Yb 21 - Kalate Zambe Nnomo a Mfefe Mfefé Nkôñelan

Eyalane Yob a yalane Sôfar

¹ Ane Yob a nga yalane na:

² Vô'ôla'an, vô'ôla'ane nkobô wom, va'ane ma ve mvolane nleme wu.

³ Va'ane ma nguleya kobô a éyoñ me maneya kobô, ô ne nguleya woé.

⁴ Ye ma tat a môt éziñ' A amu jé nsisime wom wo ye bo te bo ôjeja'a'

⁵ Kôñela'ane be ma a semé, a buta'ane wo anyu

⁶ éyoñe ma simesane jame te, ma ko woñ, a ényunyui ja kui ma nyô.

⁷ Amu jé bôt be n'abé ba nyiñ' Amu jé ba yômbô, Nge beta ke nyoñe ngu'

⁸ Mvoñe bôte jap ja bo ngu ba be be bebien be too, a bifa'alé biap bia bi mefok mise map mebien me lôô.

⁹ Mvo'é nje é ne menda map, saake woñ; nkasa Zambe ô nji bo be ngame yat,

¹⁰ nnôme nya'a wop a v'abum teke selan, ngale nya'a wop a biaé abum teke kui atan,

¹¹ ba suu ayôme bone dap e mate mimbil, ane mintômba a bikela, a bone bap ba ke ba vôman.

¹² Ba yia bia ngom a éngombé bi kobô'ô. Ba vak éyoñe ba wô'ô tyiñe ndiñ.

¹³ Melu map ma man e meva'a été, v'ôyôm étun, awu da sise be.

¹⁴ Ve be mbe be jô'ô Zambe na: Kele bia ôyap, bi nji kômbô yeme mezene môé.

¹⁵ Nyô a ne ngul ése a ne za ane bia yiane saane nye' Bi bili za mfi ya ye'elane nye'

¹⁶ Yaa! Mvome jap é nji fo'o bo e mo mab été. Fe'e mbia be bôt é ne ma nya ôyabe!

¹⁷ Ve ye da kui biyoñ biyoñe na: Lambe mbia be bôt a dim, na azoé e kui be be, na, Zambe, ayaa dé été, a ve be ngabe jap,

¹⁸ na be bo ane mbuan évuñulu ja kee wô, aval'ane bivua ôlendé a be'e'

¹⁹ Ye Zambe a naan melebe mé, asu bone be mbia môt' Nye Zambe a yiane ve fonos, asu ya na a yeme nye;

²⁰ mise mé ma yiane fombô v'éto éngôngole jé ébien, e nye a yiane nyu ayaa Nyô A Ne Ngul Ese.

²¹ Nda jé é ne nye mfi jé éyoñ a wuya, éyoñe tañe bengone jé é ne nlañan'

²² Ye Zambe nye ba ye ye'ele ñyeman' Nyô a jôô bevevee ba dañ ôyabe yôp.

²³ Wua a wu te bijô, ntute *mvo'é été, a too te jôme ja tyelé nye nleme yôp,

²⁴ mevel njalan a avoñ, foñ ya bivese bié njalan a mbon;

²⁵ Nyô mbok a wu, nleme njalan a ôlun, teke tame tye'e mvaé *môs éziñ.

²⁶ Ba bômbô mbulu'u été nsamba wua, a bitum bia buti be yôp.

²⁷ Ma yem asimesane denan a avale mia fas asu ya ve ma mekua.

²⁸ Eyoñ mia sili na: Nda mona njô bôt é ne vé' Nda éndelé bebo *abé be nga too é ne vé'

²⁹ Jé! Ye mi nji sili belôtan minsili' A ye mi nji kômbô kañese jam ba liti;

³⁰ na e môse bidim bia kui, ba kamane mbia môt, e *môs ayaa da yené,

³¹ za a kpwaane nye mbia ntabane wé' Za a bulane nye jam a nga bo'

³² Ba kee nye afube mesoñ, be be'e nye; a ba ye mombô e soñe jé yôp.

³³ Bibañ mete'e ya mbi'ili bi ne nye éveves. Bôt bese ba zu nye mvus; bôt tek'alañé ba wulu ny'ôsu.

³⁴ Amu jé ñhe mia ve ma zesé mvolane *nlem' Jôme ja li'i e biyalane biôé été é ne ve medu'an.