Yb 30 - Kalate Zambe Nnomo a Mfefe Mfefé Nkôñelan

Minju'u mi Yob

¹ Eyoñe ji me ntoo éwoviôé ya ba be ne ma ayôme bongô mvus, ba me mbe nguleya futi b'ésaa bap, e nsamba bemvu ya mbame betite wom.

² Ve ngule ya mo map ja ye volô me jé' Be se nguleya kui minnôm.

³ Be ntoo minkôt amu njembane mam a zaé. Ba ke ba mate mimbi e mevôm me n'ayet, bilik a ndaman.

⁴ Ba ke ba té bilo'o ya fé si bebé mevôme mintut mi né. Bidi biab bi ne ve mindi mi anoñ.

⁵ Ba titane be vôme bôte be too, ba soo be mvus ane ba soo ñwuwup,

⁶ ndembene be ke ba tabe e beangôndô mimbi'ili été, e Mimbase meko'o ya si a e mekôm été.

⁷ Ba yôn ane bijakas e bisaé été. Ba bômbô mevis e mbia bilo'o zañ.

⁸ Be maneya titane be *si nyô, amu be ntoo bitétéa ya biasé, e bi bi ne te nguleya totebane môé.

⁹ A éyoñe ji ba belane ma e bia biab été me ntoo *nkana ya menyu map.

¹⁰ Ba vini ma, ba ke ma ôyap, teke ko woñe ya tui ma menden asu,

¹¹ teke jam ba kate bo vôm me né, amu Zambe a jô'é ya nlimetane y'élaé jam a bo ma *abé.

¹² Bingôngole bi bôte bite bia kôlô si e mbo nnôme wom, a tindi mebo mam, ba tube mbia mezene ya bo m'abé.

¹³ Ba tyii zene jame mamien a vuñe na me jañ, ba be nji tame bi mvolane be môt éziñ.

¹⁴ Ba kui be ma ane vôme bôt ba tulan *abé be nga tup, ba bume ma nyô ane ntyôa mendim!

¹⁵ Woñ ô kôñelaneya mfa'a me né, éto *nti jam é keya ane vôm évuñulu ja kee jôm éziñ, nyiane wom ô lôteya ane *nkut.

Zambe a keya me ngame yat

¹⁶ Eyoñe ji nsisime wom wo tabe ndi ve be mamien, melu ya mintaé me biya ma:

¹⁷ alu da tube ma bives e nyôle jam été a minsise miam mi nji bi awo'on.

¹⁸ E ngômesane jam é maneya tyendé, ja kabetane me nyô ane tyiñe ya alô'ô dam.

¹⁹ Zambe a wuaya ma e mbotok été, a me nga funane mbuluk a asup.

²⁰ Ma loone wo na ô volô ma, wo teke yalan. Ma tebe tetele na ô yene ma.

²¹ O ntoo étua njete be ma. Wo jimbi ma a ngule ya wo wôé,

²² wo kee ma me bete e bikabela bi évuñulu a wo bo na me tyibelane ôkôse si.

²³ Amu ma yeme nalé na wo kee ma awu, e vôme biôme bise bi vee bia tôban.

²⁴ Ye môt a nga zu wu a ne same mo mé nga' Ye nyô a ne e bidim été a ne te sili mvolane nga'

²⁵ Ye mi nji kuli mili'i mis asu nyô melu mé me n'ayet' Ye nleme wom ô nji wô'ôlun amu ajô *nzôzoé'

²⁶ Amu me nga yange mvom, ve bidim mbie bi vianeya so.

²⁷ Biôme y'abume dam bia kundi teke awo'on. Melu ya njuk me tôbaneya ma.

²⁸ Ma wulu me ntoo évindi, ve sa ñhe a vian. Ma tebe tetele ékôane bôt été a yôn.

²⁹ Me ntoo monyañe bemvak, nyô ba be beéngutu ba wulu nsamba.

³⁰ Ekôbe jam é ntoo évindi a ja ku, bivese biame ki bia dik a kôt.

³¹ E mvete jam ja yian éyoñe ji v'a jia ôlun. A ndiñe wome ki wo lu'an a tyiñe ba ba yi du.