YEREMIA 10 - Kalate Zambe Nnomo a Mfefe Mfefé Nkôñelan

Bengunemelan a Nti

¹ Vô'ôla'ane nkobô ya ngame yate Nti a kobô mia a *nda bôt Israél!

² Nti a kobô na: te vuane dulu *meyoñ me ne te yeme Zambe ma wulu, a te koone mendeme ya yôbe woñ, amu *meyoñ me ne te yeme Zambe ma ko me woñ.

³ Amu mefulu me bôt me ne momo jôm. Môt a ba'é élé afan été; wo mbo ésaé wo ba'é je a ôvôn;

⁴ ba kôme je abeñ a argent a or, ba yemete je mesen a vama'a na, é bo te beta fô'ôsan.

⁵ Bezambe bete ba funane betetele mekôn be ne nkpwelan, be ne teke kobô; ba be'e be, yaa ba be'e be, amu be se nguleya daa v'abo da: te koone be woñ, amu be se nguleya bo môt mbia jam éziñ. Avale fe be se nguleya bo mvaé éziñ.

⁶ Teke mfe a funane wo a Nti! Ô n'anen, jôé dôé e ne ngu é too fe anen.

⁷ Z'a ne bo te ko wo woñ, a njô bôte *meyoñ' Ba yiane ko wo woñ, amu e mimfefe'e ya *meyoñ été a e bijôé bise été, teke mfe a funane wo.

⁸ Bese, mfula'an, be n'asuk a mekut; ndeme ya momo wop é ne élé!

⁹ Ba soo bibab bi argent Tarsis, a bi bi or Ufaz, ésaé mboo biôm, nsoon e mo me nlui or; ba jalé azezambe mengômesan me veleves a too évindi a évele, ése é ne ésaé mboo biôm.

¹⁰ Ve Nti a ne Zambe e bebela été, nye, e Zambe a vee a njôô ya nnôm éto. Si ja fô'ôsan ôsu y'ayaa dé, a *meyoñ me bôt me nji zômbô ayaa dé:

¹¹ mia ye kobô be na: Bezambe be nji té yôb a si, ba ye jañe *si nyô, a e yôbe si.

¹² A nga bo si a ngule jé, a nga té émo a fe'e jé, a nga same yôp a atyeñe dé.

¹³ Eyoñ a ve *tyiñ, mendim ma kôane yôp. A bo na minkut mi bet, mi kôlô'ô aku'u ya si; a bo feleves asu mveñ, a soo évuñulu e vôm a naane je.

¹⁴ Môt ase a ntoo nsusuk e ñyemane wé été; nlui or ase, a wô'ô éve'ela jé é ne nkpwelan ôson; amu bengunemelane bete be ne ve medu'an, mvebe ô nji bo be be.

¹⁵ Be ne ve be momo be biôm, ésaé minsos, ba ye jañ, éyoñe *melep ma ye so.

¹⁶ Nyô a ne ngabe Yakob, a nji funane be; amu nye a bo biôm bise, a Israél a n'ayoñe ya ngabe jé, jôé dé e ne na: Nti ya *minsamba mewosan.

Befô'ôfô'ô e Yérusalém

¹⁷ Toké'é mvaé jôé é bôô si a wo besiñ be bômaneya nye!

¹⁸ Amu Nti a jô avale di na: ô lôô éyoñe ji ma zu wua bôte be too *si nyô ane ba wua toloo; ma zu bametane be bebé, nalé ba ye nnambe be.

¹⁹ Ngo'o ma! Me bu'uya! Fôle jam é ne mintaé! Ngo'o ma me mbe me jô'ô na: mintaé miame le, ma ye jibi mie.

²⁰ Nda éndelé jam é maneya tyamban, minkole miam mi maneya téé, bone bam be kôlôya be ma; be nji beta bo; me nji bi môt a ne beta limi *nda éndelé jam, nyô a ne beta bete menda bindelé mam;

²¹ Amu beba'ale mintômba be nga yené minsusuk, be nji ke jeñe Nti. Ajô te mfasan ô ne momo e be be, a mimbame biyeme miab mise mi maneya wu.

²² O lôô éduñ ja zu, beta éngôngôm a so'o mfa'a si y'akôé, asu ya bo bitisone ya Yuda melunga, a éjô'ôba'a bemvu ya fé.

²³ A Nti, ma yeme na zene môta binam é nji bo jôme jé émien; saake môt e nye a liti medaa mebo mé zen éyoñ a wulu.

²⁴ A Nti, lebe ma, e *zôsôô été, ve saa ayaa dôé été, ô za veñesane ma momo jôm.

²⁵ Sô'é ayaa dôé e be meyoñe bikuu me ne te yeme wo, a e be bôt be ne te loone jôé dôé! Amu ba di Yakob. Ba di nye, ba jiane nye, a bo vôme wé jôme melunga.