YEREMIA 41 - Kalate Zambe Nnomo a Mfefe Mfefé Nkôñelan

Ba wôé Gedalia

¹ E ngone zamgbwale, Ismaél e mone Nétania, ndaé Elikama môte ya mvoñe bejô bôt, wua ya biwôlô bebo bisaé be njô bôt, a nga zu be Gedalia, e mone Ahikam, e Mispa a bôte befe awôm; bese be nga di vôme wua Mispa.

² Nde Ismaél e mone Netania a nga kôlô si baa be bôt awôme ba a wôé Gedalia e mone Ahikam ndaé Safan a nkpwaté mekôn. Ajô te be nga wôé môte njô bôte ya Babilôn a nga telé njôô Yuda.

³ Ismaél a nga wôé fe Beyude bese be nga too fefele Gedalia e Mispa, nalé fe Bekaldééñ be mbe bôte mewosan be nga too valé.

⁴ Alu baa, mvuse ñwôane Gedalia, môt a ngenane te yeme jam éziñ,

⁵ bôte mewôme muam be nga so Sikem, Silô a Samari, zele ntyeñan, a mengômesane nyaban a mimba'a nyô; be nga bili mimveane ya mefub a ôlobinda e mo na, be liti bie Nda Nti.

⁶ Nde Ismaél e mone Nétania a nga ke tôbane be; a mbe a wulu'u, a yônôk, éyoñ a kuiya vôm be mbe, a nga jô be na: Za'ane be Gedalia e mone Ahikam.

⁷ V'éyoñe be nga kui ézezañe tison, Ismaél e mone Nétania a nga wôé be, a wua be ébé mendim, bôte baa be be be mbe nsamba be nga volô nye.

⁸ Ve bôt awôme y'été be nga jô Ismaél na: Te bo na bi wu amu bi bili menga'aban nsolan e mefup: fôn a nlisi, mbon a wôé. Ajô te a nga jô'é ôsimesane ya wôé be baa be bobenyañe bap.

⁹ Ebé mendime Ismaél a nga wua mimbime mi bôte bese a nga wôé fefele Gedalia é ne ji njô bôt Asa a nga bo, amu Baéka njô bôte y'Israél; nje Ismaél, e mone Nétania a nga jalé mimbim.

¹⁰ Ismaél a nga kee *mebuka'a me bôte mese y'ayoñ me mbe Mispa minkôm: bengon be njô bôt a ba bese ya bôt be mbe Mispa, mbe Nébuzaradañ, évete bezimbi, a nga kee Gedalia e mone Ahikam; Ismaél, e mone Nétania a nga kee be minkôm a a nga bulane ke koone bone b'Amon.

¹¹ Yôhanañ, e mone Kavéa, a bivete bise ya nkane bita baa be be be mbe nsamba, be nga wô'ôtan *abé ese Ismaél e mone Nétania a nga bo.

¹² Nde be nga nyoñe bôte bese a ke wosane Ismaél e mone Nétania. Be nga koone nye e beta mendim me ne Gabaoñ.

¹³ Eyoñe bôte bese baa be Ismaél be mbe nsamba be nga yene Yôhanañ, e mone Kavéa, ba be bivete ya nkane bita nsamba, ane be nga vak;

¹⁴ a bôte bese Ismaél a nga kee be minkôm be so'o Mispa be nga bulane mvus, be nga kôñelan a zu late Yôhanañ e mone Kavéa.

¹⁵ Ve Ismaél e mone Nétania a nga tup a bôte muam asu Yôhanañ a ke be bone b'Amon.

¹⁶ Yôhanañ, e mone Kavéa, a bivete bise ya nkane bita baa be be be mbe nsamba, be nga nyoñe *mebuka'a me bôte be nga so me Mispa, be Ismaél, e mone Nétania a nga wôé Gedalia, e mone Ahikam, me too ana: Bôte mewosan, binga, *bon a bemiak, a nga soo be Gabaoñ.

¹⁷ Be nga wulu a tebe *nda beyeñ é ne Kimham, bebé Bétléhém asu ya su'ulane ke Ejipte

¹⁸ ôyap a Bekaldééñ be mbe be koo woñ, amu Ismaél, e mone Nétania a nga wôé Gedalia e mone Ahikam nye njô bôte ya Babilôn a nga telé ngovina ya Yuda.