YEREMIA 22 - Kalate Zambe Nnomo a Mfefe Mfefé Nkôñelan

Nti a ne ndaa njô bôte ya Yuda ngame yat

¹ Avale di Nti a jô na: Kele *nda njô bôt a nee Yuda a kobô ajô dina wé;

² wo ye jô na: Wô'ô ajô Nti a jô wo njô bôte ya Yuda ô too éto njôane David, wo, bebo bisaé bôé, a ayoñe bôte dôé, mia mia nyiin e mimbé mi!

³ Avale di Nti a kobô na: Bo'one *zôsôô a tyi'i mejô ane da yian; kôta'ane nyô ba diane nye e mo me ntibili bôt; te kpwe'elane *ntabe, monenyui a nkuse minga; te boon évô, a te kulane metyi me ne te bijô e vôme nyô.

⁴ Amu nge mia bo fo'o ane nkobô wuna ô né, wôna bejô bôte be too éto njôane David ba ye nyiin e mimbé ya *nda nyô be bete bevagoñ a bikabela, be, bebo bisaé bap a ayoñe bôt.

⁵ Ve nge mia bo te vô'ôlô mejô mete, ma kane mamiene ngana, nalé Nti a jô na, *nda nyô ja ye bo bilik.

⁶ Amu avale di Nti a jô *nda njô bôt a nee Yuda na: Ô ne ane Galad mfa'a wom, an'abôbône nkôle Libañ; v'e ne bebela na ma ye bo wo bilik, tison é ne teke bôt.

⁷ Me tobeya betyam be wosane wo, môt ase a mengale mé. Ba ye tyi'i bilé bi sédre biôé bia dañ abeñ a wua bie e nduan.

⁸ Jama *meyoñ a ye lôte bebé tisone nyô, a jô dina e be di avo'o na: amu jé Nti a nga bo beta tisone nyô ana'

⁹ Eyalan ja ye bo na: amu be nga li'i élate Nti, e Zambe wop, Amu be nga kute bezambe befe meboñe si a kañe be.

¹⁰ Te yônane nyô a ne ñwuan, nge sañelan amu ajô dé; ve yônan, yônane nyô a ke minkôm, amu a ye bo te beta so, a ye bo te beta yene si a nga bialé.

¹¹ Amu avale di Nti a kobô ajô Salum, e mone Yôzias, njô bôte ya Yuda, nye a nga Jôô éjiane Yôzias, ésaa wé, a nye a nga kôlô vôme nyô, a a ye bo te beta zu été;

¹² v'a ye wu e vôme be nga kee nye minkôm, a a ye bo te beta yene si mi too nyô.

Ajô Yôyakim

¹³ Ngo'é môt a lôñe *nda jé a biasé'é nya ntyi'ane mejôô, a lôñe bitune menda bié ya yôp a biasé'é metiñ; nyô a bo na môte mbok a saane nye zezé, teke ve nye ma'ane mé;

¹⁴ nyô a jô na: Ma ye lôñe mamien anene *nda, bitune bi *nda bi too ndam, a tube bevundi été be bili sédre a ndubane bivele meyañ.

¹⁵ Ye wo jôô amu wo dañe nye'e sédre' Y'ésoo a mbe te di nge nyu' V'a nga ba'ale metiñ a nya ntyi'ane mejôô, ajô te mam mese me nga wulu nye mvo'é;

¹⁶ a mbe a kobô'ô ajô éngôngole môt a *nzôzoé, ajô te mam mese me nga wulu nye mvo'é; ye sa ñyemane ya yeme ma ñwô le' Nalé Nti a jô.

¹⁷ Ve mise môé a nleme wôé bi lôô fo'o ve mvaé jôé, asu ya kuli metyi me môt a ne te bijô, a asu ya belan étibela'a ja ko'o bôte bevok.

¹⁸ Ajô te Nti a jô avale di, ajô Yôyakim mone Yôzias, njô bôte ya Yuda na: ba ye bo te bo nye ésulan awu be jô'ô na: ngo'o mojañ! Ngo'o bekale bam! Ba ye bo te bo nye ésulan awu be jô'ô na: z'ajô di a Nti, z'ajô di a njô bôt!

¹⁹ Ejamembime jé ja ye bo ji éjakas, ba ye dutu nye si a wua nye mimbé ya Yérusalém atan.

Ôson a ôsame asu Yérusalém

²⁰ Betek e Libañ a yôtan! Va'a *tyiñ e Basañ! Yôta'an ô bet'abarime yôp! Amu ba bese be mbe be nyeke'e wo be ntoo ntyamban.

²¹ Me nga kobô wo éyoñe mam mese me mbe wo *mvo'é: nde ô mbe ô jô'ô na: Ma ye bo teke wô'ô wo. Fulu jôé, aso mongô, e nje le; ô nji wô'ô tyiñe jam.

²² Beba'ale mintômba bôé bese ba ye bo bidi bi évuñulu, a ba ba nye'e wo ba ye ke minkôm; éyoñe te ôsame a ôson bia ye bi wo, amu évô jôé ése.

²³ Wo ô too Libañe yôp, wo ô bili dumba'a e besédre été, abim avé wo ye tat éyoñe mintaé mia ye kui be wo, minyimelan ane mi minga a kô'ôlô mie!

²⁴ Ane me vee! Nalé Nti a jô, to'o Kôniahu, e mone Yôyakim, njô bôte ya Yuda, a nga ye bo élondo e mbo nnôme wom, me nga ye vaa wo.

²⁵ Ma ye kee wo e mo me ba ba jeñ ényiñe jôé, e mo me ba wo tyibelan ôsu viap, e mo me Nébukatnétzar, njô bôte ya Babilôn, e mo Bekaldééñ.

²⁶ Ma ye wua mia, wo a nyua a nga biaé wo, e si fe, nje mi nji bialé, a mia ye wu wé.

²⁷ Ve ba ye bo te bulan e si ba ye kômbô bulan;

²⁸ môt ate, kôniahu, a ne jé, ye mbôlane be'e ô ne te fe volô jôm, vie'e étek ñwô môt a nji fe kômbô' Amu jé be nga wua be, nye a bone bé, a wua be si be ne te yem'

²⁹ A si jam, si jam, wô'ô nkobô Nti!

³⁰ Avale di Nti a jô na: tila'ane môt ate ane nyô a ne teke *bon, ane môte mam me nji wulu mvo'ényiñe jé. Amu teke môt a ye kui e mvoñe bôte jé na a tab'éto njôane David, a jôô Yuda.