Yb 8 - Kalate Zambe Nnomo a Mfefe Mfefé Nkôñelan

Nkobô ôsu Bildad a kobô Yob

¹ Ane Bildad ya Kua a nga nyoñe nkobô a jô na:

² Wo ye kobô avale nkobô te a kui éyoñ évé, ye *minkobô y'anyu dôé mia ye bo évuñulu é ne ngu'

³ Ye Zambe a ye vite *zôsôô' Ye Nyô a ne ngul'ése a ye vite nya ntyi'ane mejôô'

⁴ Nge bone bôé be boya nye *abé, a veya ñhe be e mo ya mbia mboone wop.

⁵ Ve wo nge wo jeñe Zambe, nge wo sili mvame ya nyô a ne ngul ése

⁶ nge ô ne teke bijô a *zôsôô, éyoñe te a ye ba'ale wo teke selan a a ye beta telé *nda jôé, e vôme *zôsôô wôé a ye tabe.

⁷ Aval'ô nga too ôsusua da ye bo zesé, avale da ye tôñe mvuse valé da ye dañ anen.

Sili'i fek e be bemvendé be bôt

⁸ Tame sili bôte ya miaé ya mvuse minsili, tuka'a fombô avale b'ésaa be nga yene mam.

⁹ Amu bi ne ve ba y'angô'é, a bi nji yeme jôm, melu mangan e si nyô me ne fo'o ve nsisiñ

¹⁰ ye be ba ye bo te ve wo nye'elan' Ba ye kate wo de, ba ye soo mejô mete e minlem miap.

¹¹ Ye mbôñ akpwaé ô ne nguleya faa élobé momo' Ye nden é ne nguleya faa mendim momo'

¹² Nté ô ngenane nyumen a te ntyi'an, ja kôt avôl a dañe bilo'o bife bise.

¹³ Avale te nde da kui e be ba bese ba vuane Zambe, a ndi nleme mbo *abé ja ye jañ.

¹⁴ Ndi jé é ne mbôlan, a ndi jé é ne ndeten abôp.

¹⁵ A ye'e e *nda jé ve *nda été ja ye bo te tebe, a kabetan été, ve ja ye bo te tabe.

¹⁶ Mbo *abé akôsa bo njalan a mendim bilé, akôsa bo a yaé a vian, akôsa bo a wua mintyaé mié afube yôp,

¹⁷ akôsa bo minkañe mié mia yametan e mbamel'ako'o yôp, akôsa bo a yemete ényiñe jé e zañ ako'o e n'ayet,

¹⁸ ve nné ane ba vaa nye e vôm a beme, môt ase a nga kate nye a jô'ô na: Me ngenane te tame yene wo!

¹⁹ Ana'ana ve teme na a nga mane boé e njoñe yôp, a môte mfe a ye faa e ndube jé yôp.

²⁰ Tame yen! Zambe a ne teke biasé zôsôa môt; nalé fe na a ne teke volô bôt ba bo mbia be mam.

²¹ Yange'e na a futi vioé anyu dôé, a futi miñyône mevak e biyaé biôé!

²² Ba ba siñe wo ba ye bo njalan a ôson, a *nda éndelé bebo abé nje ja ye bo momo jôm.