Yb 29 - Kalate Zambe Nnomo a Mfefe Mfefé Nkôñelan

Nnôm a kum Yob a nga too

¹ Yob a nga beta liti ôsimesane vié a jô na:

² Ngo'é nge me ne bulane bo ane bengone ya mvus, ane melu Zambe a mbe a ba'ale'e ma,

³ éyoñ a mbe a bo'o na lambe wé a faé e nlô wome yôp a na me nyiine dibi été a éfufube jé!

⁴ Nge me ne beta bulane melu me nga bo nya môtô, éyoñe Zambe a mbe a ba'ale'e *nda éndelé jam ane mvôé.

⁵ Eyoñe bia Nyô A ne ngul ése bi mbe nsamba, a bisoé bi bone biam bi nga too ma mbôma'an;

⁶ éyoñe mebo mam me nga duu avoñ été, a akôm é miala'an a tôñe mbon fefele jam.

⁷ Eyoñe me mbe me kui atan a ke e *mbé tison. A bo na be kôme ma éto e vôme bôt ba tabe.

⁸ Bisoé bi bôt bi mbe bi yene ma a kôlô, minnôm mi bôt mi mbe mi kôlô'ô si a tebe tetele.

⁹ Bone be njô bôt be mbe be jôké'é minlañe miap, a buti wo wob anyu.

¹⁰ Tyiñe bivet é mbe é tabe'évô, a be mbe teke fe nguleya kobô.

¹¹ Amu alo e mbe e wô'ô ma e mbe e jô'ô na me n'ébotan. A dis e nga yene ma e mbe me ngaa.

¹² Yaa me mbe me kôté'é éngôngole môt ja sili mvolan, a monenyui a mbe teke môt a volô nye,

¹³ ébotane ya nyô a nga zu wu, e mbe é kele'e be ma; me mbe me jalé'é mevak e nleme nkus.

¹⁴ Me nga jaé *zôsôô wom ane ngômesan, a me nga bili zôsôa ntyi'ane mejô wom ane alô'ô a ane ntôm ba jaé nlô

¹⁵ me nga too mis asu ndindim, a mebo asu mbôbôk.

¹⁶ Me mbe ésaa minzôzoé; me mbe me fasek ajô nyô ma dimi;

¹⁷ me mbe me bu'u minkeke'e ya nyô a n'ékotekot, a vaa jôm a nga bi e mesôñe mé.

¹⁸ Eyoñe te me mbe me jô'ô na: Ma ye suu mvebe e dumba'a dame yôp, ma ye tabe abui mimbu ane nselek;

¹⁹ minkañe miam mia ye yametan a kui mendim. E mfô mendim a ye lôte ngum alu e mintyaé miame yôp;

²⁰ duma dam da ye bo mfefé be ma, a *élaé ja ye beta bo ngu e wo wom été.

²¹ Be mbe be vô'ôlô'ô ma, a be mbe be yange'e ma, be mbe be tabe'e bivô a wô'ô fe'e jam.

²² Nge me mane kobô, teke môt a sôane ma, a nkobô wom ô mbe ô kala'ane be be bese.

²³ Be mbe be yange'e ma ane ba yange mveñ, be mbe be yo'é menyu map ane ba ba yange mveñ ésep,

²⁴ me mbe me muñuk a be, ve be teke tabe memuñe mete ndi. Be mbe te nguleya jañele éfufube y'asu dam.

²⁵ Me mbe me kañese'e ke e nsamba wop, a tebe be ôsu; me mbe ane njô bôt ézezañe nsamba, ane nyô a je'e ba ba wô'ôlune minlem.