Yb 34 - Kalate Zambe Nnomo a Mfefe Mfefé Nkôñelan

Zambe a nji bo jam e n'ékotekot

¹ Ane Eliwu a nga nyoñe nkobô a jô na:

² A mimfefek vô'ôla'ane nkobô wom! Mia mi bili ñyeman ke'ane melo menane be ma!

³ Amu melo ma yemelane *minkobô, aval anyu da tye'e bidi.

⁴ Ntamane ñhe tobane *zôsôô mfa'a wongan, ñyemela'ane jam e ne mvaé e zañe jangan.

⁵ Yob na: Me ne *zôsôô, ve Zambe a vaaya *zôsôô wom,

⁶ akôsa bo *zôsôô wom, ma yené éyoñe ji ane nlaa minsos. Fôle jam é ntoo nkômekutu, teke na me boya *abé.

⁷ Ye môt éziñ a funane Yob, nyô a nyu ékpwe'ele ane mendim,

⁸ a wulu'u e nsamba ya ba ba bo ékotekot, ba be bebo *abé be wulu'u nsamba wua'

⁹ Amu a maneya jô na: E ne te mvolan be môte na: A yene mvaé jé be Zambe.

Zôsôô ya be ngungule môt

¹⁰ Vô'ôla'ane ñhe ma, a mia bôt mia yeme wô'ô ma! Zambe a nji bo *nkpwala, ékotekot é ne Nyô a Ne Ngul Ese ôyap!

¹¹ A bulane môt ase ane mimboone mié mi né. A ya'ane môt ase aval'ane mezene mé me né.

¹² Bebela na Zambe a nji bo *abé, Nyô A ne Ngul Ese a ne te viti *zôsôô.

¹³ Za a nga ve nye nguleya jôô si' Za a nga ve nye émo ése'

¹⁴ Nge a too ye simesan v'Emien. Nge a too ye bulane nyoñe Nsisime wé a mvebe wé,

¹⁵ minsône mise mi nga ye jañ éyoñe jia, a môta binam a nga ye bulan e mbulu'u été.

¹⁶ Nge ô bili fek, vô'ôlô'ô jame di, ke'e alo dôé éduñe ya nkobô wom!

¹⁷ Ye nalé a ne bebela na nyô a vini *zôsôô a ne nguleya jôô' Ye wo ye ve nyô a ne *zôsôô a éwôlô mekua'

¹⁸ Ye ba ye jô njô bôte na: Zesé jôm, a jô fe benya bôtô na: Bebo *abé'

¹⁹ Zambe a nji semé bone bejô bôt, avale ba yené mis, nge kandé nkukum ba nzozoé, amu bese be ne ésaé ya mo mé,

²⁰ ôyôm éyoñ, ba mane wu; e zañ alu, ayoñe bôt da tébane si a wu; ba vaa nyô a n'éwôlô teke ve beta ngul éziñ.

²¹ Amu Zambe a fombô mezene me môt, avale te fe a fombô medaa mebo mé mese.

²² Teke dibi nge nsisiñ y'awu ba ba bo ékotekot be ne nguleya sobô.

²³ Asu ya na Zambe a kee môt ntyi'ane mejô, a vo'o dimili ayab éyoñe ya fase nye.

²⁴ A kpwé mingungu teke fase be ajô, a a telé mife éjiane jap;

²⁵ Amu a yemelane mimboone miap. A bôôé be kayale a alu, a be fitebaneya.

²⁶ A bibi be ane bebo abé e vôm be ne nguleya yene be.

²⁷ Amu be nga kandane nye, a amu be nga bo te yeme yemelan mezene mé mese.

²⁸ Be nga bo na ñyône *nzôzoé ô kui be Zambe, a a ye wô'ô ñyône bingôngole bi bôt.

²⁹ Nge a ve awo'on, za a ye ve mekua' Nge a solé asu dé, za a ye bo nguleya fombô nye' Nalé a ne bebela asu ayoñ a asu môt;

³⁰ ndembene môt a ne mbo abé a ye bo te jôô, nalé fe te fe beta bo ôlam asu ayoñ.

³¹ Amu na ye a tameya jô Zambe éyoñ éziñe na: Me jibiya nju'u wom, ma ye bo te beta bo abé;

³² jam me ngenane te yen, liti'i ma de; nge me nga bo bikotekote bi mam, ma ye bo te beta taté na ma bo bie.

³³ Ye aval'asimesane dôé e né, nde Zambe a ve ma'an' Amu wo ve mekua; wo wo top, ve sa ke ma. Kañete'e ñhe jam wo yem!

³⁴ Bôte ba yeme fas ba ye kate ma, nalé fe mfefe'e môt wo vô'ôlô ma wô fe wo ye kate ma.

³⁵ Yob a kobô, ve ñyemane momo be nye, nkobô wé wo jembane mfasan.

³⁶ Ajô te Yob a kele ñhe ôsu a tôbane *meve'ele, amu a yalan ane bikotekote bi bôt bia bo!

³⁷ Amu a betéya beta ékop *abé dé yôp; a kute kôp e zañe jangan, *minkobô mia wosane Zambe mia so ny'anyu abui abui.