YEREMIA 44 - Kalate Zambe Nnomo a Mfefe Mfefé Nkôñelan

Melep ma tôñe Beyude be nga wondé a k'Ejipte

¹ Ajô Nti e nga litibane be Yérémi ajô Beyude bese be too si y'Ejipte, be too Migdol, Tapanés, Nof a si Patrôs na:

² Avale di Nti ya *minsamba mewosan, e Zambe Israél a jô na: Mi nga yene bidime bise me nga zuu bie Yérusalém, a bitisone bise ya Yuda: mi lôô bi ntoo môse wu ve bilik, teke fe bôt be too été,

³ amu *abé be nga bo asu ya na me wô'ôlun, éyoñe ba ke ve ôlobinda a kañe bezambe befe, mbe be nji tame yem, nge be, nge mia, nge b'ésoo.

⁴ Me nga lôme mia bebo bisaé bame bese, bekulu mejô, me nga lôme be nné ane tyé ja lendé, be jô mia na: Te boone angôndô jam ate, nye ma vini.

⁵ Ve be nji vô'ôlô, be nji kee alo, be nji bulane mvus mfa'a y'abé be nga bo, a be nji jô'é ve bezambe befe ôlobinda.

⁶ Aya'a dam a ayo'o dam bi nga sôéban a di'i bitisone ya Yuda, a minjoñe ya Yérusalém mbie bi ntoo éyoñe ji ve bilik, melunga, avale da yené môse wu.

⁷ Eyoñe ji, Nti ya *minsamba mewosan, e Zambe Israél a kobô avale di na: Amu jé mia bo miabebien abim anen *abé di, éyoñe mia vaa ézezañe Yuda été befam, binga, bongô a minkeñelé mi *bon, *mebuka'a momo'

⁸ Mboone te ô too asu ya bo na me wô'ôlun, amu mimboone ya mo menan, éyoñe mia ve bezambe befe ôlobinda Ejipte, vôme mi zuya tabe, a bo na mi vaaban a bobane jôm ébiasé a ôsame e *meyoñ mese ya *si nyô été.

⁹ Ye mi vuaneya mewôé me bôt b'ésoo, e ma bejô bôte ya Yuda, e ma beyal, émenan, a ma benyô beyal, mmie mi bobaneya si ya Yuda a minjoñe ya Yérusalém'

¹⁰ Be nji jôban *abé dap a kui môse wu, be nji ko woñ, be nji tôñe metiñe mam a memvinda mam me nga telé ôsu vienan a ôsu b'ésoo.

¹¹ Ajô te Nti ya *minsamba mewosan, e Zambe Israél a jô avale di na: Ô lôô: ma tyi'i na ma bo mia *abé a vaa Yuda ase.

¹² Ma ye nyoñe *mebuka'a me Yuda mese me nga tyi'i na ma ke Ejipte a tabe wé; ba ye bo momo bese Ejipte; nkpwaté mekôn a mfumbale zaé bia ye kpwé be, ba ye bo jôme biyo'é, melunga, ébiasé a ôsame.

¹³ Ma ye tebe ba be too si y'Ejipte ngame yat a nkpwaté mekôn, mfumbale zaé a bim avale me nga bo Yérusalém.

¹⁴ Teke'e môt a ye fam awu nge nyiñ e *mebuka'a ya Yuda me nga zu tab'Ejipte, ôsimesan ô too na ba ye beta bulane Yuda e vôme nkômbane wob wo ke be na be bulane tabe; amu ba ye bo teke beta bulane wé, vengevenge ve ayôme befam awu.

¹⁵ Befam bese be mbe be yeme na binga bap be mbe be va'a bezambe befe ôlobinda, binga bese be nga tele beta nsamba valé, a bôte bese be nga too Ejipte e tisone Patrôs be nga yalane Yérémi na:

¹⁶ bi nji kômbô beta wô'ô ajô ô nga kobô bia a jôé Nti.

¹⁷ Ve bia kômbô bo aval'an'ajô e nga kui anyu dangan e né, e ne na: E ve njôô minga ya yôb ôlobinda a sôé nye binyunyui, avale bi tameya bo, bia, a b'ésaa bangan, bejô bôte bangan a bivete biangan e bitisone ya Yuda, a e minjoñe ya Yérusalém. Bi nga bili bidi abime da yian, bi mbe mevak teke wô'ôtane bidime biziñ.

¹⁸ V'ataté éyoñ bi nga jô'é mveane njôô minga ya yôb ôlobinda a sôé nye binyunyui, bi nga yi mam mese, nalé fe na nkpwaté mekôn a mfumbale zaé bi taté na bia wôé bia.

¹⁹ Eyoñ ébien bia ve njôô minga ya yôb ôlobinda a sôé nye binyunyui, ye beyôme bangan be nji kañese na bi yame biwôlé bi too éve'ela jé a sôé nye binyunyui'

²⁰ Ane Yérémi a nga yalane bôt avale di: befam, binga a bôte bese be nga ve nye éyalane te na:

²¹ Ôlobinda mi nga di'i e bitisone ya Yuda a minjoñe ya Yérusalém, miabebien a b'ésoo, bejô bôte benan a bivete bienan a bôte bevo'o ya si jenan, ye Nti a nji simesane nye, ye a nji ba'ale jame te nleme wé'

²² Nti a nji ke ôsu a jibi de amu évô ya mimboone mienan, amu beangôndô be mam mi nga bo; a si jenan é su'ulane bo bilik, melunga, jôme y'ébiasé, bôte momo aval é ne môse wu.

²³ Amu mi nga di'i ôlobinda a bo Nti *abé, amu mi nji wô'ô tyiñe Nti a teke wulu ane metiñe mé, memvinda mé a minjôane mié bi né, ajô te nde bidime bi bi nga kui be mia, aval e ne môse wu.

²⁴ Yérémi a nga beta jô bôte bese a binga na: Wô'an ajô Nti, mia bese ya Yuda mi too Ejipte!

²⁵ Avale di Nti ya *minsamba mewosan, e Zambe Israél a jô na: Mia a binga benan, mi maneya jô a menyu menan a bo jam mia jô a mo menan na: Bia kômbô jalé mintiñetane miangan bi nga tiñeti, a ve njôô minga ya yôb ôlobinda, a sôé nye binyunyui. Mia ye fo'o yemete mintiñetane mienane mise.

²⁶ Ajô te vô'ôla'an ajô Nti, mia bese ya Yuda mi too Ejipte! Mi lôô: ma kane de ngana a beta jôé wom, nalé Nti a jô, jôé dam da ye bo te beta looban a anyu môt éziñe ya Yuda; e si ése y'Ejipte, teke wua a ye jô na: Ane Zambe, Nyô a ne Nti a vee!

²⁷ Mi lôô, ma ye fombô be asu bidime biap, sa asu mvome jap. Bôte bese ya Yuda be n'Ejipte, ba ye vaaban a nkpwaté mekôn a mfumbale zaé akekui ba maneman.

²⁸ Mone ngabe bewu, ba ba ye fame nkpwaté mekôn, ba ye bulane si ya Yuda be so'o Ejipte. Ve *mebuka'a ya Yuda, ba bese be nga so'o Ejipte na ba tab'été, ba ye yem ajô da ye tôéban, y'éndam, y'éndap'

²⁹ Mi lôô, nalé Nti a jô, ndem mia ye yeme na ma ye wosane mia e vôme nyô, nalé mia ye yeme na mejô mam ma ye fo'o tôébane be mia asu bidime bienan.

³⁰ Avale di Nti a jô na: Mi lôô: ma ye kalane Faraoñ Hôfa njô bôte y'Ejipte e mo besiñe bé, e mo me ba ba jeñ ényiñe jé, avale me nga ve Sédékias, njô bôte ya Yuda, e mo me Nébukatnétzar, njô bôte ya Babilôn, nsiñe wé, nyô a nga jeñejeñ ényiñe jé.