YEREMIA 14 - Kalate Zambe Nnomo a Mfefe Mfefé Nkôñelan

Ebubua mfum

¹ Ajô Nti, di e nga kui be Yérémi éyoñe mfum ô mbe:

² Yuda a ne e ñyôn été, bitisone bié bi te'eya, dibi a nkuane si, a miñyône ya Yérusalém mia bet.

³ Bemasa ba lôme bebo bisaé be jeñe mendim, bebo bisaé ba ke menjeñ, ve teke koone mendim, ba bulane minka'a miabe bikôkoé; ôsone wob été a ôsame wob été, ba buti minlô.

⁴ Yaa, si é maneya salé, amu mveñ é nji fe beta noñ e si jenan, ajô te besenane si, ôsone viab été, ba buti minlô.

⁵ To'o na nkok, afan été, wo biaé a li'i mon, amu bilo'o ya di momo.

⁶ Bijakase ya fé bia tebe mebôbône minkôle yôp, bi nyumulu'u mfep ane bemvu ya fé; mise map ma tek amu bilo'o momo.

⁷ Nge bikobe biangan bia ve bia bijô, a Nti, bo'o jam éziñ, amu jôé dôé! Amu beyeñeyeñ bangan be n'abui, bi boya wo *abé.

⁸ Wo, ndi *nlem Israél, e nyii wé, éyoñ y'ôlun, ô ne yené aya ane nneñ a lôt e si jangan' Ane ñwulu dulu a lame *nda éndelé jé asu ya jô'ôbô meyôa'

⁹ O ne yené aya ane môt a ne ngule momo, ane mbene môt wo kate nyii' Ve e too ke na ô n'ézezañe jangan a Nti, a jôé dôé da loban e nyôle jangan: te li'i bia!

Ntyi'an ajô ô ne te k'asôan

¹⁰ Avale di nde Nti a kobô ayoñe bôte di: Yaa, ba nye'e ba ndeñendeñ. Be ne teke tabe vôme wua. Nti a nji yene be mvaé. A simesane bikobe biap éyoñe ji a a yaa *abé dap.

¹¹ A Nti a nga jô me na: te ye'elan asu bôte ba, asu mvaé jap.

¹² Nge ba tyi bidi, ma ye bo te vô'ôlô miñyône mi ôlune miap; nge ba ve metuna'a ba di'i ngumba, a mimveane ya mefup, ma ye bo te kañese bie; amu ma ye mane be a nkpwaté mekôn, mfumbale zaé a bim.

¹³ Nde me nga yalane na: a Zambe nyô a ne Nti! Tame yen, bekulu mejô ba jô be na: mia ye bo te yene nkpwaté mekôn, mfumbale zaé a ye bo te kui be mia, ve ma ye ve mia e vôme nyô, ja'ane nya *mvo'é.

¹⁴ Ane Nti a nga jô me na: minsos mmie bekulu mejô ba kuli a jôé dam, me nji lôme be, me nji ve b'abendé éziñ, me nji kobô be; miñyenane mite mi ne minsos, bemvi'i a nkañane bengunemelan, mendu'ane ya minleme miap mmie ba kuli mia.

¹⁵ Amu ajô te Nti a kobô bekulu mejô ba kuli mejô a jôé dam me te lôme be a be jô'ô na: teke nkpwaté mekôn nge mfumbale zaé bia ye kui *si nyô na: bekulu mejô bete ba ye wu a nkpwaté mekôn, a mfumbale zaé.

¹⁶ A ba ya bôt mbe ba kuli mejô, ba ye wuabane minjoñe ya Yérusalém, amu mfumbale zaé a nkpwaté mekôn. Te ke môt a ye ve be vôme ya jambe, to'o bebien, to'o binga bap, to'o bobefame bap, to'o bobebinga bap; ma ye bo na *nkpwala wop ô ku be yôp.

¹⁷ Wo ye jô be ajô dina na: mise mam ma kui milik alu a amôs te k'atebe; amu éndune ngon, e ngon ayoñe bôte dam, e bibaneya a beta éndaman, a ébubua ja dañe mintaé.

¹⁸ Nge ma ke afan, bôte nkpwaté mekôn wo te jii mbe ba; nge ma nyiin e tison été, ô lôô bôt ba kon amu zaé. To'o na *nkulu mejô a *ntuni fe, ba bômane *si nyô, befe, fek é ne be njañan.

¹⁹ Ye ô su'ulaneya fo'o wua Yuda fé, ye nsisime wôé ô nga vini Siôn' Amu jé wo bibi bia, nsaéban ô too te fe nguleya yené be bia' Bi nga yange *mvo'é, ve teke jam é ne mvaé; bi nga yange ñyetan, ve tame yene nkul akoñ ñwô ô vianeya so!

²⁰ A Nti, bia yem évô jangan, évô b'ésaa bangan; amu bi boya wo *abé.

²¹ Amu jôé dôé te bo *abé nge biasé éto njôane ya duma dôé! Simesa'an, te tyam élate jôé a bia!

²² E bemomo bengunemelane ya *meyoñ, ye bevo'o y'été be ne bo na mveñ é noñ' Nge na ye yôp nde da ve mendim' Ye sa wo Nti, e Zambe wongan' Bi too wo ndi, amu wo wo bo mam mete mese.