Yb 40 - Kalate Zambe Nnomo a Mfefe Mfefé Nkôñelan

Nkobô Yob a éyalane baa Zambe

¹ Nti a nga beta jô Yob na:

² Ye nyô *a nye'e bisô e zezé a ye bo Nyô A ne Ngul Ese mejô' Ye nyô ba Zambe ba sôane bisô a bili éyalan éziñ été'

³ Nde Yob a nga yalane Nti na:

⁴ Ô lôô me ne ôyôme jôm, jé ma ye yalane wo' Ma buti wo anyu dam.

⁵ Ma te kobô éyoñe jia, ma ye bo te beta yalan; ma te kobô ja'ane biyoñe bibaé, ma ye bo te beta beté jôm éfe.

Ye Yob a ye nyoñ émien ane Zambe

⁶ Ane Nti a nga yalane Yob a too ôkôs été a jô na:

⁷ Tiñeti'i ases angeteñe dôé aval an'éwôlô môt; ma ye sili wo minsili, a wo ye ye'ele ma.

⁸ Ye nkômbane wôé ô ne fo'o na ô tyame ntyi'an ajô wom' Ye wo ye ve ma mekua asu ya kale womien'

⁹ Ye ô bili wo ô funa'ane wu Zambe, e *tyiñ ja bam an'énjé'

¹⁰ Jalé'é womiene mebun a duma ane ngômesan, a jalé fe womien mfaéan a étôtok!

¹¹ Bo'ok ayaa dôé na e lôt ane mendim, fombô'ô ba bese be ne mebun a sili be si!

¹² Fombô'ô ba bese be ne mebun, a viti be si! Tame ko'o bebo *abé vôm be tele,

¹³ solé'é be bese nsamba e mbulu'u été, futi'i be, môt ase, e mbô'awu!

¹⁴ Eyoñe te ñhe mamien ma ye kañe wo. Amu mbo nnôme wôé ñwô wo ye bo nyiane wôé.

Ngup

¹⁵ Tame yene ngup me nga bo fe ane wo! Ja di bilok ane nyak.

¹⁶ Tame yen! Ngule jé é ne angeteñe dé, a éwôlô jé é ne minsône y'abume dé;

¹⁷ ja telé njeme jé ane élé Sédre, minsise ya mebé mé mi ne ndiñetan;

¹⁸ bivese bié bi ne minkoñ mi mvot, nkpwangbwa bivese wé ô ne ane minkoñ bityé.

¹⁹ A ne ésaé ôsu ya bisaé bi Zambe; nyô a nga bo nye a nga jalé nye nkpwaté mekôn.

²⁰ Minkô mia ve nye bidi bié, e vôme betite bese ya fé ba bo bivôé.

²¹ A bômbô e mingum bilé si, asoé dé e ne ndene si, a e bilobé;

²² bilé bite bia buti nye éjijine jap, bone bilé y'ôtôñ ba bômane nye.

²³ Nge beta ôsôé a nto nden abui, a ye bo te tyelé nleme yôp; nge Yordan a nyine ny'anyu été; a ye tabe teke ko jôme woñ.

²⁴ Ye ba ye bi nye éyoñ a bili mis me yoo' Ye ba ye bi nye a ôlam, asu ya tub anyu dé'

Nkômengan nge na beta dragoñ

²⁵ Ye wo ye bi nkômengan a nnop' Ye wo ye ka'a ôyeme vié a nkol'

²⁶ Ye wo ye som ôlé anyu dé' Ye wo ye tube nye nkek a ôkop'

²⁷ Ye a ye bo wo ayabe meye'elan' Ye a ye kobô wo bivôvoé bifia'

²⁸ Ye a ye bo élat a wo' Ye wo ye nyoñe nye ane *ôlo melu mese'

²⁹ Ye wo ye bo nye bivôé ane nyô a vôé ônon' Ye wo tiñeti nye asu ya ve bobebinga bôé jôme ya bo je fianga'

³⁰ Ye bôte ba kui tyiñe mame ya minkuan ba ye kuane nye' Ye ba ye kabane nye zañe bekuan abom'

³¹ Ye wo ye jalé nyôle jé a biyo, a jalé fe nlô wé a mekoñ ba wôé me kos'

³² Beté'é wo wôé be nye. Eyoñ wo simesane mewosan, wo ye bo te beta bo nalé.