Yb 19 - Kalate Zambe Nnomo a Mfefe Mfefé Nkôñelan

Eyalane Yob

¹ Ane Yob a nga yalane na:

² Mia ye ve nleme wom ôlun nté avé' A nté avé mia ye ko'o ma a mejô menan'

³ A ntoo biyoñ awôm mi taa ma; ye mia wô'ô fo'o ôsone ya ndeñele ma'

⁴ Nge me ne fo'o ékob été, k'ékobe te é bete mamiene nlô yôp.

⁵ Nge mi ne fo'o me ngame yat, a nge mia jô ma amu ôsame wom,

⁶ ke mia yiane ñhe yeme na Zambe Nye a kpwé ma, a vule ma avote dé été.

⁷ Nge ma wô'ô ékpwe'ele ba kpwe'ele ma *abé, teke môt a yalane ma; nge ma sili mvolan, teke môt a tyi'i me ajô.

⁸ A dibeya me *zen, me se nguleya lôt; a kuteya dibi e mezene mam.

⁹ A sô'ôya ma étôto'o jam, a vaaya ékate duma e nlô wom,

¹⁰ a kpwéya me si mimfa'a mise, a me tame wu. A téya ndi nleme jam an'élé.

¹¹ Ayaa dé é kalaneya me nyô, a nyoñeya ma ane wua ya besiñe bé.

¹² Minsamba bezimbi mié, mia suan éyoñe jia. Be kpwa'éya zene jap a kui be ma. Be lôñeya minkane miap mbôma'an a *nda éndelé jam.

¹³ A boya bobejañe na be ke m'ôyap, a ba ba yeme ma be maneya tyamelan ke m'ôyap.

¹⁴ Bôte bam be li'iya ma, ba bia be be bia dañe nlatan be vuaneya ma.

¹⁵ Beyeñe ya *nda jam a bebo bisaé bam be ne binga, ba yene ma ane nneñ. E mise map me n'éyoñe ji ve njin be nji yem.

¹⁶ Me ne loone mbo ésaé wom a ne fam, nye teke yalan; ma yiane ye'elane nye a anyu dam.

¹⁷ Minga wom a vini mvebe wom, a me ntoo mbia ényum e be bone bia be be bi nga bilaé abume da.

¹⁸ To'o na ayôme bongô de fe da biasé ma. Nge ma kôlô si, e nga kobô m'abé.

¹⁹ Ba be mbe be yeme minsolane mi mame miam ba yene ma angôndô, ba me mbe me nyeke'e be kôñelaneya a wosane ma.

²⁰ Bivese biam bia kabetan ékôbe jam a minsoñe miam, a me li'iya me bili ve tite mesôñ.

²¹ Koon éngôngo, koone m'éngôngo, a mia bemvôé bam! Amu wo Zambe ô bibiya ma.

²² Amu jé mia kpwe'ele ma ane Zambe a kpwe'ele ma' Ye mebum me ngenan te kui mia minlem a minsône miam'

Nkôté bôt a vee

²³ Ngo'é nge bifia biam bi nga ye tiliban! Nge bi nga ye kpweleban e kalat'été!

²⁴ Nge bi ne nkpwelan ako'o yôp éyoñ ése a nkôs étyé a afiti!

²⁵ Ve ma yeme na *nkôté wom a vee, a na nye a bili éfia ja su'ulan e *si nyô.

²⁶ Eyoñ ékôbe jam ja ye tyamban, mamien ma ye yene Zambe.

²⁷ E Nye ma ma ye nye'e me lôô, e nye mise mam ma ye yen sake môte mfe. Nleme wom ô ne nte'an ya yange éyoñe te.

²⁸ Eyoñ mia ye jô na: Amu jé bia kpwe'ele nye' Eyoñe te mia ye yem bebela y'ajô dam.

²⁹ Koone woñe na nkpwaté mekôn ô nnambe mia. Amu melebe ya ma boban a nkpwaté mekôn me n'angôndô.