Yb 5 - Kalate Zambe Nnomo a Mfefe Mfefé Nkôñelan

Vôm * abé da téé

¹ Lo'one ñhe éyoñe ji! Ye môt éziñ a ye yalane wo' Wo ye kobô ôvé ya mimfufup'

² Amu ñwô'an ôlun wo wôé môt a ne akut, a *aban da wôé nsusuk.

³ Me nga yen akute môt e biaé minkañ, v'atemeteme na me nga yo'é étaba'a jé.

⁴ Bone bé ba ke zene ya nyian ôyap; ba nyoñe mekua aba mejô teke môt a kôté be.

⁵ Bewô'ô zaé ba ye mine bidi bié a ba ye zu vaa nye a kui vôm biyo bi né. Bôt ba wô'ô évé ba ye min akume dé,

⁶ bidim bi nji ke so mbulu'u été, a njuk ô nji ke faa aso ya si.

⁷ Môt a nga bialé asu minjuk avale fe ane bityaka'a bia yele yôp.

E ne mvaé ya loone Zambe

⁸ Mfa'a wom, ma ye jeñe Zambe Zambe nye ma ye liti ajô dam,

⁹ a bo beta be mam me ne tek'ayemelan, bitua bi mam tek'alañé

¹⁰ a noo mveñ e si, a lôme mendim e mefup,

¹¹ ba be ne nsilane si a bete be yôp, ba be n'ôlun été, a kuli be e nyian.

¹² Mam mimvômvôle mi bôt mia bôndé, a bo me momo, nalé fe na mo map me se nguleya bo na, e mame map me ke ôsu.

¹³ A bi mimfefek, e mvôle jab ébien été, a fe'e bôt be ne mvô teke tabe,

¹⁴ mbe ba tôbane dibi e bizôña môs ba ke ba bôp e zañe *môs ane a alu.

¹⁵ Ve Nye a nyii éngôngole môt; nkpwaté mekôn wo so anyu dap a e wo ngungu;

¹⁶ Ajô te ndi é ne mfa'a ntetek, v'ékotekot môt ja dib anyu.

Ngaka'a mimfefe'e mi bôt

¹⁷ Ajô te môte Zambe a yaa nye a yiane vak! Te bene melebe me Nyô a ne ngul ése

¹⁸ amu nye a balé aveñ a saé fe de; a tibi, a mo mé ma yete

¹⁹ a ye kôté wo ôlun biyoñ bisaman a *abé da ye bo te kui be wo biyoñe zamgbwa.

²⁰ Melu me mfumbale zaé, a ye kôté wo awu; melu bita, a ye kôté wo mfa'a meveñ me nkpwaté mekôn.

²¹ Oyem wo té ntañete wo ye bo te nnambe wo, éyoñe jam da jiane bôt da ye so wo ye bo teke ko woñ.

²² Wo ye woé jam da jiane bôt avale f'ane zaé; te ko betite ya si woñ,

²³ amu mia be meko'o ya mefup mia ye bo élat, a mia be betite ya fé mia ye tabe *mvo'é.

²⁴ Wo ye yeme na mvo'é ja ye bo e *nda éndelé jôé; wo ye ke wo jom e mevôme mimbame miôé mia di, a jôm ja ye bo te jembane wo;

²⁵ wo ye yeme na mvoñe bôte jôé ja ye bo abui, a na bifa'alé biôé bia ye bo ane bilo'o ya si.

²⁶ Wo ye nyiine soñ, valé ô ntoo nnôm abui, avale ba bo avis mimbom mi nlisi éyoñ ja yian.

²⁷ Jam bia te yen nde le; nne é ne nalé! Wo yiane wô'ô de a yeme de.