Yb 39 - Kalate Zambe Nnomo a Mfefe Mfefé Nkôñelan

¹ Ye wo yem éyoñe bikela mefan bia biaé *bon' Ye ô ne yemelan éyoñe minko'o mia biaé *bon'

² Ye ô ne lañe tañe bengone ya mia be'e mebum, nge yem éyoñ mia biaé bone bap'

³ Mia nut a biaé mvoñe jap, a kôtéban mfa'a mintaé miap.

⁴ Bone bap ba nyoñe ngu a yaé atan atan, ba ke ôyap teke beta bulane be be.

⁵ Za a tii ékabela ya fé a ve je éto fili, a za a nga tii mengata'a me éjakase ya fé'

⁶ Me nga bo ôzôm étaba'a jé, a si é bili nku fe vôm é ne tabe.

⁷ E ne te bisi zô'é ya tison, nge wô'ô miñyône mi ndutu ékalik.

⁸ Ja wulu minkôle minkô, asu ya yene bidi bié, ja ke ja jeñe jôm ése é ne nyôle mekaé bilok a nyumi.

⁹ Ye nyat ja kômbô bo wo ésaé' Ye ja bômbô e fefele éwolo bidi ya biyeme biôé'

¹⁰ Ye ô ne tiñeti nyat nkole na é fa'a nnoñ ya bé bidi' Ye ja ye dutu évôl étyé ja fa'a si e mvuse jôé e bone mimbi'ili'

¹¹ Ye wo ye ve je ndi nleme jôé amu na ngule jé é n'anen' Ye wo ye li'i je ébuma ya nju'u wôé'

¹² Ye ô ne tabe nyat éte ndi nlem asu ya kôane bidi biôé a bo bie mevis e nseñe wôé ba tya'a bidi'

¹³ Mefabe m'éngutu ma ndamban a meva'a mese, ô ye'e jô na mefap a mesaé me jun.

¹⁴ V'éyoñ éngutu a li'i metyi mé si a suu me na me wô'ô ayôñ e mbulu'u été,

¹⁵ a vuane na abo da e ne bôé me, nge na tite jia y'afan é ne me tibi.

¹⁶ Engutu a ne njet e be bone bé, aval'ane nge be nji bo émbé; a nji ko woñe na a nga wu nju'u zezé.

¹⁷ Amu Zambe a nga bo nye fe'e momo, a nji ve ny'atyeñ ane ngap.

¹⁸ Eyoñ a tebe a taté mbi, a woé ékabela a nyô a wulu je yôp.

¹⁹ Ye wo wo ve ékabela ngu nge jalé tyiñe jé a zeñ ja fô'ôsan'

²⁰ Ye wo bo na é yôô ane étandak' Mveme jé é too je ndi, ja miase woñ.

²¹ Ja fias e mone mbi'ili été, a vak amu ngule jé, ja mate mbi a ke tôbane mengaa;

²² Ja yene woñe zezé, jôm éziñ é ne te bo je na é ko woñ, nalé fe na é ne te bulane mvus éyoñ é tôbaneya nkpwaté mekôn.

²³ Nkob ô bili mekoñ m'élaé wo duñe nye mvus, nalé fe akoñ da ngemban a ngamba akoñ.

²⁴ Ja sembe a ayôñ ese a mine ñyem.

²⁵ Eyoñe toñ é kobôya, ékabela é se fe nguleya jibi, ja vô'ôlô ényume mewosan é tele ôyap, avale te fe ja vô'ôlô ényume bivet a miñyôn.

²⁶ Eyoñ ôbam via yele a same mefabe mé mfa'a ya nké, ye via belane fe'e jôé'

²⁷ Ye ndôé ja yele yôp a lôñe dumba'a dé e mevôm me ne mbetane yôp amu njôane wôé'

²⁸ Ja tabe a lôt alu e meko'o été, vôm a ne ny'ôlem a ne akôme yôp,

²⁹ nne ñhe ja mombô jôm ja ye bi é bete valé; mise mé ma yene je ôyap.

³⁰ Bone bé ba nyu metyi. A e vôme mimbime mi biôm mi né, vôm ate fe ndôé éte é né.