Yb 42 - Kalate Zambe Nnomo a Mfefe Mfefé Nkôñelan

Eyalane Yob ja su'ulan

¹ Ane Yob a nga yalane Nti na:

² Me yeneya na ô ne bo mam mese, a teke mfasan éziñ wo kate wo.

³ Za a ne nyô a ve mefe'e mame dibi, a *minkobô mi ne teke ñyeman été' Yaa! Me kobôya jam e ne m'ayaé abui. Me nji wô'ô jôm été, teke de yem!

⁴ O mbe ô jô'ô na vô'ôlô'ô, a jôké'é ma me kobô; Ma ye sili wo minsili a wo ye yalane ma.

⁵ Me mbe me yeme wo fo'o v'abime be nga kate ma; v'éyoñe ji me yeneya wo a mise ma.

⁶ Ajô te ma vaa mam me mbe me yemete'e, ma yeme na ma ku a ma sili mamiene si a ntaban e mbulu'u été a asub été.

Nti a beta telé Yob

⁷ Eyoñe Nti a maneya kobô Yob mejô mete, nde a nga jô Elifaz môte ya Témane na: Ayaa dam da yôñe wo nyô a bemvôé bôé bebaé, amu mi nji kobô ajô dame *zôsôô avale mbo ésaé wome Yob a nga bo.

⁸ Ajô te éyoñe ji, nyoñane beyôm benya'a zamgbwa a beyôm mintômba zamgbwa, kelane be mbo ésaé wom Yob a ve mveane ba di'i ngumba asu denan. Mbo ésaé wom Yob a ye ye'elan ajô denan, a mbôlô ma semé nye, ma ye bo te bo mia aval'an'akute mboone denan e né, amu mi nji kobô ajô dame *zôsôô avale mbo ésaé wome Yob a nga bo.

⁹ Ane Elifaz môte ya Téman, Bildad môte ya Kua a Sôfar môte ya Nama be nga ke. Be nga bo avale Nti a nga jô be; A Nti a nga kañese meye'elane me Yob.

¹⁰ Ane Nti a nga beta kôm été Yob, éyoñ a nga mane ye'elan ajô bemvôé bé; A Nti a nga ve nye biôm bise a nga bili tañe biyoñ bibaé.

¹¹ Bobenyañe bé bese, bekale bé bese a bivuvumane bié bise ya melu mvus be nga zu be nye, ba be nye ve di e *nda jé. Be nga yôn ajô dé a volô fe nye *nlem mfa'a minju'u mise Nti a nga bo na mi zu be nye, a be nga ve nye môt ase éfuse argent a élondo or.

¹² Nti a nga botane ngabe baa y'ényiñe Yob a dañe ngab ôsu. A nga bi beyale mintômba toyini awôm a ényiñ, bekamel toyini ésaman, fia beyôm benyak toyini jia a beyale bijakas toyini jia.

¹³ A nga biaé bobefame zamgbwa a bobebinga belaa.

¹⁴ Ntôl ô mbe jôé na ôdu, ébatane ke na same ya kanél, mesu'ulan nye ke jôé na mbone bivula.

¹⁵ E si jap ése, mimbeñ mi binga mife mi nji bo ane bengon be Yob, a ésaa wob a nga ve be *ngab élik ba be bendôm.

¹⁶ Mvus été Yob a nga beta nyiñ mimbu 140 a nga yene bone bé a bendaé bé a kui miaé nyini.

¹⁷ Ane Yob a nga wu a too nnôm, njalan mfa'a ya melu.