YEREMIA 21 - Kalate Zambe Nnomo a Mfefe Mfefé Nkôñelan

Nkulane mejô ane Nébukatnétzar a ye nyoñe Yérusalém

¹ Ajô e nga zu be Yérémi e so'o be Nti, éyoñe Sédékias, njô bôt, a nga lôme Pasur, mone Malkiya, e be nye a Sôfôni, e mone Maaséya, *ntuni na:

² sili'i Nti ajô dangan, amu Nébukatnétzar, njô bôte ya Babilôn, a bo bia bita, ndô'ôtô na Nti a ye bo bia aval a wô'ô zu a bo bitua bi mame bié bise, ndembene Nébukatnétzar a ye ke bia ôyap.

³ Ane Yérémi a nga yalane be na: Mia ye jô Sédékias na:

⁴ avale di Nti, e Zambe Israél a jô na: Tama yenan, ma zu vôône biôme mewosan mi bili mo menan a mbie mia wosane bie njô bôte ya Babilôn, a Bekaldééñ ba yandane mia e mimfin atan, a ma ye sôñe bie mfa'a ya tisone nyôna été.

⁵ A mamien ma ye wosane mia a akule wo e ne nsaman, a wo ô ne ngu, a ayo'o ese a ayaa ese, a beta ôlun ase.

⁶ Ma ye wôé bôte be too tisone nyô, bôt a betit: ba ye wu bim a n'angôndô.

⁷ Mvus éte, nalé Nti a jô, ma ye ve Sédékias, njô bôte ya Yuda, bebo bisaé bé, ayoñ a ba bese be too e tisone nyô mbe ba ye fame bim, bita a mfumbale zaé a nkpwaté mekôn, ma ye ve be e mo me Nébukatnétzar, njô bôte ya Babilôn, e mo besiñe bap, a e mo me ba ba jeñ ényiñe jap; a ye wôé be a meyo me nkpwaté mekôn, a ye bo te éngôngole mfa'a wop, teke ye'ele jôm a mvame momo.

⁸ Ve mfa'ayoñe bôte di, wo ye jô de na: Avale di Nti a jô na: Ô lôô ma telé ôsu viôé *zen ényiñ a nyô awu.

⁹ Môt a ye li'i tisone nyô, a ye wu a nkpwaté mekôn, mfumbale zaé a bim; ve nyô a ye kui atane na a kañese ndañane Bekaldééñ ba yandane mia, a ye nyiñ, a ényiñe jé ja ye bo jôme jé ya nsa.

¹⁰ Amu ma kôñelan asu dam e tisone nyô ngame yat asu ya bo *abé sa mvaé, nalé Nti a jô; tisone nyô ja ye ko'oban e mo me njô bôte ya Babilôn, nyô a ye di'i je a nduan.

¹¹ A wo ye jô ndaa njô bôte ya Yuda na: vô'ôla'an ajô Nti!

¹² A *nda bôte David! Avale di Nti a kobô na: tyi'ane mejô *zôsôô ataté mametyé, a vaa nyô ba diane nye e mo me ntibili bôt, ayaa dam e za tôtan ane nduan, a e za yôñé, môte ya dime de momo, amu évô ya mimboone mienan.

¹³ Ô lôô, me ne wo ngame yat, a wo ô too mbi'ili été, e akôme ya ñyanebe yôp, nalé Nti a jô, a mia mia jô na: za a ye sise a zu wosane bia' Za a ye nyiin e menda mangan'

¹⁴ Ma ye zu wosane mia an'ébuma ya mimboone mienan é né, nalé Nti a jô, ma ye bo'é nduan afane denan, nje ja ye mane di'i mbôma'ane wônan.