Yb 16 - Kalate Zambe Nnomo a Mfefe Mfefé Nkôñelan

Yob a yalan Elifaz

¹ Nde Yob a nga yalane na:

² Me wô'ôya mam abui me too avale te; Mia bese mi ne bevolô minlem ba ve môt ate'e nyô.

³ Ye momo nkobô nyô a ye fo'o bi asu'u' A na wo wô'ô jé ôlun éyoñ wo yalan'

⁴ Ke ma fe me ne nguleya kobô ane mia; nge mi too ye tebe été jam, Me nga ye tôkane bifia ya wosane mia. me nga ye si'isi mia nlô wom.

⁵ Me nga ye ve mia ngule *nlem, a mejô y'anyu dam. Mfô'ôsane ya biyaé biam ô nga ye volô mia.

Zambe a jimbiya ma

⁶ Nge ma kobô, mintaé miam mi nji bo nsé'an, nge ma jô'é nkobô, mintaé mite mia ye ke ma ôyab aya'

⁷ Eyoñe ji, éé! A jotéya me nyô. Yaa! O vambaneya e mbôma'ane wom ase.

⁸ O tubeya mimbote nyôle jam mi too e ngaa a wosane ma nkôte wom wo ve ma mekua a ve ma adite mbe'e.

⁹ Ayaa dé da nyabe ma a wosane ma, a latane mesôñ asu ya tebe me ngame yat. Nsiñe wom a toé mise mé be ma.

¹⁰ Be maneya ndamé ma menyu mabe nyô; Ba bibi ma mebaé memañ asu ya samele ma. Ba zu ma mimbile mvus bese,

¹¹ Zambe a keeya ma e mo m'ayôme bongô. A wuaya ma e mo me mbia be bôt.

¹² Me nga too *mvo'é ve a fô'ôya ma, a biya me *tyiñ a bu'u ma bifus, a beteya telé ma me bo nye jôm a sôñ.

¹³ Mekoñ bilaé mé ma bômane ma vôm ase, a lume ma mekoñ angeteñ tek'éngôngo, a sôé e zôñe jame si.

¹⁴ A ba'é ma meveñ va fifiti, a silane ma yôp ane môta mewosan.

¹⁵ Me maneya loé nyôle jame nkuta; me wo'otôya éjijine jam e mbulu'u été.

¹⁶ Asu dam e ntoo évele, amu me dañeya yi. Nsisiñ y'awu ô ne ma biyakolô.

¹⁷ Ve da mo mam me nji kuli metyi a meye'elane mam me mbe *mfuban éyoñ ése.

Ngaa wom a ne yôp

¹⁸ A si, te solé metyi mam, a ñyône wom ô wôké'é te jôm ja telé wô!

¹⁹ Eyoñ ebiene ji, ngaa wom a ne yôp, nyô bia nye bia kobô a ne e mevôm me ne mbetane yôp.

²⁰ Bemvôé bam ba woé ma; Zambe nye ma loon a mili'i mis,

²¹ ye a ne nguleya bo ntyi'i mejô e zañe môt a Zambe, e zañe mona môt a mvôé jé'

²² Amu tañe mimbu miam é nga ke amané, a ma ye tyii e *zen ma ye bo te beta bulan été.