YEREMIA 17 - Kalate Zambe Nnomo a Mfefe Mfefé Nkôñelan

¹ Abé Yuda e ne ntilan a nkôs étyé, a nsoñe diamañ; e ne nkpwelan ako'o ya minleme miap a e minla'a ya meta'a metuna'a menan.

² Eyoñe te bone bap ba ye simesane meta'a metuna'a map, a mekône bezambe bap bebé a nyumi bilé, a e bone minkôle be ne mbetane yôp.

³ E beta nkôle wome ya fé, akume dôé a mefo'o môé, ma ve bie ane biôme ya nsa, nalé fe mevôme môé me ne mbetane yôp, amu *abé dôé e minné miôé mise.

⁴ Womien wo ye jô'é ngabe si me nga ve wo; ma ye bo wo *ôlo ya nsiñe wôé, e si ô nji tame yem, amu mi bo'éya nduane ya ayaa dam, a ja ye yôñe nnôm éto.

⁵ Avale di Nti a jô na: biyo'é a nyô a tabe ndi be môta binam, nyô a ye'ebe be minsôn, a vaa nleme wé be Nti!

⁶ A funane mon élé ya *nkôte si, a a nji yen ane mvom ja zu; éto jé é ne mevôme ya *nkôte si. me ne ndi'an, sii nku, a teke bôt be too été.

⁷ Ebotan é bo'o be nyô a tabe ndi nleme be Nti, a nye Nti a ne étabe mebune jé!

⁸ A funan élé é ne mbéan mfôme mendim; nje ja mialane minkañe mié mfa'a ôsôé wo lôt; ayôñe vian e nji jô je jôm, a mekaé mé me ne te viele; é ne te tyelé nleme yôp mbu mfum, é be'e bibuma éyoñ ése.

⁹ Jôm éfe é nji bo medu'an ane nleme môt, a be se nguleya bo wô *mvo'é, nge yeme jame wo kômbô.

¹⁰ Ma Nti, ma ve'ele *nlem, ma yemelan asimesan, asu ya ya'ane môt ase ane mezene mé me né, ane bibuma ya mimboone mié bi né

¹¹ aval ôkpwa wo bô'ôbô e metyi ô nji biaé yôp, avale te nyô a nyoñ akum ékotekote yôp a né; akume te da kôlô be nye éyoñ a ngenan a vee, a a yené v'akut amané y'ényiñe jé.

¹² Eto njôane ya duma é ne aso atata'a, vôme wongan a ne étyi le.

¹³ A Nti! Wo ô ne ndi *nlem Israél. E ba bese ba li'i wo ba ye wô'ôson. Ba ba kandane ma ba ye tilibane môé map e mbulu'u été, amu ba li'i Nti, anjeñe vevea mendim.

Meye'elan me Yérémi

¹⁴ Saé ma, a Nti, a ma ye bo mvo'é; nyi'i ma a ma ye nyiiban; amu wo ô ne duma dam!

¹⁵ Ô lôô ba jô me na: ajô Nti e ne vé' E tôéba'an ñhe!

¹⁶ Ve mfa'a wom me nji tindi wo na ô zuu minjuk, a Nti, me nji tame môse mintaé wu na ô kui, wo yeme nalé. E jam e nga so anyu dam e n'ôsu viôé.

¹⁷ Te bo na me fô'ôban amu wo, a wo ô n'asoé dam e môse bidim!

¹⁸ Bo'o na bekpwe'ele bam be bili ôson, ve ma, me bo te wô'ôson; bo'o na be fô'ôban, ve ma me bo te fô'ôban! Bo'o na, môse bidim ô kui be be. Bôme be a éndaman mebime mebaé.

Ntelane Sabat étyi

¹⁹ Avale di Nti a nga kobô me na: kelek a tebe'e *mbé bone be bôt e vôme bejô bôte ya Yuda ba nyiin a kui; tebe'e fe mimbé mise ya Yérusalém.

²⁰ Wo ye jô be na: Vô'ôla'an ajô Nti, a mia njô bôte ya Yuda a Yuda ase, a mia bese mi too Yérusalém, mi nyi'ine mimbé mi!

²¹ Avale di, nde Nti a jô na: ba'ala'ane miabebien; te be'ane mbe'e môse Sabat, a te lôtane wô e mimbé ya Yérusalém.

²² Te kuiane mbe'e atane ya menda menan e môse Sabat, a te boon ésaé éziñ; ve tela'ane môse Sabat étyi avale me nga bendé de b'ésoo.

²³ Be nji vô'ôlô, be nji kee alo dap; be nga bo tyiñe jabe ñyemelan asu ya bo te vô'ôlô a bo te nyoñe nye'elan.

²⁴ Nge mia bo fo'o ma mewôk, nalé Nti a jô, nge mia bo te tulane mbe'e e mimbé ya tisone nyô môse Sabat, nge mia telé môse Sabat étyi, a bo te bo ésaé éziñ *môs ôte,

²⁵ éyoñe te bejô bôt, a bone bejô bôt be too éto njôane David ba ye nyiine mimbé ya tisone nyô, be bete bevagoñ a bikabela yôp, bebien a bone bap, bôte ya Yuda a ba be too Yérusalém, a tisone nyô ja ye bi bôt nnôm éto.

²⁶ Bôt ba ye so bitisone ya Yuda a mefôla ma bômane Yérusalém, e sii Bényamin a e Seféla, e beta nkô, a e Négéb, asu ya soo metuna'a ba di'i ngumba, *bityi'a, mimveane ya mefup a ôtu, asu ya soo *bityi'a ya mvean akéva e ndaa Nti.

²⁷ Ve nge mia bo te wô'ô ma, asu ya telé môse Sabat étyi, a mboone te be'e mbe'e éziñ, a mboone te nyiine mimbé ya Yérusalém, e môse Sabat, éyoñe te ma ye futi nduan e mimbé ya tison, ja ye di'i biwôlô menda ya Yérusalém a ja ye bo te beta dim.