Yb 27 - Kalate Zambe Nnomo a Mfefe Mfefé Nkôñelan

Yob a su'ulane yalane bemvôé bé belaa

¹ Ane Yob a nga beta liti ôsimesane vié a jô na:

² Ane Zambe a vee, nyô a bene tyi'i ma ajô, Nyô A ne Ngul Ese a ve ma *nlem ôlun,

³ nté ôse ma ye bi mvebe wom, a nté évuñulu Zambe ja ye bo e mimbile mi môé miam,

⁴ biyaé biam bia ye bo te kobô ékotekot, a ôyeme via wo ye bo te kobô ôfôfoé ya jam é ne minsos.

⁵ ôsimesane ya jô mia na mia bele ô kele m'ôyap! Akekui me suuya mvebe, ma ye bo te kôlô e *zôsôô wom été.

⁶ Ma bi *zôsôô wom ne zeñ, maa ye ke tek. Te k'alu da ya melu mam e nleme wom wo ve ma bijô.

⁷ Nsiñe wom a bo'ok ane mbia môt, a nyô a kôlô si a wosane ma, a bo'ok an'ékotekote môt!

⁸ Ndi nleme fé é li'iya mbo *abé, éyoñe ba vaa ényiñe jé' Eyoñe Zambe a vaa ny'ényiñe jé'

⁹ Ye Zambe a wô'ô ñyône wé, éyoñe nju'u wo kui be nye'

¹⁰ Ye Nyô a ne Ngul Ese a ye bo meva'a mé' Ye a ye loone Zambe éyoñ ése'

Eli'i ntibili bôt

¹¹ Ma zu ye'ele mia ajô ngule Zambe, ma ye bo te solé mia asimesane Nyô A ne Ngul Ese.

¹² Amu mia bese mi yemeya de, amu jé mia tôñe mame ya momo'

¹³ Ngabe ja so mbo *abé be Zambe nje nyô, ngab éli'i mbia môt a nyoñe be Nyô A ne Ngul Ese.

¹⁴ Nge a bili abui *bon, be ne asu nkpwaté mekôn a bifa'alé bié bi se nguleya jaé bidi;

¹⁵ ba ba ye nyiñ be so'o be nye, awu da ye jame be, a minkuse miap mia ye bo te yône be.

¹⁶ Nge a kôane argent ane mbuluk, nge a kôane mengômesan ane metek,

¹⁷ nye a kôan, ve zôsôa môt nye a ye jaé me. Nyô a ne te bijô nye a ye nyoñe argent ane ngap.

¹⁸ A nga lôñe *nda jé ane nyô évulebebas, an'ébeme mba'ale afube ndik a lôñ.

¹⁹ A bômbô si a too kum, v'a ke jambe a too nalé; éyoñ a kui mis a kooé teke fe jôm.

²⁰ Woñ wo bilane nye ane mendim. Olendé a vaa nye e zañ alu.

²¹ Evuñulu ya jôp da tôô ja be'e a kee nye, ja vaa nye vôm a nga too mbia mvaan.

²² Ba wua nye mekoñ bilaé teke ye'ele. a yiane tube na bi bo te nnambe nye.

²³ Ba kute kôp ajô dé, bôt be ne njalan a mevak e vôm a nga too.