YEREMIA 4 - Kalate Zambe Nnomo a Mfefe Mfefé Nkôñelan

Tyi'ibane metyele ya minleme mienan

¹ A Israél nge wo bulan, nge wo bulane be ma, nalé Nti a jô, nge wo vaa b'angôndô be mame bôé e vôm me né, nge wo bo te beta ndeñendeñ,

² nge wo kane ngana na: Nti a vee, e bebela été, e nya njôan été, e *zôsôô été, éyoñe te meyoñe bikuu ma ye nyoñe bibotane be nye, a ma ye wume be nye.

³ Amu avale di nde Nti a jô bôte ya Yuda a Yérusalém na: liane mfefé afup, ve te béane bidi e biyo été.

⁴ Tyi'ibane metye asu Nti, tyi'ibane metyele ya minleme mienan, a bôte ya Yuda a ba be too Yérusalém, ayaa dam e za kalan ane nduan, e za yôñé ane nkaba'a nduan, bôt be too te nguleya dime wô, amu *nkpwala ya mimboone mienan.

Kpwatôla besiñe y'akôé

⁵ Katane foé nyô e Yuda, bo'one na é wô'é e Yérusalém, koba'ane de! loñane toñ e si jenan! Yôta'ane metyiñe ngu a jô na: sula'an a nkean e bitison bi bili alem!

⁶ Beta'ane nyungu mfa'a ya Sioñ, mata'an, te teban! Amu ma soo bidim a beta éndaman mfa'a y'akôé

⁷ Ngbwengbwem é sembeya, é kôlô'ô vôm ja bôô, ntyame *meyoñ me bôt a tatéya dulu, a so jale dé, amu na a zuu bidim e si jôé; bitisone biôé bia ye bo bilik; bôte ba tab'été ba ye bo momo.

⁸ Ajô te jaane minkuta ane kandé, jaane meyep a yôn; amu ayaa Nti e n'ayôñ e nji sa'ale bia.

⁹ Môs ôte, nalé Nti a jô, ayo'o nleme njô bôt a biwôlô bebo bisaé bié da ye man. Betuni ba ye ko woñ, a bekulu mejô ba ye tebe fe'e ne vema.

¹⁰ Nde me nga jô na: A Zambe nyô a ne Nti, ô nga tu'a fo'o du'u bôte ba a Yérusalém, vôm ô nga jô be na: Mia ye tabe *mvo'é! Ve da nkpwaté mekôn wo jii a kui zoñe *nlem.

¹¹ Melu mete, ba ye jô bôte bete a Yérusalém na: évuñulu ja di'i ja vuñ, e mebôbône minkôle ya *nkôte si, e zene ngone y'ayoñe bôte dam, saake asu ya se'ese nge tya'a mvoñ.

¹² Evuñulu te é ne ngu, ja so wé a kui be ma. Eyoñe ji bia be be bia ye kobô ajô ntyi'ane mejô.

¹³ Nye le a bet ane minkut! Bevagoñe bé be ne an'ôlende, bikabela bié bi n'éveves a dañe bendôé. Ngo'o bia, amu bi jañeya!

¹⁴ Sôbe nleme wôé mfa'a y'abé a Yérusalém, nalé wo ye nyiiban! Mbia minsimesan mia ye tabe be wo a kui éyoñ évé'

¹⁵ Amu zô'é ja bo, ataté Dañ, ja kate foé bidim, ja mialane je ataté minkôle mi Efrayim.

¹⁶ Wômôlô'ô jame di e be meyoñe bikuu, bo'one na be yeme de Yérusalém, nsamba nkpwatôla wo so si é n'ôyap, tyiñe jap ja wosane bitisone ya Yuda.

¹⁷ Ba bômane Yérusalém, ane ba ba ba'ale afup, amu a nga bene njôane wom, nalé Nti a jô.

¹⁸ Asu'ulane ya mboone wôé a ntabane wôé nde le, *nkpwala wôé ñwô le; nalé a ne fo'o ayô, a jame te da tulan a kui *nlem.

Yérémi a kon amu mbia jam a ye kui

¹⁹ Abum da bo'o ma! Minkañe mise ya nleme wome fe mia taé! Nlem wo kumetane ma, me se nguleya tab'évô; amu wo wôk, a *nlem, tyiñe toñ, zô'é bita.

²⁰ Endaman ja tôñ éndaman, nalé foé ja kateban; amu si ése é maneya ndaman. Menda bindelé mam me maneya tyamé atemetem, avale da te bitaba'a bindelé biam bi keya éyoñe jijia.

²¹ Ma ye yene nyungu a kui éyoñ évé, a wô'ô fe tyiñe toñ'

²² Yaa, e bôte bam be ne mekut, be ne teke yeme ma; Be ne *bon be ne teke fas, atyeñ da jeñebane be; be ne fek v'asu ya bo *abé, ve be ne te yeme bo mvaé

²³ Me fombôya si a yene na é ne ne zametazametan, a teke jôm été; me fombôya fe yôp, a yene na éfufube jé é nji beta bo.

²⁴ Me fombôya beta minkô, a yene na be maneya bulekan, a bone minkôle bese ba ndeñetan.

²⁵ Me fombôya a yene na, môt a nji fe bo; a anon ese ya yôb e maneya tup.

²⁶ Me fombôya: si é mbe afube bilé bia wume bibuma é ntoo *nkôté si a bitisone bié bise bi maneya di'iban a mboone awu ayôñe ya ayaa dé.

²⁷ Amu avale di nde Nti a jô na: si jenan ése ja ye bo ndaman; ve ma ye bo te mane jiane je ése,

²⁸ amu nalé, si é ne meyeb été, a minkute ya yôp mi maneya vin; amu me jôya de a ôsimesane viame le, a me nji ke jôban de.

²⁹ Tison ése ja tup, a éduñe bewulu bikabela, a bewua bilaé; bôt ba nyiine bisaé si, bevok ba bete mekôme yôp; tison ése é ntoo bilik, môt a nji fe bo été.

³⁰ Ve wo, éyoñ ô ntoo ndamane ji wo ye bo aya' Ye wo ye jalé womien évele ngômesan, a jaé biôm bi ne mboon a or, ye wo ndamé mise môé a meyañ' Wo bo nyanga e zezé; bibone biôé bia biasé wo. Ba jeñ ényiñe jôé.

³¹ Amu ma wô'ô miñyôn ane mi minga a kô'ôlô mie, miñyône biyebe ane mi ya abiaé ôsu. Tyiñe ngone Sioñ nje le; ja vebe abuk, a same mo na: za éngôngole me ne di, me kuya e mo bewôé bôt été.