YEREMIA 47 - Kalate Zambe Nnomo a Mfefe Mfefé Nkôñelan

Nkulane mejô wo wosane Befilisteñ

¹ Mejô Nti a nga kobô *nkulu mejô Yérémi ajô Befilisteñ te na Faraoñ a bibi Gaza mme ma:

² avale di Nti a kobô na: ô lôô na mendim ma bete mfa'a y'akôé. Ma bo an'ôtôñe mendim wo kui ndôn; ma kuli si a biôm bi n'été ndôn, nalé fe bitison a bôte be too été. Befam ba yôn. E bôte bese be too si ba bam,

³ amu éduñe ntyañetane bibo'os ya bikabela bié bi ne biwôlô, amu éduñe ya bevagoñe bé a éduñe ya minka mié; b'ésaa ba kate kôñelan mfa'a *bon be né, amu mo me dañeya tek.

⁴ Amu môse ya sa si Befilisteñ ése wo zu, môse ya vaa ba bese be ngenane ba volô Tir a Sidoñ, amu Nti a sa si Befilisteñ a *mebuka'a m'ékôte mañ ba loone Kaftor.

⁵ Gaza a mbili ayan, be kpwéya Askalôn évô, *mebuka'a me ngule jap, Wo ye kpwele womiene mimba'a nyô a kui éyoñ évé'

⁶ A nkpwaté mekône Nti wo ye ke a kui vé te wo'on' Bula'an abame dôé été. Bo'o ne mieññ a tab'évô.

⁷ Ô ne nguleya wo'on aya' Eyoñe Nti nye a lôme wô asu ya wosan Askalôn a nsa'a mañ' Nne a ye tôbane wô wé.