Yb 3 - Kalate Zambe Nnomo a Mfefe Mfefé Nkôñelan

Yob a yône be Zambe

¹ Mvus éte, Yob a nga kui anyu a yo'é *môs a nga bialé,

² Yob a nga jô na:

³ E *môs me nga bialé ô jañek a alu e nga jô na: Monafam a nyoñebaneya abum.

⁴ Môs ôte ô bo'o ñhe dibi! Zambe a bo'o te simesane wô a too yôb été a éfufup é bo'o te faé wô!

⁵ Dibi a nsisiñe y'awu bi tame vane wô minkut mi bo'o te faé.

⁶ Dibi e tame wôlé alu te! A be bo'o te lañe de e melu ya mbu! A be bo'o te lañe de éyoñe ba lañe bengon!

⁷ Ya! Alu te e bo'o nkôkôm, ôyenga mevak ô bo'o momo été.

⁸ Bôte bese ba yo'é mimôs be yoké'é alu te! Ba ba yeme vele Léviatañ ôyo fe be bo'o de nalé!

⁹ Ateté dé ya dibi tyé e bo'o dibi éfufub alu te da yange é bo'o te so. A é bo'o te yene biyakolô bi tyé!

¹⁰ Amu e nga bo te dib abum me nga nyoñebane de été! Nge solé mise mam njuk.

¹¹ Amu jé me nga bo te wu abume be nyia wom' Amu jé me nji ke wu éyoñ me nga vame nye abum'

¹² Amu jé me nga koone mebo ya nyoñe ma, a mebé ya nyaa ma'

¹³ V'éyoñe ji me nga ye bômbô si a tabe *mvo'é, me kele ôyo a wo'on,

¹⁴ bia be bejô bôt a bebôndé befe'e ya si, mbe ba beta lôñe menda me ntoo ntyaman,

¹⁵ bia be bejô bôt be bili or a mbe ba jalé menda map a argent.

¹⁶ Nge na me nji ye nyiñ ane nsolekane mon ô solô, ane minkeñelé mi *bon mi nji tame yen éfufup.

¹⁷ Vôm ate mbia be bôt ba jô'é abui mfô'ôsane dap, a vôm ate bôt be te'eya te fe ngu ba wo'on;

¹⁸ Mimbô'ô fe mi too *mvo'é mise, mi ne teke wô'ô tyiñe betibili bôt;

¹⁹ mone môt a beta môt be ne valé, a *ôlo ô kôlôya éjôé masa wé si.

²⁰ Amu jé Zambe a ve môt a bili nju'u éfufup, a ényiñ e be ba be ne minleme ntya'an,

²¹ mbe ba yange awu ve de teke so, a nyamete de a dañ akum,

²² mbe be nga ye dañe vak a fôn nge ba tôbane soñ'

²³ Me ne aval'ane môt a nji yem e vôm a ke a Zambe a feteya ma aval'ane môt a tele e mvuse mfin

²⁴ éyoñ ma yiane di, me bili ve minjuk, a ñyône ya mintaé miam wo bet éyoñ ése.

²⁵ Nge ma ko jam éziñe woñ, de ve kui; jam me mbe me tyelé'é nleme yôp nde da kui be ma!

²⁶ Evôvoé, *mvo'é a awo'on bi ne momo be ma ve me ne mbiban a mam ma ju'ulane ma *nsisim.