YEREMIA 12 - Kalate Zambe Nnomo a Mfefe Mfefé Nkôñelan

Amu jé mbia môt a nenenen

¹ Wo dañe *zôsôô a Nti, asu ya na bia wo bi fetan; ve da na ma zu kobô wo ajô mam m'éziñ wo bo. amu jé zene mbia be bôt ja kee mame *mvo'é' Amu jé ba nyiñ teke jôme ja ndeñele be: bekoñe bôt ba bo ésaé ya koñe bôt'

² Ô maneya be bé, be maneya fe beme minkañ, mame map ma ke ôsu, ba wume bibuma; ô ne bebé anyu dap, v'ôyab e bido'o y'ényiñe jap.

³ Ve wo, a Nti, wo yeme ma, ô lôô ma, wo yeme nleme wome be wo. Wôé be ane mintômba e vôme ba tyi'i betit, telé'é be asu môse ya ñwôane bôt!

⁴ Si jangan ja ye tabe melunga été a kui éyoñ évé, a bilo'o ya fé ki bia ye tabe nkôt a kui éyoñ évé' Betit a anon bia man amu évô bôte ya si jangan, amu be jôya na: a se nguleya yeme jam da ye kui be bia!

⁵ Nge mia be bewulu a mebo mia mate mbi a be dañe wo, ô ne nguleya jiane bikabela aya' A nge ndi é ne fo'o ve e si é n'évôvoé, wo ye bo aya éyoñe Yordan a lumeya ndôn'

⁶ Amu bobenyoñe bôé bebiene fe a *nda bôt ésoo ba koñe wo. Ba bete bôt be wosane wo, wo teke yem. Te tabe be ndi éyoñe ba kobô wo élen

Zambe a li'i * nda jé a bôte bé

⁷ Me li'iya *nda jam, me beneya ngabe jam. Me veya nyô nleme wom wo nye'e e mo besiñe bam.

⁸ Ngabe jam ja too mfa'a wom ane ngbwengbweme y'afan, a veya tyiñe ya wosane ma, ajô te me viniya nye.

⁹ Ye ngabe jam é ntoo zeyôp é bili mebate metyi nyô amu ma nga' Ye bezeyôp ba bômane nye' Kelan, bi sulane betite bese ya mefan, za'ane be vôme ba ye di.

¹⁰ Abui beba'ale mintômba da sa ndi'i woone wom, da tibi afube dam a mebo, da veñesan afube mefo'o dame bilik a melunga.

¹¹ Be boya de melunga, e ne ôlun été, e ne meboko ôsu viam. Si jangan ése é ne melunga été, amu môt éziñ a nji nyoñe ngab été.

¹² Bevamban ba so e mebôbône minkôle mese ya fé, amu nkpwaté mekône Nti wo mine si jangan, ataté aku'u si di a kui di avok; teke môt éziñ a bili *mvo'é.

¹³ Be nga miase nlisi, ve ba kôane biyo, be boya bebien *abé, teke mfi. Wô'an ôsone ya bidi mia kôan, amu njet ayaa Nti.

¹⁴ Avale di nde Nti a kobô mbia be bôt bia be be bi too bebé, mbe ba nambe ngab ma ve bôte bam, ngab me nga ve Israél; o lôô! Ma ye vaa be si jap a ngu, a ma ye vaa *nda bôte Yuda a ngu ézezañe jap.

¹⁵ V'éyoñe me vaaya be, ma ye beta ko b'éngôngo. Ma ye beta bulane be, môt ase, e ngab? éli'i jé, môt ase e si jé.

¹⁶ A nge ba yé'é mezene me bôte bam, nge ba kane ngana a jôé dam na: a ne Nti a vee, éyoñe te ba ye tab'ézezañe bôte bam, avale fe be nga ye'ele bôte bame na be kane ngana a jôé Baal.

¹⁷ Ve nge ba bo te wô'ô jôm, ma ye vaa aval ayoñe te, ma ye vaa de a wôé de, nalé Nti a jô.