YEREMIA 5 - Kalate Zambe Nnomo a Mfefe Mfefé Nkôñelan

Te ke môte wua e Yérusalém a ne zôsôô

¹ Bôma'ane minjoñe ya Yérusalém, fomba'an, sila'an a yemelan, jeñan e mevôm me ne ndam, nge môt a n'été, nge a ne ve wua a ve'ele bo *zôsôô, a jeñe benya mejôô, wôna ma ye jamé Yérusalém.

² To'o éyoñe ba jô na: Nti a ne vevee! Ba kane ve ngana medu'an.

³ A Nti, ye mise môé me nji jeñe benya mejôô' Ô bibiya be, ve be nji wô'ô mintaé; ô jianeya be, be nga bo asu dab ayet a dañ akôm. Be nga bene kôñelane minlem.

⁴ Me nga jô na: Be ne bingôngole bi bôt, ba bo mam ane mekut, amu be nji yeme zene Nti, nge metiñe me Zambe wop;

⁵ ve ma ye viane ke e be biwôlô bi bôt a kobô bie; amu be ba yeme zene Nti a metiñ me Zambe wop; ve be fe be bu'uya ébôñeté, a té mengata'a bese nsamba wua.

⁶ Ajô te ngbwengbweme y'afan ja bôme be, a mvu mefan ja nyabe be, a ze ja yabe e menyiine ya bitisone biap: ba bese ba ye kômbô kui atan, ba ye nyaban; amu bikotekote bi mame biap bi n'abui; tyabetyabe mboone mame wobe fe a ntoo abui.

⁷ Ye amu nalé nye me ne nguleya jamé wo' Bone bôé be li'iya ma; ba kane ngana a jôé jôm é nji bo Zambe. Me nga kuli be mebum minlem, ve ba bo *mejian. Ba sulan e *nda minga ébamba.

⁸ Be ne fo'o ve bikabela y'afan bia di mvaé; môt ase a vebele mvuse nga môt a too nye bebé.

⁹ Ye ma ye bo te wosan avale mame te, nalé Nti a jô. Ye ma ye bo te kune mamien e b'aval? ayoñe bôte te nga'

¹⁰ Betan e meka'a ya Yérusalém yôp, a tyame me. Ve te mane jian ase! Va'ane mintyaé mié, amu mi nji bo mi me Nti!

¹¹ Amu *nda bôt Israél a *nda bôte Yuda be joñôlôya fo'o ma, nalé Nti a jô.

¹² Ba belane medu'an mfa'a Nti, ba jô na: Nti a nji bo! A bidim bia ye bo te kui be bia, bia ye bo te yene nkpwaté mekôn nge zaé.

¹³ Bekulu mejô be ne fo'o v'évuñulu, a môt éziñ a nji kobô e be be: ajô te jame di e bo'o ñhe fo'o be.

¹⁴ Amu ajô te nde Nti, nyô a ne Zambe ya *minsamba mewosan a jô na: amu mi kuliya éfia te, ô lôô, ma futi mejô mam anyu dôé ane nduan, a bôte ba ba ye bo nja'a nduan éte ja ye mane min,

¹⁵ ma nyô, ma soo ayoñe bôt ôyap e wosane wo a *nda bôt Israél! Nalé Nti a jô. Ayoñe bôte te e ne ngu, ayoñe bôt e too aso nnôm éto, ayoñe bôt ô ne te yeme nkobô wop, a wo ye bo te wô'ô jame da jô.

¹⁶ Nkobe bibaé bi mfane wé ô yoo ane soñ; bese be ne mimben.

¹⁷ Da ye mane mine bidi wo kôan, a bi wo di, avale te fe da ye bo bobefame bôé a bobebinga bôé. Da ye mine bone a beta mimbame biyeme miôé, nalé fe ndi'i woone wôé a figié wôé. Da ye tyame bitison bi aleme biôé wo buni, a nkpwaté mekôn.

¹⁸ Ve ja'ane melu mete, nalé Nti a jô, ma ye bo te jiane mia ne meñ.

¹⁹ Nde ñhe, nge mia sili na: amu jé Nti, e Zambe wongan a bo bia mame mana mese' Wo ye yalane na: avale mi nga li'i ma a ke saane bezambe bikuu e si jenan, avale te mia ye saane bikuu e si é nji bo énjenan.

Mam ma dutu ayaa be Israél

²⁰ Katane jame di e be *nda bôte Yakob, bo'one na Yuda a wô'ô de a jô'ane na:

²¹ vô'ôla'ane jame di a mekute me bôt, a te fe'e mebum! Be be'e mis, ve te yen, be be'e melo, ve te wôk.

²² Ye mia ye bo te ko ma woñ, nalé Nti a jô, ye mia ye bo te fô'ôban ôsu viam, e ma me nga ve mañe nselek ane nné, nka'alé ô too nnôm éto, a ñwô mañ me nji yiane dañ' Mendime mé ma fô'ôsan, ve me nji bi ngu; ma kumutu ve teke dañe nka'alé.

²³ Ve bôte ba be be'e minlem mi n'ayet a melo; ba kôlô a ke.

²⁴ Be ne te jô e minleme miab été na: nkoone Nti, e Zambe wongane woñ, nyô a noo mveñ éyoñ ja yian, mveñe y'atata'a a nyô y'amané mbu, a a ba'ale bia besondô asu nkôane bidi,

²⁵ bikobe bienan mbie bi nga zametane mam mese, *abé denan nde da suu mia mvaé éte.

²⁶ Amu mbia be bôt be ne e zañe bôte bam; ba mombô ane belam anon, ba lame melam asu ya bi bôt.

²⁷ Menda map me ne njalan a medu'an aval'ane *nda anon é ne njalan a anon; nalé ate nye ba bo ngu a minkukum.

²⁸ Be ntoo avem, be nga faé fe, be nga beté ôdo'é ya mboon *abé. Be nji kaman ajô monenyui. Ve ba nenenen afo'o été. Be nji tyi'i ajô éngôngole môte *zôsôô.

²⁹ Ye ma ye bo te wosan avale mam ete nalé Nti a jô, ye ma ye bo te kune mamien e b'aval ayoñe bôte di'

³⁰ Etua jam a angônda jam a nga boban e si jenan:

³¹ bekulu mejô ba kulu minsos. Betuni be bili be éjôé jab été, a bôte bam ba nye'e na nalé nye a boban! Ve mia ye bo aya melu ma zu ajô si jenan'