si mfum, nkôte si; si môt a nji fe tabe, e vôme môta binam éziñ a nji fe lôt.

⁴⁴ Ma ye wosane Bel e Babilôn, jôm a nga min, ma ye vaa nye j'anyu, a *meyoñ ma ye bo te beta tundane ke wé; mfin ôbiene ya Babilôn ô kuya!

⁴⁵ Mia bôte bam, kôla'an ézezañe jé, a môt ase a nyi'i ényiñe jé, ôyap a ayôñ ayaa Nti,

⁴⁶ nleme wônan ô za bili atek, a mi za ko biduñe bia wô'ôtane si nyôna woñ! Ane mbu ane ébubua ane mbu ôvok ane ébubua évok; évô ja ye bobane si; ntibi bôte yôp a ye wosane ntibi bôte mbok.

⁴⁷ Amu ajô te ô lôô melu ma zu mme ma ye wosane bengunemelan ya Babilôn be ne nkpwelan, a si jé ése ja ye bo ôson été; mimbime mié mise mia ye ku ézezañe jé.

⁴⁸ Eyoñe te yôp a si a biôme bise bi n'été bia ye lomé Babilôn jia ndañan; amu betyam ba ye kubu nye yôp be so'o akôé, nalé Nti a jô.

⁴⁹ A miñwuane y'Israél, Babilône fe a yiane ku avale Babilôn a nga kpwé miñwuane ya si ése!

⁵⁰ Befam awu nkpwaté mekôn, kelan, te teban! Mi simesa'ane Nti mi too ôyap, a Yérusalém a bii éto minleme mienan été!

⁵¹ Bi nga too ôson été, éyoñe bi nga wô'ô meta; ôson ô nga yalé mesu mangan éyoñe bikuu bi nga so e vôme y'été a ne Nda Nti.

⁵² Ajô te nde, ô lôô, melu ma zu, nalé Nti a jô, mme ma ye wosane bengunemelane bé be ne nkpwelan a e si ése, miñwuan mia ye suu abuk.

⁵³ To'o na Babilôn a bet a kui yôp, to'o a bo aleme na e bo te k'anyiine, betyam ba ye wosane nye ngame jam, nalé Nti a jô.

⁵⁴ Nyôn wo wô'é ô so'o Babilôn, nalé fe beta éduñe si Bekaldééñ.

⁵⁵ Amu Nti a sa Babilôn, a bo na beta tyiñe wé a tab'évô; mendime mé ma sôk ane beta b'asôé, ba ve tyiñe ngu.

⁵⁶ Yaa, ntyam a zu wosane nye, a zu wosane Babilôn; mimbene mié mi biliya, bilaé biap bi bu'ubaneya. Amu Nti a ne Zambe a yeme ve ma'an, a bulane môt ase jôm é n'énjé.

⁵⁷ Ma ye bo bivete bié, a beyeme mame bé be bili bilam, nalé fe bengovina bé, bôte metiñe bé a mimbene mié: ba ye ke ôyo melom, a ba ye bo te fe beta vee, nalé njô bôt, nyô jôé dé e ne na, Nti ya *minsamba mewosan a jô.

⁵⁸ Avale di Nti ya minsamba mewosan a jô na: ndame mimfine ya Babilôn ja ye bôéban ne meñ, mimbé mié mi n'ôyabe yôp mia ye di'iban a nduan; éyoñe te ésaé bôt be nga bo ja ye bo zezé. Meyoñe bikuu me nga wu njuk asu nduan.

Asu'ulane Babilôn

⁵⁹ Abendé *nkulu mejô Yérémi a nga ve Séraya e mone Nériya, ndaé Maséya, éyoñe ba Sédékias, njô bôte ya Yuda be nga ke Babilôn mbu nyini Sédékias a nga jôô. E too na Séraya a mbe évete beba'ale akum.

⁶⁰ Yérémi a nga tili bidim bise bi nga yiane kui Babilôn, mejô mese me ne ntilan ajô Babilôn e kalat'éziñ été.

⁶¹ Yérémi a nga jô Séraya na: Éyoñe wo ye kui Babilôn, wo ye bômbô évévé ya lañe mejô mese ma,

⁶² wo ye jô na: A Nti, womien ô nga kobô ajô ya vôme nyô na a ye vaaban, a na, to'o bôt to'o betit, teke jôm ja ye beta tab'été, ve na a ye bo bilik nnôm éto.

⁶³ A éyoñe wo ye mane lañe kalate nyô, wo ye tiñeti ako'o été, a wua de ézezañ ôsôé Efrat.

⁶⁴ Wôna wo ye jô na: Avale di nde Babilôn a ye nyoñ, a ye bo te beta tebe tetele amu bidime ma ye soo bie be nye; ba ye ku be te'eya. Amané ya mejô me Yérémi nde le.