YEREMIA 2 - Kalate Zambe Nnomo a Mfefe Mfefé Nkôñelan

Israél a bene Zambe

¹ Nti a nga kobô me na:

² kelek a kobô'ô melo me bôte ya Yérusalém na: Avale di nde Nti a jô na: Ma simesane nye'an wôé éyoñ ô mbe ngone minga, nkabetan ô nga kabetane ma bi too *atiñ aluk, éyoñ ô mbe ô tôñe ma fé été, e vôm a ne nkôt.

³ Israél a mbe ntelan étyi asu Nti, a mbe *bembômô ya akum a nga bili; ba bese be nga di di be, be nga nyoñe mekua, a bidim bi nga kui be be, nalé Nti a jô.

⁴ Vô'ôla'an nkobô Nti, a mia *nda bôte Yakob, a mia menda me bôte mese y'ayoñ Israél!

⁵ Avale di nde Nti a jô na: ékotekot évé b'ésoo be nga yene be ma, nje be nga kee ma je ôyap, a ke lat a jôm é ne momo, a su'ulane bo bebiene momo'

⁶ Be nji sili na: Nti a ne vé, za a nga soo bia si y'Ejipte, za a nga wulu bia *nkôte si, e sii azizi'i bilé a bibé, si é n'ayet a nyôô nsisiñ awu, e si môt éziñ a ne te lôt, a vôme môt éziñ a nji tabe'

⁷ Me nga zuu mia e si é bili mefube bilé bia wume bibuma na mi di mvaé bibuma y'été; v'éyoñ mi soya, mi viane veñesane si jam jôm é ne te *mfuban, a bo ngabe si jam jôm é n'angôndô.

⁸ Betuni be nji sili na: Nti a ne vé' A beye'ele metiñ be nji yeme ma, beba'ale mintômba be nga bo ma bijabô, bekulu mejô be nga kulu mam a jôé Baal, a ke lat a ba be ne teke'e mvolan éziñ.

⁹ Amu ajô te me beteya bi mia ajô, nalé Nti a jô, me bili ajô a bendaé benan,

¹⁰ Kelane bikôte bi mañe ya Kitim a fomba'an! Lômane bekatefoé e Kédar, a tuka'ane yemelan, yenan nge jam afe da funane dili!

¹¹ Ye ayoñe bikul éziñ da tyendé bezambe bé, akôsa bo na be nji bo bezambe' Ve bôte bam be folaneya étôto'o jap, a jôm é ne teke mvolan éziñ!

¹² A yôp! Kuu avem amu jame te; nyeñeba'an a mane kôt, nalé Nti a jô.

¹³ Amu bôte bam be dimiya bo tañe biyoñ bibaé: be beneya ma, e ma me n'anjeñe vevea mendim, a ke fa'a bebiene bibé mendim, bibé bi ne ntuban, te nguleya ba'ale mendim.

Mintaé a ôlun

¹⁴ Ye Israél a ne *ôlo be nga kus nge na wu ô nga bialé e *nda' Amu jé a vebaneya e nsaane biôm'

¹⁵ Bitoñe bengbwengbwem bia bame nye, bia ve *tyiñ a futi melunga e si jé été; bôt be nji fe beta bo, e bitisone bié bi maneya di'iban.

¹⁶ Ja'ane bone be Nôf a Tafanés, be fe ba kendé wo abôbône nlô.

¹⁷ Ye nalé a nji kui be wo, amu ô nga bene Nti, e Zambe wôé, éyoñ ébien a nga wulu wo mbamba *zen'

¹⁸ Eyoñe ji, wo bo jé e zene y'Ejipte, asu ya ke nyu mendime ya beta ôsôé, wo bo jé e zene y'Asiri, asu ya ke nyu mendime y'ôsôé ô n'anen'

¹⁹ Nkpwala wôé ô tame lebe wo, a beyeñeyeñe bôé be tame liti wo njuk. Yemek a yene na jame te e n'abé a ôlune na, ô bene Nti e Zambe wôé, a bo te ko me woñ, nalé Nti ya *minsamba mewosan a jô.

Be amu bôé be ne bivôlevôla

²⁰ Me bu'uya ébôñeté jôé, a té mengata'a môé aso ayap, v'ô nga jô na: ma ye bo te beta bo bijabô; ve da a minga ébamba! Wo kute meboñe si e mone nkôl ase yôp, a él'ése é vee si.

²¹ Me nga bé wo ane mbamba ndi'i woon, ô too atôk da so mbamba mvoñ; v'ô nga yeme tyendé aya mfa'a wom' Mi ntoo éyoñe ji ve metô'ô me ndi'i woone bikuu.

²² Ja'an ô too ye sôbe womien a ékôn, ô bela'an abui sobô, ékobe jôé é nga ye k'ôsu a yené asu dam, nalé Zambe, nyô a ne Nti a jô.

²³ Ô ne yeme jô aya na: me nji ve mamiene mvin, me nji tôñe nkañane Bebaal' Fombô'ô ane wo wulu mbi'ili! Yeme jam ô nga bo! Wo funane ngale kamel, a mate li a li.

²⁴ Wo funane ngal éjakase y'afan, ny'a maneya yembane mevôm me ne teke bôt; ny'ate a ke a vee jôé mfep amu nkômban ô bili nye. Teke jôm é ne telé nye, amu ayoñe nkômban e bili nye. Beyôm ba jeñe nye be se nguleya tek, ba koone nye nné an'ayôñ da bi nye.

²⁵ Tabe'e ntyee a Israél! Amu éyoñe wo mate avôle nalé, wo ye balé womiene meveñe mebo, wo ye bo na éngoñ é bo wo nkôt! Ve wo yalane ma na: Te jañele éyoñ, ma nye'e bezambe bikuu ma ye lat a be!

²⁶ Avale ñwuwup wo wô'ôson, éyoñ be kulaneya wô, avale te ba ya *nda bôt Israél be wuya ôson: bebien, bejô bôte bap, biwôlô bebo bisaé biap, betuni bap a bekulu mejô bap.

²⁷ Mbe ba jô élé na: Ô n'ésaa wom! A jô f'ako'o na: Ô nga biaé ma! Amu be nga lume ma mvuse jap, saake asu dap. A éyoñe be ntoo bidim été, be me na: Kôlô'ô si, nyi'i bia!

²⁸ Bezambe ô nga bo, be ntoo ñhe vé' Be kôlô'ô ñhe si, nge be ne nguleya nyii wo éyoñe bidim! Amu abime bitison ô bili nde fe bezambe bôé be né, a Yuda!

Zambe a zu kee Yuda aba mejô

²⁹ Bia wo bia ye teb'aba mejô amu jé' Mia bese mi nga bene ma, nalé Nti a jô.

³⁰ Me nga bôme bone benan e zesé; be nji ke kômbô nyoñe nye'elan; nkpwaté mekône wônan ô nga wôé bekulu mejô benan, aval'ane ngbwengbwem ja jian.

³¹ A mia bôte ya miaé wu, wô'an ajô Nti! Ye me nga yené bilik e b'Israél, nge si é ne dibi' Amu jé bôte bam ba jô na: bi ne fili, bi nji kômbô beta bulane be wo!

³² Ye ngone minga ja vuane biôme bi nyanga bié, nge minga a lu'uban e kandé jé' Ve bôte bam be vuaneya ma aso melu me ne t'alañé.

³³ Wo dañe fek e dulu dôé été, asu ya jeñe nye'an! A éyoñe jijia te, ô veñesaneya mbia ntabane wôé a bo nye'elan.

³⁴ Metyi ya bingôngole bi bôt bi ne te bijô, mbie ô nji dilan bi bo'o jam éziñ, me ne a kui minwôndé ya ngômesane jôé.

³⁵ Ve mfa'a metyi mete mese, wo yalane na: yaa me nji bo bijô! Ayaa dé e kôlô'ô be ma! Ma nyô: ma zu kee wo aba mejô. Amu wo jô na: Me nji bo jôm.

³⁶ Eveves ja bo aya, ane wo tyendé bilat' V'Ejipte ja ye fe ve wo ôsone nyô an'Asiri e nga bo.

³⁷ Wo ye fe so wé, mo me bete nlô, amu Nti a wua ba wo tabe be ndi fé, a wo ye bo te yene mvaé be be.