YEREMIA 30 - Kalate Zambe Nnomo a Mfefe Mfefé Nkôñelan

Nsoone minkôm

¹ Ajô e nga litibane be Yérémi e so'o be Nti na:

² avale di nde Nti, e Zambe Israél, a jô na: Tili'i mejô mese ma te jô wo e kalat'éziñ été.

³ Tame yen melu ma zu, nalé Nti a jô, ma ye beta soo minkôme y'ayoñ Israél dam a Yuda, nalé Nti a jô; ma ye beta zuu be si me nga ve b'ésaa a ba ye nyoñe je.

⁴ Mejô Nti a nga kobô ajô Israél a Yuda mme ma:

⁵ avale di Nti a jô na: Bia wô'ô biduñ bi nzameta'an, woñ ñwô ô né, sa ke *mvo'é.

⁶ Nyoñane mefoé a fomba'an nge nnôme jôm a biaé! Amu jé me yeneya befam bese mo bibôk aval'ane minga a kô'ôlô mie' Amu jé mesu mese me ntoo ñyelekan'

⁷ Bidim! Amu *môs ôte ô n'anen, ôfe ô nji funane wuli. Eyoñe te é ne ji biyebe asu Yakob; v'a ye nyiiban.

⁸ Môs ôte, nalé Nti ya *minsamba mewosan a jô, ma ye bu'u ébôñeté jôé é ne wo *tyiñ, ma ye té mengata'a môé, a bikuu bia ye bo te beta tibili wo ane *ôlo.

⁹ Ba ye saane Nti, e Zambe wop, a David, njô bôte wob ma ye ve be.

¹⁰ Mfa'a wôé, Yakob, mbo ésaé wom, te ko woñ, nalé Nti a jô, te nyeñemban, a Israél! Amu ô lôô: ma nyii wo e si é n'ôyap, a nyii mvoñe bôte jôé e si ô ne minkôm; Yakob a ye beta so, a ye bi awo'on a évôvoé, teke môt a ye ndeñele nye.

¹¹ Amu me ne be wo, nalé Nti a jô asu ya nyii wo; ma ye jiane *meyoñ mese vôm me nga mane mialane mia, ve ma ye bo teke jiane wo; ma ye lebe wo ane metiñ me né, teke suu wo ô too te bijô.

Meveñ a ñyetan

¹² Avale di Nti a jô na: ntyamane wôé ô ne te k'ayeté fôle jôé é ne mintaé.

¹³ Te ke môt a vañ ajô dôé, asu ya tiñeti fôle jôé; biañ é ne ngu é nji bo asu dôé;

¹⁴ ba bese be mbe be nyeke'e wo ba ye vuane wo, te fe beta jeñe wo; amu me nga bibi wo avale nsiñ a bibi, me nga ve wo *melep mveane njet, amu ézu'u bikobe jôé, a anene ya *abé dôé.

¹⁵ Amu jé wo tat amu ntyambane wôé, amu mintaé miôé mi ne tek'ayeté' Amu ézu'u ya bikobe biôé, a anene ya *abé dôé, nde me nga bo wo nalé.

¹⁶ Ajô te nde bôte bese ba mine wo ba ye mineban a besiñe bôé bese, be bese ba ye ke minkôm, ba ba ndamane wo biôm, ba ye fe ndamane biôme biap, ma ye suu ba bese ba sa wo na be saaban.

¹⁷ Amu ma ye beta telé wo, ma ye yete mefôle môé, nalé Nti a jô, mbôlô ba loone wo na bebene, ve ke ô too jôé na Siôñ, nye môt éziñ a nji bômbô évévé ajô dé,

¹⁸ Nti a jô avale di na: Ô lôô ma beta zuu minkôme menda bindelé me Yakob, ma ko bitaba'a bié éngôngo; tison ja ye beta lôñeban bili'i bié été. Nda njô bôt ja ye beta lôñeban e vôm a n'éñwé.

¹⁹ Ekaña'a ja ye yiaban ézezañe jap, a tyiñe ba ba vak ja ye wô'é. Ma ye bo be na be fôé, a ba ye bo te nyolan; ma ye ve be duma, a ba ye bo te silibane si.

²⁰ Bone bé ba ye bo ane melu mvus, ékôane bôte jé ja ye tabe ôsu viam, ma ye wosane ba bese ba tibili be.

²¹ Evete jé ja ye so abume dam été, nyô a jôô nye a ye so b'émien: ma ye bo na a zu bebé, a a ye subu be né, amu na, za a ne nyô a ye kee nleme wé ôbien asu ya subu ma bebé' Nalé Nti a jô.

²² Mia ye bo bôte bam, a ma ma ye bo Zambe wônan.

²³ Mi lôô ôkôse Nti, ayaa Nti e tôtaneya nkulu a zu vuñe ngu, a tyiñelan ôlende e minlô bebo *abé.

²⁴ Ayôñ ayaa Nti da ye bo te bulane mvus, akekui e jaléya, e boya asimesane ya nleme wé. Mvus ayab éyoñ, mia ye bi fe'e y'été.