YEREMIA 43 - Kalate Zambe Nnomo a Mfefe Mfefé Nkôñelan

Ba wo'otô Yérémi Ejipte

¹ Eyoñe Yérémi a maneya kate bôte bese mejô mese Nti, e Zambe wob, a nga lôme nye na a kate be,

² Eyoñe te Azaria, e mone Hôkaya, Yôhanañ, e mone Karéa a bôte mebune bete bese be nga jô Yérémi na: Jame wo jô e ne minsos; Nti, e Zambe wongan a nji lôme wo ô jô na: Te kean Ejipte a tabe wé.

³ Ve Baruk, e mone Nériya, nye a tindi wo na ô wosane bia a ve bia e mo Bekaldééñ na, be wôé bia, nge kee bia minkôme Babilôn.

⁴ Yôhanañ, e mone Karéa, bivete bise ya nkane bita a bôte bese y'ayoñ be nji wô'ô tyiñe Nti Nye a nga bendé be na be tabe si Yuda.

⁵ A Yôhanañ, e mone Karéa, a bivete bise ya nkane bita be nga nyoñe *mebuka'a mese ya Yuda me nga bulane zu tabe si Yuda, mvuse nkeane be nga mane ke minkôm, e *meyoñ mese été:

⁶ befam, binga, bongô, bengon be njô bôt a bôte bese Nébuzaradañ, évete bezimbi, a nga li'i ba be Gedalia, e mone Ahikam, ndaé Safan, *nkulu mejô Yérémi a Baruk e mone Nériya.

⁷ Be nga ke Ejipte amu be nga bo te wô'ô tyiñe Nti a be nga kui Tapanés.

Nkulane mejô ane Nébukatnétzar a ye wosan Ejipte

⁸ Ajô Nti e nga litibane be Yérémi e Tapanés na:

⁹ nyoñe beta meko'o mo, a solé me e mete'e me ne mbôka'a brik ô n'anyiine *nda Faraoñ e Tapanés, bôte ya Yuda be lôô;

¹⁰ wo ye jô be na: Avale di Nti ya *minsamba mewosan, e Zambe Israél a jô na: Ô lôô, ma lôme bôt be ke nyoñe Nébukatnétzar, njô bôte ya Babilôn, mbo ésaé wom. Ma ye telé éto njôane jé e meko'o ma te solé mana yôp, a ye bôé ôkala wé été yôp.

¹¹ A ye zu a bibi si y'Ejipte: awu asu ba be ne asu awu, minkôm asu ba be ne asu minkôm, a nkpwaté mekôn asu ba be ne asu nkpwaté mekôn!

¹² Ma ye futi nduan e menda bezambe y'Ejipte; Nébukatnétzar a ye di'i be. A ye kee bengunemelane minkôm, a ye vut Ejipte nyô avale mba'ale mintômba a vute ngômesane jé nyô, a a ye kôlô valé e *mvo'é été.

¹³ A ye bu'u mekôn me ne mendeme bengunemelan ya Bét-Kemék e si y'Ejipte, a a ye di'i menda bezambe y'Ejipte nduan.