Yb 37 - Kalate Zambe Nnomo a Mfefe Mfefé Nkôñelan

Zambe ôyôn

¹ Ajô te nde nleme wom wo fô'ôban, wo yele a kôlô vôm ô né.

² Vô'ôla'an, vô'ôla'an éduñe tyiñe Zambe! E *mvam ja so anyu dé!

³ Mvame zo'oyañ éte ja yiane yôp ese, a feleves jé ja faé a kui meku'u ya si.

⁴ Mvus éte *tyiñ jé ja bam: Zambe a bam a beta tyiñe wé; éyoñ a boya na tyiñe jé é wô'é, a nji beta bi feleves.

⁵ Eyoñe Zambe a bam a tyiñe jé, nalé a ne étua mbamba jam; a bo beta be mam mbe bia kate yemelan.

⁶ A jô meta'a na: Kpwa'ane si! Avale te fe a jô éko'o mveñ, ja'ane mveñe meta'a.

⁷ A fete wo ététéa ése é ne môt a *sitam, nalé bese ba ye yeme na be ne ésaé jé.

⁸ Tite y'afan ja bulan étaba'a jé, a bômbô mfule wé.

⁹ Olendé a so mfa'a ya nké, a avep e bivuñulu y'akôé.

¹⁰ Zambe a bo bibañe mendim a mvebe wé, a ngum ôsôé wo mane wôn.

¹¹ A futi émumun e minkut été, a mialane minkute mia faé.

¹² Mia yaé aval émien a liti mie *zen, asu ya bo jam ese a bendé mie e si bi too émo va;

¹³ aval'ane ôlé a bibi e si jé, nge aval'ane ndeme ya mvame jé, nne a bo na biôme bite bi yené nalé.

Zambe ésep

¹⁴ A Yob ke'e alo dôé mfa'a mam mete, tebe'e a yemelane bitua bi mame Zambe!

¹⁵ Ye wo yem ane Zambe a wulu bie a bo fe na éfufube minkute mié é faé'

¹⁶ Ye wo yem amu jé minkut mia bo te ku' A yeme fe bitua bi mame ya Nyô ñyemane mame wé ô ne nya *mvo'é'

¹⁷ E wo mengômesan me n'ayôñ abui éyoñe si ja wo'on a évuñulu ya nké.

¹⁸ Ye ô ne nyi'i minkut ékula'a ane Zambe, minkute mite mi too ayet ane ngobé be nga bo a nyeman étyé'

¹⁹ Bo'o na bi yeme jam bia yiane jô Nye; bia ye bo te beta jô jam amu dibi ya ñyemane wongan.

²⁰ Ye ba ye kate nye na ma ye kobô' Ve ye môt a ne nguleya jô na a kômbô wu'

²¹ Eyoñe ji be nji fe yen éfufup, amu minkut mi maneya dibe je, a évuñulu é lôteya a mane vaa mie,

²² a éfufube mvot ja so akôé. Ejijine ya ko woñ ja bômane.

²³ Bi se nguleya ke a kui be Nyô A ne Ngul Ese, Nyô a n'anen amu ngule jé, *zôsôô wé! A ne teke tibili nyô a ne njalan a *zôsôô!

²⁴ Ajô te bôt ba yiane ko nye woñ; Ve Nye a nji fombô wua ya ba ba buni na be ne mimfefek.