YEREMIA 26 - Kalate Zambe Nnomo a Mfefe Mfefé Nkôñelan

Nkulan mejô wo liti ntyamane Yérusalém a Nda Zambe

¹ Melu Yôyakim, e mone Yôzias, njô bôte ya Yuda a nga taté jôô, ajô e nga litiban e so'o be Nti na:

² Avale di Nti a jô na: Tebe'e nseñe ya Nda Nti, a jô'ô ba bese ba zu kute meboñe Nda Nti, be so'o bitisone bise ya Yuda mejô mese ma bendé wo na ô jô be: te vaa ajô da y'été.

³ Ndô'ôtô ba ye vô'ôlô a bulan, môt ase, mbia zene wop; éyoñe te ma ye jôban *abé me nga simesane na ma bo be, amu évô ya mimboone miap.

⁴ Wo ye jô be na: Avale di Nti a jô na: Nge mia bo te wô'ô ma, asu ya wulu ane metiñe mam me nga telé ôsu vienan me né,

⁵ asu ya vô'ôlô mejô bebo bisaé bam bekulu mejô, mbe ma lôme mia, mbe me nga lôme wo ataté mametyé, a mbe mi nji vô'ôlô,

⁶ éyoñe te ma ye bo Nda nyô ane Silô, a ma ye bo tisone nyô jôme biyo'é asu *meyoñ mese ya *si nyô.

Yérémi a tele mfôm awu

⁷ Betuni, bekulu mejô, a bôte bese be nga wôk ane Yérémi a tote mejô mete Nda Nti,

⁸ a Yérémi a ngenan a sondô'ô jô mam mese Nti a nga bendé nye na a jô bôte bese, nde betuni, bekulu mejô a bôte bese be nga bi nye be jô'ô na: A yiane wu! A yiane wu!

⁹ Amu jé wo kulu mejô a jôé Nti ô jô'ô na: Nda nyô ja ye bo ane Silô, a tisone nyô ja ye bo bilik teke fe bôt? Ane bôte bese be nga bômane Yérémi beta nsamba e Nda Nti.

¹⁰ Eyoñe bivete ya Yuda bi nga wô'ô mam mete, nde be nga kôlô *nda njô bôt a ke Nda Nti a tabe anyiine mfefé *mbé ya *nda Nti.

¹¹ Nde betuni a bekulu mejô be nga kobô bivet a bôt bese na: Ba yiane tyi'i môte nyôna nlô! Amu a maneya kulu mejô ma wosane tisone nyô, avale miabebien mia te wôk a melo menan mebien.

¹² Ane Yérémi a nga jô bivet a bôte bese na: Nti a te lôme ma na me kulu mejô ma wosane Nda nyô a tisone nyô, mejô mese mia te wôk.

¹³ Ajô t'éyoñe ji kômane mezene menan a mimboone mienan, wô'ane tyiñe Nti, e Zambe wônan, a Nti a ye jôban *abé a maneya kobô na, a bo mia.

¹⁴ Mfa'a wom, ma nyô me ne mo menan été; bo'one ma jam mia ye yene mvaé a *zôsôô e mise menan.

¹⁵ Ve da, tuka'a yemane na, nge mia wôé ma, mia beté miabebien mbe'e ya metyi me ne te bijô, mia, tisone nyô a bôte be too été; amu Nti a nga lôme fo'o ma be mia na me tote mejô ma e melo menan.

Yérémi a nyiiban

¹⁶ Bivet, a bôte bese, be nga jô betuni a bekulu mejô na: Awu momo be môte nyô! Amu a maneya kobô bia a jôé Nti e Zambe wongan.

¹⁷ Bemvendé b'éziñe ya si be nga tebe a jô ékôane bôte na:

¹⁸ Miké ya Morését a nga kulu mejô melu Ezékias njô bôte ya Yuda, a mbe a jô'ô bôte bese ya Yuda na: avale di Nti ya *minsamba mewosan a jô na: Siôn a ye fa'aban an'afup, Yérusalém a ye bo avise *mekok, a nkôle ya Nda Zambe wo ye bo vôm a ne mbetane yôp njalan a afan.

¹⁹ Ye Ezékias, njô bôte ya Yuda a Yuda ase, be nga yene na a yiane wu? Ye Ezékias a nji ko Nti woñ? Ye a nji ye'elane Nti? Eyoñe te Nti a nga jôban *abé a nga tote na a ye bo be. Ve bia bi ne bo biabebien avale beta mbia *abé di aya!

²⁰ Môte mfe a nga kulu fe mejô a jôé Nti jôé na: Uriya, e mone Semaya ya Kiryat-Yearim. A nga kulu mejô ma wosane tisone nyô a si jangan mejô me funa'ane ma me Yérémi.

²¹ Ane njô bôte Yôyakim, biwôlô bi bôte bié a bivete bié bise be nga wô'ô mejô mete, a njô bôt a nga jeñe na a wôé nye. Eyoñe Uriya a wô'ôya jame di, a nga ko woñ, ve tup a ke Ejipte.

²² Nde njô bôte Yôyakim a nga lôme bôt Ejipte be too na: Elnatañ, e mone Akbor a bôte befe baa be nye.

²³ Ane be nga vaa Uriya Ejipte a kee nye be Yôyakim njô bôt, nye ve wôé nye a nkpwaté mekôn a wua mbime wé e mesoñ ya bôte y'ayoñ.

²⁴ Ve da na, Ahikam e mone Safan, a nga kamane Yérémi, a bo na a bo te veban e mo me bôte na be wôé nye.