Yb 20 - Kalate Zambe Nnomo a Mfefe Mfefé Nkôñelan

Sôfar a kobô Yob éyoñe baa

¹ Ane Sôfar môte ya Naama a nga nyoñe nkobô a jô na:

² Tame yen amu jé asimesan da ve ma biyebe *nlem, da yemete me na me yalan: amu *nlem wo vuñe ma abum été.

³ Me wô'ôya bijô bia ve m'ôsone nyô. Ajô te mvebe ya fe'e jam wo ye ve ma éyalan.

⁴ Nga wo yeme na biyoñ bise, nté ane môt a nga tébane *si nyô,

⁵ ndañane bebo *abé ô n'étun, a meva'a me mbia môte ki ôyôme nté'

⁶ To'o na nté wé wo kui yôp, to'o na nlô wé wo nnambe minkut

⁷ a ye jañe nnôm éto ane mbuane wé, a ba be mbe be yene nye ba ye jô na: A ne vé'

⁸ A ye yele ane biyeyem, a ba ye bo te fe beta yene nye, ba ye titane nye ane ñyenan y'alu.

⁹ Dis e mbe e fombô'ô nye, da ye bo te beta fombô nye, e vôm a nga too a ye bo te beta yene nye.

¹⁰ Minzôzoé mia ye kubu bone bé nyô, a mo mé ma ye bulane jôm é mbe é va'a nye kum.

¹¹ Bibu'a ya nyôle jé bi mbe njalan a ngul ésoé môt, ve baa ngul éte ba ye bômbô mbulu'u été.

¹² Ng'abé e ne mvaé anyu dé été, nge a solé de ôyeme vié si,

¹³ a kama'ane de teke jô'é de, ve bi de anyu dé été,

¹⁴ bidi bié bia ye ko'oban abume dé été, a kôñelane bo nsu akpwe e nyôle jé été.

¹⁵ A mineya akum, a ye yô de. Zambe a ye sô'ô d'abume dé été,

¹⁶ a vi'i nsule mekpwe, ôyeme beta nyo wo ye wôé nye.

¹⁷ A bo'o teke beta fombô bone b'asôé, beta b'asôé, atôñe wôé a di mbon!

¹⁸ A ye bulane jôm a nga wu nju'u ya bi a a ye bo te mine je; a ye bo te beta bu'uban akume dé ya makit.

¹⁹ Amu a nga fit a vuane minzôzoé, *nda a nga kuli azoé, a ye bo te beta lôñe je.

²⁰ A nji tabe *mvo'é mbia ndiane wé été, e minyamete mié été jôm éziñ é nji fame nye mo.

²¹ E ndo'o jé été teke jôm é nga li'i, ve ntabane *mvo'é wé wo ye bo te libi.

²² Afo'o dé été, ôlun via ye bi nye, mam mese me n'abé ma ye kui be nye.

²³ Eyoñe nye a jalé abume dé, Zambe a ye lôm ayôñ y'ayaa dé be nye. A a ye noo nye mekoñ m'élaé, me ve nyiin e minsône mié été.

²⁴ Nge a tube mengale m'étyé, *élaé mvot ja ye tulane nye nyô.

²⁵ Nge a vaa akoñ *élaé é beme nye nyô, ng'ébaé nduan é beme ny'ések, beangôndô be mam ba ye kui be nye.

²⁶ Dibi ese e ne nnaan asu akume dé, nduane môt éziñ a se nguleya soo, ja ye mine nye.

²⁷ Yôp da ye kulan ékobe jé, a si ja ye tebe nye ngame yat.

²⁸ Ba ye vos akume ya *nda jé, ba ye mane kee de e môse Zambe a ye yaa.

²⁹ Ngabe mbia môt ja so be Zambe nje le. A jôm a ye nyoñ e *minkobô mié été é so'o be Zambe nje le.