YEREMIA 19 - Kalate Zambe Nnomo a Mfefe Mfefé NkôñelanMbôlane vie'ékon a ntyamane Yérusalém ( Yer 7:28-34 ; Ez 5) 1 Avale di nde Nti a nga kobô na: Kelek, kusuk nka'a ékon e be mmé meviek, nyoñe bemvendé y'ayoñ a bemvendé ya betuni. 2 Kele mfa'a ya mbi'ili Bén-Inom, ñwô ô n'anyiine ya *nda ba mé meviek; a valé nye wo ye yôtane mejô ma ye kate wo. 3 Wo ye jô na: Vô'ôla'an ajô Nti, a mia bejô bôte ya Yuda, nalé fe mia bôte be too Yérusalém! Avale di nde Nti ya *minsamba mewosan, e Zambe Israél a jô na: ma nyô, ma zuu bidim e vôme nyô a kui na, melo ma ye nyamelan be môt ase a wô'ô be kobô'ô de. 4 Amu be li'iya ma, be boya vôme nyô adimi; be di'iya bezambe befe ôtu, bezambe, mbe bete to'o bebien, to'o b'ésaa, to'o bejô bôte ya Yuda, be mbe te yem. A be jaléya metyi ya bôt be ne te bijô e vôme nyô; 5 be lôñeya Baal bito ya bikôndô'ô yôbe na be di'i nye bone babe nduan, ane *bityi'a bia di'ibane ngumba, e jam me nji ke bendé be, e jam me nji ke kobô, e jam e nji tame zu m'ôsimesan. 6 Ajô te, tame yen, melu ma zu, nalé Nti a jô, éyoñe vôme nyô a ye bo te beta lobane na Tôfét a mbi'ili Bén-Inom. Ve na: Mbi'ili awu. 7 Ma ye bo émo'o bebôndé mefe'e ya Yuda a Yérusalém momo e vôme nyô; ma ye bo na be ku a nkpwaté mekôn ôsu ya besiñe bap; wo ya ba ba jeñ ényiñe jap wo ye bo jame te; ma ye ve mimbime miab ane bidi e be anone ya yôp a betite ya fé. 8 Ma ye bo tison éte jôme ya bi ébu'anyu a mo, a jôm éwovioé; ba bese ba ye lôte je bebé, ba ye bo fe'e ne vema, a ba ye woé je, amu bibubua bié bise. 9 Ma ye bo na be di minsône mi bobefame bap, a minsône mi bobebinga bap; a ba ye di, môt ase, minsône mi môt a too nye bebé e jo'ojo'o été a ôlune été ya besiñe bap, mbe ba jeñ ényiñe jap. 10 Mvus éte, wo ye bôé nka'a ékon, mise me bôte mia be be mia ye ke me lôô, a wo ye jô be na: 11 avale di nde Nti ya minsamba mewosan a jô na: Avale di nde ma ye bôé ayoñe bôte di a tisone nyô, avale ba bôé nka'a mmé meviek, ñwô ô se nguleya beta kômban, a ba ye jame mimbim e Tôfét, amu njemban afôla ya jame mimbim vôme mfe. 12 Nalé ate ma ye bo vôme nyô, a bôte be too été, nalé Nti a jô, a ma ye bo tisone nyô ane Tôfét. 13 Menda ya Yérusalém a menda bejô bôte ya Yuda, ma ye bo mvin ane vôme ya Tôfét, avale te fe menda mese be mbe be diki'i ateté ese ya yôp ôtu a sôôé bezambe befe binyunyui e mendile mabe yôp ma ye bo mvin. Ba futi Yérémi mimbôk ( Yer 29:24-32 ) 14 Ane Yérémi a nga so Tôfet, vôme Nti a nga lôme nye na a ke kulu mejô. Wôna a nga tebe nseñe ya Nda Nti a jô bôte bese na: 15 avale di nde Nti ya *minsamba mewosan, e Zambe Israél a jô na: Mi lôô ma zuu bidim bise me nga jô bie e tisone nyô a e bitisone bise bi n'éjôé jé si, amu be nga bo metyiñe mabe ñyemelane na be bo te wô'ô mejô mam. |
Bible en langue Bulu © L'Alliance Biblique du Cameroun, 2007, 2015.
Bible Society of Cameroon