YEREMIA 11 - Kalate Zambe Nnomo a Mfefe Mfefé Nkôñelan

Ntyaman élat

¹ Nkobô Nti a nga kobô Yérémi:

² vô'ôla'ane mejô y'élate ji, a katane me bôte ya Yuda a ba be too Yérusalém!

³ Wo ye jô be na: avale di nde Nti, e Zambe Israél a jô na: biyo'é a môt a bo te vô'ôlô mejô y'élate ji,

⁴ nje me nga bo b'ésoo, môse me nga vaa be Ejipte mbe'e nduan étyé me jô'ô na: vô'ôla'ane tyiñe jam, a bo'one jam ese ma jô mia; éyoñe te mia ye bo bôte bam, a ma ye bo Zambe wônan.

⁵ Nalé ma ye tôé ngana me nga kane b'ésoo na ma ye ve be si menyañ a wôé bia len, avale mi lôô de môse wu. Nde me nga yalane na: E bo'o nalé a Nti!

⁶ Ane Nti a nga jô me na: yôta'ane mejô mana mese e bitisone ya Yuda, a e minjoñe ya Yérusalém, jô'ô na: vô'ôla'ane mejô y'élate ji, a bo me!

⁷ Amu e ne bebela na, me nga too ngaa b'ésoo, ataté môse me nga kôlô b'Ejipte, a kui môse wu, nné ane tyé é nga lendé, me nga kate bôte na: vô'ôla'ane tyiñe jam!

⁸ Ve be nga bote ke vô'ôlô, be nji kee alo, be nga tôñ, môt ase, ve ntibe ya mbia nleme wop; ajô te me nga tôé mejô mese y'élate ji e nyôle jap, mme me nga bendé be na be bo, ve be nga bo te bo me.

⁹ Nde Nti a nga jô me na: njoñ ô ne zañe bôte ya Yuda, a ba be too Yérusalém.

¹⁰ Be bulaneya bo bikobe mintôle b'ésaa bap, mbe be nga bene vô'ôlô mejô mam, a ke lat a bezambe befe, asu ya kañe be: *nda bôt Israél a nyô Yuda, be tyameya élate jam me nga bo a b'ésaa bap.

¹¹ Ajô te Nti a kobô avale di na: ô lôô! Ma zuu bidime be be. Be se nguleya fam. Ba ye yône be ma, ve ma ye bo te wô'ô be:

¹² bitisone ya Yuda, a bôte be too Yérusalém, ba ye ke loone bezambe ba di'i ôtu, ve be too fo'o te ngule ya nyii be, éyoñe bidime biap bia kui be be.

¹³ Azezambe dôé e ntoo fe abui abim ane bitisone biôé a Yuda! O lôñeya meta'a metuna'a m'ôson abime fe ô bili minjoñ a Yérusalém, yaa meta'a metuna'a asu ya di'i Baal ôtu;

¹⁴ ve wo (a nkulu mejô), te ye'elan ajô bôte ba, te bete *tyiñ, nge ye'elan ajô dap, amu me nji wô'ô be éyoñ ba loone ma, amu bidime biap;

¹⁵ Jé nje nyô ma nye'e a beta bo e Nda jam' Ba bo asone mam tee alañé! Be tame vaa tite ba ve ngunemelane be wo, amu éyoñe wo bo mbia mboon, nje wo fôn!

¹⁶ Nyumi ôlivié, nyô miñyené, amu abeñe y'ébuma jé, e jôé Nti a nga yôlé wo nde le. V'ézezañe ya beta éduñ, a bo'é nduan e mekaé mé, a mintyaé mié mi maneya tyi'iban.

¹⁷ Nti ya *minsamba mewosan a nga bé wo, a zuu bidime be wo, amu *abé nda bôt Israél a nyô Yakob, be nga bo bebien, éyoñe be nga soñe ma me yaa a éyoñe be nga di'i Baal ôtu.

Eso'o ya bo Yérémi abé

¹⁸ Nti a nga kulane ma jame te, a me nga yeme de. O nga bo na me yene mimboone miap.

¹⁹ Me mbe ane mone ntômba a nji yeme jôm, a nye ba kee nye vôme ba tyi'i betit. A me mbe te yem asimesane be mbe be bindi'i. Mbaka'an élé a bibuma bié! Za'ane bi vaane je e sii bevevee, a bôt be bo te beta simesane jôé dé!

²⁰ Ve Nti ya minsamba mewosan a ne *ntyi'i mejô a ne *zôsôô, nyô a yemelan asimesan a minlem. Ma ye yen akuna'a wo ye bo be be, amu wo me keeya ajô dam.

²¹ Amu ajô te, Nti a kobô bôte y'Anatot, mbe ba jeñ ényiñe jôé a jô na: te kulu mejô e jôé Nti, ô za wu e mo mangan.

²² O lôô! Me ne be ngame yat. Bisoé bi bôt bia ye wu a nkpwaté mekôn, bobefame bap a bobebinga bap ba ye wu mfumbale zaé.

²³ Teke môte ya be be a ye li'i; amu ma ye zuu bidim e be bôte y'Anatot, e môse ma ye wosane be.