Yb 28 - Kalate Zambe Nnomo a Mfefe Mfefé Nkôñelan

Fek ja nyoñe meseka'a

¹ Vôm éziñ a ne asu ya fa'a argent, vôme mfe asu ya fubu or.

² Etyé ja nyoñebane mbulu'u été, ako'o ba te nyemen da ve mvot.

³ Bôt ba vaa dibi a ba jeñe meko'o me solô e dibi été, a e nsisiñe dibi y'awu akekui mevôm ma dañ édok.

⁴ Ba fa'a ésalak ôyab a mevôme bôt be too, mebo teke fe volô, me tyele yôp, me ndeñek ôyab a bôt.

⁵ Si, e vôme bidi bia so, é ne mbulekan, mevôme mé ma dañ édok, éfunan ane vôme nduan ja te bo ésaé!

⁶ Meko'o mé me ne e vôme ba koon ako'o e n'édima ba loone safir a ndube or.

⁷ Anone da bi biôm e ne te yeme zene y'été, a dise violô e nji yene je.

⁸ Betit be ne ayok be nji tibi je a mebo map, a ngbwengbwem é nji ke tame lôt été;

⁹ môt a nnambe ako'o e n'ayet; a a kpwé minkôle si ataté minkañ;

¹⁰ a bo mimbô'ôlé e meko'o été, a dise dé e ne yene jôm ése é n'édima;

¹¹ a telé mendim me bo te beta lôt, a zuu jôm é solô éfufub été.

¹² Ve fek jé é ne vé' E vôme ñyemane mam ô né a ne vé'

¹³ Môt a nji yeme tañe y'été, é nji ke bo e si bevevee.

¹⁴ Vôm a n'édok a jô na: Fek é nji bo be ma. Mañ ki ma jô na: Bia fek bi nji bo nsamba.

¹⁵ Be se nguleya ve or a ne *mfuban éjiane fek nge ve'e argent asu ya kuse je.

¹⁶ O se nguleya ve'e ba or ya ôfir kop, nge ba ako'o e n'édima ba loone ônit, nge ba Safir.

¹⁷ O se nguleya ve'ane fek a or nge éyet, nge folane je a be'e a ne mboon a or a dañ abeñ

¹⁸ kôraé a kristal (bidima mekok) bi nji bo atoté; éyoñe môt a bili fek, nalé wo dañe bidima bi biôm.

¹⁹ O se nguleya ve'ane fek a tôpaze y'Ejipte. nge ve'e ba or a ne mfubane kop.

²⁰ Nde ñhe fek ja so vé' Nne ñyemane mam ô too vé'

²¹ Mise me jôm ése é vee ma kate yene je, ja sobô fe ja'ana anone ya yôp.

²² Mbi'ili ya njañ a awu bia jô na: Melo mangan me nga wô'ô be kobô'ô ajô y'été,

²³ Zambe nye a wô'ô zene fek, nye fe a yeme vôm é too,

²⁴ amu nye a fombô a kui meku'u me si, a yene jôm ése e jôbe si va.

²⁵ Eyoñ a nga telé adit évuñulu, a ve'e mendim abim,

²⁶ éyoñ a nga liti mveñ avale ja yiane wulu, a liti fe feleves a zo'oyañe *zen,

²⁷ nje ñhe a nga yene fek a liti je, a nga bôôé mimbôka'a y'été, a tu'a yeme je.

²⁸ Wôna a nga jô môte na: Ô lôô, nkoone Zambe woñ ñwô ñhe ô ne fek, nsa'alan *abé ki ñyemane mam.