Yb 4 - Kalate Zambe Nnomo a Mfefe Mfefé Nkôñelan

Nkobô Elifaz

¹ Eyoñe te Elifaz, Môte ya Téman a nga nyoñe nkobô a jô na:

² Nge môt a ve'ele tot éfia, ye jame te da ye ndeñele wo' Ve za ki a ne nguleya tabe évô'

³ Tame yen ô maneya ve abui bôt miñye'elan, ô maneya ve mo me ne nte'ane ngu.

⁴ Nkobô wôé ô maneya bete nyô a nga ye ku si. O yemeteya meboñ me n'atek,

⁵ v'éyoñ éyoñ jôé é kuiya, ô nga bili atek! Amu jame te da nnambe wo éyoñe ji, fek é jañeya wo.

⁶ Ye nkoone woñe ya Zambe wôé ô nji fe bo ésuka'a jôé' Ye ndi nleme jôé, é nji fe bo *zôsôô ya mezene môé'

⁷ Womiene tame fas, zôsôa môte *mbé a nga tôbane njuk' A vôme *mbé nye bezôsôô be bôt be nga jañ'

⁸ Avale me yeneya e ne na: Ba ba senan ékotekot a bé njuk, bebien ba kôane minju'u y'été.

⁹ Evuñulu Zambe ja wôé be, a évuñulu y'ayaa dé ja di'i be.

¹⁰ Mvam ngbwengbwem, ñyôn étoñe ñyôyo'o tite ya fé a mesôñe bitoñ bi ngbwengbwem bia bu'i;

¹¹ ngbwengbwem ja wu amu teke jôme ya bi a bone be ngale ngbwengbwem ba mane tyamelan.

Ñyenan y'alu

¹² Efia éziñ ja te sendé a kui be ma a alo dam da te wô'ô bone biduñ y'été.

¹³ Eyoñ asimesan da tyelé bôte minleme yôp e so'o miñyenan y'alu, éyoñ ôyo melom wo bi bôt,

¹⁴ woñ a benyeñenyeñ ba te bi ma, a bivese biam bise bia te fô'ôban,

¹⁵ évuñulu é nga lôte ma asu, a mimvote ya nyôle jam mi nga tebe.

¹⁶ Môt éziñ a nga tele valé, ve me nji bo nguleya yeme nye; nsisiñ ô mbe ma ôsu a me nga wô'ô *tyiñ é kobô'ô ôfôfoé;

¹⁷ ye nyô a ne mbialane na a yiane wu a ne bo *zôsôô e mise me Zambe' Ye môt a ne bo mfuban e mise me nyô a nga kôme nye'

¹⁸ Nge Zambe a nji tabe bebo bisaé bé ndi *nlem, nge a yene minkoban e be beéngele bé,

¹⁹ kô fé a ye dañe yene mie e be ba be too menda me tyia, mbe mimbôka'a miap mi ne mbulu'u été, a ba fite be ane évulebebas.

²⁰ Ba jiane be mametyé a mamengô'é, ba jañe nnôm éto, te môt a fombô be;

²¹ Nkol y'ényiñe jap ô ntoo ntyi'an, ba wu, ve sa ñhe a fek.