YEREMIA 39 - Kalate Zambe Nnomo a Mfefe Mfefé Nkôñelan

Yérusalém a nyoñeban

¹ Ngon awômô ya mbu ébulu Sédékias njô bôte ya Yuda a nga jôô, ñwô Nébukatnétzar njô bôte ya Babilôn a nga so a nkane bita wé ôse asu Yérusalém, a dili nye bita.

² Ngone nyini é too melu ébu ya mbu awôm a wua, Sédékias njô bôte ya Yuda a nga jôô, ñwô beta nsalan a nga bobane tisone Yérusalém.

³ Eyoñe te bivete bi njô bôte ya Babilôn bi nga zu a bômane *mbé y'ézezañ bi too môé na: Nergal-Saretser, Samgar-Nebou, Sarsekim évete bemiak, Nergal-Saretser évete beyememam a bivete bi njô bôte ya Babilôn bivo'o bise.

⁴ Nné ane Sédékias njô bôte ya Yuda a bôte mewosan bese be nga yene be, be nga tup, a kôlô tison alu be tyi'i *zen afube njô bôt, *mbé ô ne zañe mimfine mibaé, a be nga kuu zene y'Araba.

⁵ Ve nkane bita Bekaldééñ ô nga tôñe be a koone Sédékias nje'ese Yérikô. Be nga nyoñe nye, a bete nye be Nébukatnétzar, njô bôte ya Babilôn e Ribla e si Hamat a nye a nga tyi'i ajô dé.

⁶ Njô bôte ya Babilôn a nga wôé bone be Sédékias Ribla émien a lôô. Njô bôte ya Babilôn a nga wôé fe benya bôte bese ya Yuda.

⁷ Wôna a nga bo na be tube Sédékias mis, a bo na be ka'a nye a bibom bi mvot, asu ya kee nye Babilôn.

⁸ Bekaldééñ be nga di'i *nda njô bôt a nduan a menda me bôte y'ayoñ, wôna be nga kpwé fe mimfine ya Yérusalém.

⁹ Mfa'a *mebuka'a me bôt me nga too tison, ba be nga kee bebiene be nye, a *mebuka'a me bôt me nga li'i, Nébuzaradañ, évete beba'ale, é nga kee be minkôm.

¹⁰ Ve mimbubua mi bôte y'ayoñ, ba be mbe teke'e jôm, Nébuzaradañ évete beba'ale, a nga ve be nguleya li'i be too si ya Yuda a a nga ve be mindi'i mi woon a mefube *môs ôte.

¹¹ Nébukatnétzar, njô bôte ya Babilôn, a nga ve abendé di ajô Yérémi be Nébuzaradañ évete bezimbi na:

¹² nyoñe nye a fombô nye, te bo nye jam éziñ e n'abé, ve bo'o nye aval'a ye wo jô.

¹³ Nébuzaradañ évete bezimbi, Nébukazbañ évete bemiak, Nergal-Saretser évete beyememam a bivete bi njô bôte ya Babilôn bise,

¹⁴ be nga lôme bôte na be nyoñe Yérémi nseñe beba'ale mimbôk a kalane nye be Gedalia e mone Ahikam, ndaé Safan, na a kee nye *nda jé. A a nga tabe ézezañe bôte y'ayoñ.

Ebéd-Mélék a nyiiban

¹⁵ Ajô Nti e nga litibane be Yérémi nté a nga too mbôk nseñe beba'ale mimbô'ô na:

¹⁶ kelek a kobô Ebéd-Mélék, môte y'Etiôpi, a jô nye na: Avale di Nti ya *minsamba mewosan, e Zambe Israél a jô na: Ô lôô, ma ye zuu jam me nga kobô ajô tisone nyô, asu bidim, saake asu mvaé; jame te da ye kui *môs ôte mise môé me lôô.

¹⁷ Ve *môs ôte ma ye nyii wo nalé Nti a jô, a wo ye bo te keeban e mo me bôte wo ko woñ.

¹⁸ Ma ye bo na ô tup, a wo ye bo te ku a nkpwaté mekôn; ényiñe jôé ja ye bo jôme jôé ya nsa, amu ô nga tabe ma ndi, nalé Nti a jô.