YEREMIA 16 - Kalate Zambe Nnomo a Mfefe Mfefé Nkôñelan

Bibubua a minkôm

¹ Ajô Nti e nga zu be ma e jô'ô na:

² wo ye bo te lu'u minga, a wo ye bo te bi, to'o bobefam nge bobebinga e vôme nyô.

³ Amu avale di Nti a kobô bobefam a bobebinga ba ye bialé e vôme nyô. Benyia ba ye biaé be, a b'ésaa ba ye bo na be bialé *si nyô:

⁴ ba ye wu ôkone zaé, teke môt a ye yi be, nge jame be. Ve ba ye bo akune ya si. Nkpwaté mekôn a mfumbale zaé bia ye wôé be. Mimbime miap mia ye bo bidi, asu anone ya yôp a betite ya fé.

⁵ Amu avale di nde Nti a kobô na: te wo nyiin e *nda é bili awu, teke bisulane mewu, te ko b'éngôngo, amu me vaaya *mvo'é jame be bôte ba, nalé Nti a jô, nalé fe mvame jam a nkoon éngôngole wom.

⁶ Minkukum a minzôzoé mia ye wu si nyô teke môt a jame mie, teke môt a bo be bisulane mewu, teke ntenane mimba'a nyô, nge nsôtane mintui asu dap.

⁷ Ba ye bo te be'e belet, asu ya volô nyô a be'e meyebe nlem amu ajô mbim; a *élaé ya mvolebane *nlem ja ye bo te veban asu dap, amu awu ésaa nge di nyia.

⁸ Nalé fe te nyiine *nda ba di abui, na mia be be mi tabe, mi di a nyu.

⁹ Amu avale di nde Nti ya *minsamba mewosan, e Zambe Israél a jô na: ma nyô! Ma tooé bia mefôn a mevak évô e vôme nyô, mise menan me lôô a éyoñe jenan, bia bi fam ja luk a bi minga a luk.

¹⁰ Eyoñe wo ye kate bôte ba mejô mana mese, a be ki be jô wo na: amu jé Nti a kobô bia ajô ya beta bidime bise bi' Ekobe jangan é ne jé' Abé avé bi nga bo Nti, e Zambe wongan'

¹¹ Eyoñe te wo ye yalane be na: amu b'ésoo be nga li'i ma, nalé Nti a jô, be nga ke lat a bezambe befe, be nga kañe be, a kute meboñe si ôsu viap; ve be nga li'i ma, a be nji ba'ale metiñe mam,

¹² Ve mia mi boya abé a dañe b'ésoo; mi lôô mia tôñ, môt ase, ntibe ya mbia nleme wé, teke wô'ô ma.

¹³ Ma ye wua mia atane ya si jenane nyô, e si mi nji tame yem, to'o mia to'o b'ésoo; a e wé, mia ye kañe bezambe befe *môs baa alu, amu ma ye bo te beta jamé mia *abé.

Bôte mekua bese ba ye bili

¹⁴ Ajô te, ô lôô, melu ma zu, nalé Nti a jô, mme ba ye bo te beta jô na: Nti a vee, nyô a nga soo bone b'Israél Ejipte!

¹⁵ Ve ba ye jô na: Nti a vee, nyô a nga soo bone b'Israél si y'akôé, a mesi mese a nga titane be! Ma ye bulane be éfuse si jap me nga ve b'ésaa bap.

¹⁶ Ma nyô! Ma lôm ézu'u beyobe kos, nalé Nti a jô, a ba ye yobe be; mvus éte, ma ye lôm ézu'u besômé tit, a ba ye jeñe be e beta minkôle bese a e bone minkôle bese yôp a minsalane meko'o été.

¹⁷ Amu mise mam ma fombô mezene mabe mese, be nji bo nsolan e mise mam. Ekobe jap é nji sobô e mise mam.

¹⁸ Ma ye taté ve be ma'an, ngab ébaé ya ékobe jap a *abé dap, amu be nga ndaman étyi ya si jam, amu be nga jalé ngabe si jam a mimbime ya mbia be mame map, a beangôndô be mame map.

¹⁹ A Nti, e ngule jam, ôleme viam, e vôme ma sobô môse ya njuk! Meyoñ me bôt ma ye zu be wo me so'o meku'u ya *si nyô, a ma ye jô na: b'ésaa bangan be nga nyoñ v'éli'i minsos, e momo a ne te volô jôm.

²⁰ Ye môt a ne bo émiene bezambe, te na be ne bezambe'

²¹ Ajô te ma bo na be yem éyoñe ji, ma bo na be yeme wo wom a ngule jam, a ba ye yeme na, jôé dam e ne Nti.