Yb 36 - Kalate Zambe Nnomo a Mfefe Mfefé Nkôñelan

Ane Zambe a ye'ele bôt

¹ Eliwu a nga kee nkobô ôsu a jô na:

² Tame yange, ma ye kate wo, amu me ngenane me bili bifia biziñ asu ajô Zambe.

³ Nyemane wom wo ye so ôyab abui, a ma ye kale nyô a nga té ma.

⁴ Amu e ne bebela na nkobô wom ô nji bo medu'an, môt a ne nya *mvo'é e ñyemane wé été, nye mia nye mi né!

⁵ Zambe a ne ngu, a a nji bene môt éziñ; a n'éwôlô amu ngule ya ñyemane wé.

⁶ A nji jô'é mbo *abé na a nyiñ, ve tyi'i bingôngole bi bôte mejô *zôsôô.

⁷ A nji vaa mise be zôsôa môt, A tooé bejô bôte bito, A tooé b'été nnôm éto, nalé ate ba ye betebane yôp.

⁸ Nge be ne nka'an a bengôkop, nge mengata'a ya njuk ma bi be,

⁹ éyoñe te a ve mimboone miabe mekua, a ntyamane metiñe wob, éyoñ ba bo wô mebun;

¹⁰ a bemene be, asu ya ye'ele be, a kate be na be jô'é ékotekote jap.

¹¹ Nge ba vô'ôlô a bo mewôk, ba mane melu map ébotan été, a mimbu miap mefo'o été.

¹² Nge ba bo te wôk, ba ye jañ a nkpwaté mekôn, ba wu e ndimane wob été.

¹³ Bebo *abé ba kuane bebien e ayaa, be nji loone Zambe a volô be, éyoñ a ka'a be ngata'a;

¹⁴ Nsisime wob wo jañ be too bisoé, a ényiñe jabe fe ja jañ e bebo ébamba été.

¹⁵ Ve Zambe a kôté éngôngole môt ve a nju'u wé ôbien. A a bemene nye a mintaé.

¹⁶ Melu mvus Zambe a nga bo na ô bo te wô'ôlun, éjiane y'été a nga ve wo abui afok. Tawôlô wôé a mbe njalan a afuse tit da dañe mvaé.

¹⁷ Akôsa bo nalé mekua me biya wo, a meleb me bibiya wo me ne teke abulane mvus.

¹⁸ Ayaa e bo'o te tindi wo a dañe nné! Nge wone wo a ôsimesane wuna na: Ô ne nguleya kuse Zambe a mveane nye bifa'é.

¹⁹ To'o akume dôé nge mvote jôé bi nji bo abime da yian, nge abui mveane ngule dôé

²⁰ de fe teke lañeban alu *meyoñ me bôt ma jañ.

²¹ Tabe'e ntyele ya kôñelan mfa'a *abé e né, amu na jame te nde ô nee de e minju'u été.

Zambe a dañ

²² E ngule Zambe a bili ja bete ny'ôyabe yôp; za a ne nguleya ye'ele ane Nye'

²³ Za a lebe Nye mezene mé' Z'a ne nguleya jô nye na: Ô boya *abé'

²⁴ Simesa'ane wumulu ésaé jé, nje bôt ba sek e bia biab été.

²⁵ Etétéa ése é ne môt ja fombô nye ne yôaa! Môt ase a yene Nye a tele ôyap.

²⁶ Zambe a n'anen, ve bi ne te yeme yemelane nye; tañe mimbu jé é ne te k'ayemé.

²⁷ A dutu metoé mendim e be Nye, kôñelane mveñ é bo ndutuu.

²⁸ Mveñ éte nje ja nnoñ é so'o minkut été. E wu'a metoé e be jama bôt.

²⁹ Za a ye yem ane minkut mia wulu, ane zo'oyañ ja bam ébeme Zambe si'

³⁰ O lôô na Zambe nye a ndamé felevese je e nlô wé yôp, a buti bido'o bi mañ.

³¹ Mezene mete mme a belane me, asu ya tyi'i *meyoñ me bôte mejô. A ve ézu'u bôte bidi.

³² A nyoñe feleves e mo mé été, a bendé je na é wosane nyô a zu té nye ntañete.

³³ Foé ya nzuane wé a kate je a zo'oyañ, mbame biyeme wé wo wô'ôtane nye éyoñ a ntoo bebé.