YEREMIA 24 - Kalate Zambe Nnomo a Mfefe Mfefé Nkôñelan

Minkoé mi fig mibaé a ényiñ ajô melu ma zu

¹ Ane Nti a nga liti ma minkoé mi fig mibaé mi bete Nda Zambe Nti ôsu, valé Nébukatnétzar, njô bôte ya Babilôn a maneya kee Yékônia mone Yôyakim njô bôte ya Yuda minkôme Babilôn a soo nye Yérusalém, nalé fe beta bivete ya Yuda, bebuti mendile me *nda a befuti mengôñ.

² Nkoé wua ô nga bili étua abeñe befig, ane befig ba taté kolé, nkoé ôvok ô mbe ô bili étua *abé, befig be mbe te nguleya di amu be nga dañ *abé.

³ Nde Nti a nga jô me na: A Yérémi ô lôô jé? Me nga yalane na: Befig. Mbamba befig be ne étua mvaé a ba be n'abé be ne étua *abé a be se nguleya diban amu be n'étua *abé.

⁴ Ajô Nti e nga zu be ma na:

⁵ Nti, e Zambe Israél, a kobô avale di na: Avale da boban mfa'a mbamba befig ba, avale te ma ye fombô a mbamba be mis bekee minkôme ya Yuda me nga lôme si Bekaldééñ, be so'o vôme nyô.

⁶ Ma ye fombô be mbaa be mis, a ma ye bo be na be beta bulane si nyô; ma ye lôñe be. Te ke be beta tyam; ma ye bé be teke be beta té.

⁷ Ma ye ve be minlem mia yeme na me ne Nti. Ba ye bo bôte bam, a ma ye bo Zambe wop, nge ba ye bulane be ma a nleme wob ôse.

⁸ Avale da fe mfa'a befig be n'abé te nguleya diban amu étua *abé, amu avale di Nti a jô na: Avale te ma ye bo Sédékias, njô bôte ya Yuda, beta bebo bisaé bé a *mebuka'a me bôt me ne Yérusalém, ba be nga li'i e si jenane nyô, a ba be too si y'Ejipte.

⁹ Ma ye bo be jôm ékowoñ, jôm bidim asu bijôé bise ya si bôt be too nyô, jôm ôsame, jôm ékpwe'ele, éwovioé a biyo'é e mevôm mese ma ye litane be.

¹⁰ Ma ye lôme be nkpwaté mekôn, mfumbale zaé a bim akekui be maneya jañe si me nga ve be a b'ésaa bap.