Yb 24 - Kalate Zambe Nnomo a Mfefe Mfefé Nkôñelan

Ekotekote ya bôt

¹ Amu jé Nyô A ne Ngul Ese a bo te naane biyoñ, a amu jé ba ba yeme nye be ne te yene melu mé'

² Bôt ba tyendé mekône ya minné, ba wube mimbame biyem a ve mie bidi.

³ Ba nyoñe ngal éjakase bobenyui, ba nyoñe nnôme nya'a nkus éban;

⁴ ba vôône minzôzoé bi bôte *zen. Ba yemete bingôngole bi bôte ya si na be sobô nsamba wua bese.

⁵ Melendé me tyé, tame yen ane ba ke ésaé jap ane beyale bijakase y'afan e *nkôte si, amu na be bi bidi. Ozôm étam ñwô ô né asu ya ve bone bidi.

⁶ Ba tyi'i mimbom bidi miap e mefup, a kôane bibuma mindi'i bi mbia môt.

⁷ Ba lôt a alu sôsoé teke ngômesan. Be nji bi jôme ya buti nyô asu avep.

⁸ Mveñ ya minkô ja boté be nyô. A amu te vôme ya sobô, nde ba bi *mekok a mo map.

⁹ Ba vaa monenyui *abé anyu a ngul. Ba nyoñ éngôngole môt éban.

¹⁰ Ba bo na a wulu nsoé, teke ngômesan. Ba bo bewô'ô zaé na be be'e mimbom bilok.

¹¹ Ba bu mbon e biluñ été. Ba tibi jôme ba miate bibuma a mebo, ve ba wô'ô évé.

¹² Nyône bôte ba wu wo ye wô'é ô so'o e tison, nsisime ya bôte be ne mbalane meveñ wo kuli ñyôn, ve Zambe teke nyoñe ngab a avale mbia mboone te!

¹³ Ba bevok be ne ngabe ya ba ben éfufup, be ne teke kandé mezene mé, nge tabe e bone mezene mé été.

¹⁴ Eyoñ éfufup ja yené, ñwôé bôt a kôlô si a wôé éngôngole môt a *nzôzoé, wôna a alu a ne aval'ane ñwuwup.

¹⁵ Dise mbo *mejian da bole fôfol ngô'é a jô na: Môt éziñ a ye bo te yene ma, a a solé asu dé a éyañese.

¹⁶ Ba bu'u menda e dibi été, a amôs ba fete bebiene menda été; be ne teke yem éfufup.

¹⁷ Mfa'a wop, mametyé me ne dibi awu. Ve nsa biôm a yembaneya b'angôndô be mam ya dibi awu,

¹⁸ a yeñ ane e mendime yôp, bôte ya nlam ba yo'é vôme wé a too. Ve nye a nji ke e zene mefube mindik!

¹⁹ Avale mfum a vian bia kee mendim meta'a, avale te vôme ya miñwuan a kee môt a boya *abé'

²⁰ Abume nyia mon da vuane nye, ve minsoñ mia ye bo jôme meva'a mé, ba ye bo te beta simesane nye. Mboon *abé wo ye bu'i an'élé!

²¹ A mbe a wôlé'é nkôkôme minga ô ne teke bone biôm. A mbe teke belane nkuse mvaé!

²² Momo! Zambe a kô'ôlane melu bebo *abé a ngule jé. Tame yen ane ba beta tebe tetele, éyoñe be nji fe buni na ba ye nyiñ.

²³ A ve be *mvo'é ane vôme ya ye'ebe. Mise mé ma fombô mezene map.

²⁴ Be nga bete bebiene yôp, ôyôme nté be ntoo momo; ba ku, biyoñe biap bia kui amané ane bôte befe. Be tyi'ibaneya ane minlô mi fôn.

²⁵ Nge nalé a ne momo, za a ye sôane ma' Za a ye yene nkobô wome zesé'