YEREMIA 42 - Kalate Zambe Nnomo a Mfefe Mfefé NkôñelanYérémi a tebe Beyude ba kômbô k'Ejipte ngame yat ( Sam 78:34-37 ; Yer 43:1-7 ; 44 ; Eza 30:15-16 ) 1 Bivete bise ya nkane bita: Yôhanañ e mone Karéa, Yezania e mone Hôkaya a bôte bese y'ayoñ, ataté nyô a ne tyôtyoé a kui nyô a n'anen, be nga zu 2 a jô Yérémi na: Nja'ane wongan ô tame kui asu dôé; ye'ela'ane Nti, e Zambe wôé, ajô dangan a asu *mebuka'a ma. Amu bi nga too abui, éyoñe ji bi li'iya ôyôm abim avale mise môé me lôô de. 3 Nti, e Zambe wôé, a liti'i bia zene bia yiane tôñ, a jam bia yiane bo! 4 Nkulu mejô Yérémi a nga jô be na: Ma wôk, mi lôô ma zu ye'elane Nti, e Zambe wônan ane mejô menan me né; a ma ye liti mia ajô ese Nti a ye yalane mia, teke solé mia jam éziñ. 5 Be nga jô Yérémi na: Nti a bo'o bebela a *zôsôô ngaa a tele bia ngame yat, nge bia bo te bo ajô ese Nti e Zambe wôé a ye lôme wo asu dangan! 6 To'o mvaé ng'abé, bia ye ve tyiñe Nti, e Zambe wongan, mfa'a biabebien bia lôme wo mewôk: nalé bia ye vak amu mveane tyiñe Nti, e Zambe wongane mewôk. 7 Mvuse melu awôm, ajô Nti e nga yené be Yérémi. 8 Nde Yérémi a nga loone Yôhanañ, e mone Kavéa, bivete bise ya nkane bita bi mbe nsamba wé, a bôte bese y'ayoñ, ataté nyô a dañe tyôtyoé, a kui nyô a dañ anen. 9 A nga jô be na: Avale di Nti, e Zambe Israél, mfa'a mi nga lôme ma me bo na nja'ane wônan ô kui asu dé na: 10 nge mia ke ôsu a tabe si jenane nyô, ma ye yemete mia été, a ma ye bo te tyame mia, ma ye bé mia, a bo teke té mia si; amu ma jôban *abé me nga bo mia. 11 Te koone njô bôte ya Babilône woñ, nyô mia ko woñ asu dé, te koone nye woñ, nalé Nti a jô. Amu me ne be mia, asu ya nyii a kôté mia e wo wé. 12 Ma ye liti mia *mvam a a ye ko mia éngôngo, a ye bo na mi beta bulane si jenan. 13 Ve nge mia jô na: Bia ye bo te tabe *si nyô! Nge mia bo te wô'ô tyiñe Nti e Zambe wônan, 14 a nge mia jô na: Momo, bia ye ke Ejipte vôme bidi bia ye bo te jemban a nne bia ye tabe wé, 15 wôna wô'ane ñhe ajô Nti, mia, *mebuka'a me Yuda! Avale di Nti ya *minsamba mewosan, e Zambe Israél a jô na: Nge mia tyi'i na mia k'Ejipte, nge mia ke tabe wé, 16 nkpwaté mekôn mia mate wo ye koone mia wé, si y'Ejipte, mfumbale zaé, jame da tyelé mia minleme yôp, a ye kabetane mia wé, si y'Ejipte, nne mia ye wu wé. 17 Ba bese ba ye tyi'i na ba k'Ejipte na ba tabe wé, ba ye wu a nkpwaté mekôn, mfumbale zaé nge bim, e mbe ba ye bo na, bi zu be be. 18 Amu avale di Nti ya *minsamba mewosan, e Zambe Israél a jô na: Aval ayaa, a ayo'o dam bi nga sôéban e be bôte ya Yérusalém, avale te ayaa dam da ye sôébane be mia, nge mia k'Ejipte; mia ye bo jôme biyo'é, melunga, ébiasé a ôsame. A mia ye bo te beta yene vôme nyô. 19 A *mebuka'a ya Yuda e jame Nti a jô mia nde di: te kean Ejipte! Tuka'a yemane de: ma vu mia de soñe den. 20 Mia du'u miabebien, amu mi nga lôme ma be Nti, e Zambe wônan, mi jô'ô na: Ye'ela'ane Nti, e Zambe wongan asu dangan, a jam ese Nti, e Zambe wongan, a ye jô, kate bia de a bia ye de bo. 21 Me kateya mia de môse wu; ve mi nji wô'ô tyiñe Nti, e Zambe wônan, nge vô'ôlô jam ese a nga ve ma na me kate mia. 22 Tuka'a yemane de éyoñe ji: mia ye wu nkpwaté mekôn, mfumbale zaé nge bim e vôme mia ke na, mi tabe. |
Bible en langue Bulu © L'Alliance Biblique du Cameroun, 2007, 2015.
Bible Society of Cameroon