Yb 41 - Kalate Zambe Nnomo a Mfefe Mfefé Nkôñelan

¹ Tame yen, éyoñ ba yange nye, ate'e da viane bo wo nyô; Amu ve ñyenane wo yene nye, ng'ate'e da bi wo nyô'

² Teke môt a ye bo ayo'o ya soñe nye; za a ne ngule ya zômbô asu dam'

³ Za a nga ve ma bikôla, ane ma ye bulane nye bie' E jôbe si, biôm bise bi n'émbiam.

⁴ Ma ye bo te tab'évô amu ajô ya bibu'a bié, ngule jé, abeñe dé a nta'ane nyôle wé.

⁵ Za a nga vaa nye ngômesane jé' Za a ye nyiin e zañe mintyetye'e mié été'

⁶ Za a nga dii mimbé y'anyu dé' Eko woñ é ne nye mbôma'ane mesôñ.

⁷ Mebun a ngule bibene bié bi ne nlatan ne ta ane nge *sitam nye a late bie;

⁸ ba latan jia a ji évok, a évuñulu é se nguleya lôt e zañe jap.

⁹ Be ne nlatan jia a ji évok, be tele a be se nguleya kandan.

¹⁰ Bezeseme bé ba bo éfufube na é faé; mise mé me ne aval'ane biyakolô ya melendé me tyé.

¹¹ Mengôé ma vame ny'anyu, a bengeké be nduane fe ba vam été.

¹² Otita wo so nye mimbile mi jôé, aval'ane minkeñe a kundi, a ane mbômeyô a n'ayôñ.

¹³ Mvebe wé wo bo'é nduan e da'a, nkaba'a nduan wo vame ny'anyu.

¹⁴ Ngul é ne nye *tyiñ, a woñ wo yôô ny'ôsu.

¹⁵ Biôme ya nyôle jé bi ne nlatane bise, bi ntoo ny'ayete nyô, te k'akôlô.

¹⁶ Nleme wé ô n'ayet an'akok, ayet an'ako'o ya si ba ko'o de bidi.

¹⁷ Eyoñ a tebe tetele, ba ba dañe biwôlô ba ko woñ, ba sa'ale ntya'an a woñ

¹⁸ asu nyô a subu nye bebé. Nkpwaté mekôn ô nji volô jôm, to'o nya akoñe, nge ngamba akoñ, nge ében.

¹⁹ A yen étyé ane minkôte bilok, mvot an'élé é maneya boé.

²⁰ Akoñ *élaé é nji bo nye na a tup, bone meko'o ba futi toloo, bene asu dé ve minkôte bilok.

²¹ A yene mbeñ ane nkôt élok, a woé éyoñe ngamba akoñ ja nyé.

²² Minsoñetane mesen mi ne nye si, ô ye'e jô na étyé ba fa'a si, nje a ke a dutu mboto'été.

²³ A bo na bido'o ya si bi kundi ane viek. A veñesane mañ me bo v'ôyôm ésua ba di'i ôlobinda.

²⁴ A li'i zene ja faé e mvuse jé. Edo'o yee é ntoo ane ésile nnôme môt.

²⁵ Jôm éziñ é nji bo ma wé e si nyô; a nga kômbane na a bo te ko woñ.

²⁶ A fombô e jôm ése é ne mbetane yôp. A ne njôô ya betite bese ba dañe mebun.