Yb 2 - Kalate Zambe Nnomo a Mfefe Mfefé Nkôñelan

Satan a beta ve'ele Yob

¹ Môs éziñ *bon be Zambe be nga beta sulan asu dé; Satane fe a nga fubu nsamba wob a zu tebe e mise me Zambe.

² Ane Zambe a nga sili satane na: Wo so vé? Satan a nga yalane nye na: A so ma ndeñendeñe *si nyô a wulu li a li.

³ Nde Zambe a sili satane na: Ye ô yeneya fo'o mbo ésaé wom Yob? E *si nyô môt éziñ a nji bo ane nye; étua *mvo'é môt a *zôsôô, a ko Zambe woñ a sa'ale'e fe *abé. A yeme ngu e ntabane *mvo'é wé été, a wo tindi me na me dimili nye te étom.

⁴ Satan a nga yalane Zambe na: Ékôp ja butan ékôp! Jôm ése môt a bili a ne ve je asu ényiñe jé.

⁵ Ve tame same wo wôé a nnambe bives a minsône bié: buni'i me na a ye kobô wo ébiasé womien ô too.

⁶ Zambe nye satane na: Nye nyô a ntoo e mo môé été; ve da ô nyi'i nye ényiñe jé.

⁷ Ane *satan a nga kôlô e vôme Zambe a nga too, nde a nga kute Yob mbia be mote nyô, ataté abo si a kui abôbône nlô.

⁸ Eyoñe te Yob a nga nyoñ éfô'ôsé ya wome nyô a tabe asub été.

⁹ E minga wé a nga sili nye na: Ye ô ngenan ô yemek e *zôsôô wôé été? Kobô'ô Zambe ébiasé a wu!

¹⁰ Ve Yob a nga yalane nye na: Wo kobô ane akute minga! Jé! Ye bia nyoñe ve mvaé be Zambe teke nyoñ *abé? Jame te ese, Yob a nji bo *abé a biyaé bié.

Bemvôé be Yob belaa ba jome nye

¹¹ Bemvôé be Yob belaa be nga nyoñe foé minju'u mi nga kui be nye, nde be nga kôlô môt ase e si jé: Elifaz ya Téman; Bildad ya Kua a Sôfar ya Nama. Be nga kui tyiñe ya ke yône nye a volô nye *nlem.

¹² Eyoñ ba fombô nye be ngenan ôyap, be nji fe beta yeme nye: nde be nga bete metyiñ a yôn. Be nga nyabe melô'ô map a kute mbuluk e minlô miabe yôp.

¹³ Be nga tabe tyia ba be nye tañe môse zamgbwa a melu zamgbwa, teke môt a jô nye éfia, amu be nga yene na mintaé mié mi nga dañe ngu.