Yb 15 - Kalate Zambe Nnomo a Mfefe Mfefé Nkôñelan

Elifaz a beta kobô Yob

¹ Ane Elifaz ya Téman a nga nyoñe nkobô a jô na:

² Ye mfefek wo yiane yalan a momoa ñyeman' A jalé émien abum a évuñulu ja so mfa'a jôp da tôô'

³ Ye a kaman émien a bifia bi ne teke mfi' Nge a nkobô ô ne teke volô jam'

⁴ Wo wo tyam, to'o na nkabetan mfa'a mam ya Zambe a wo ndaman éto meye'elan ése asu Zambe.

⁵ Amu mbia mboone wôé a ne nye'ele ya anyu dôé, a ô tobeya fatane nkobô mekute me bôt,

⁶ Sake ma v'anyu dôé nde da ve wo mekua. Biyaé biôé mbie bi ne ngaa a bo'olô wo.

⁷ Ye wo ô nga taté bialé a bôte bese' Ye wo ô ne *mvendé a minkô'

⁸ Ye ô wô'ôya minsolane mi mam mi Zambe' A telé fe'e nné ve be womien'

⁹ Jé wo yem nje bi ne te yem' Ngule ñwô'ane mam fé ô bili bi te je bi'

¹⁰ Bôt be bili nyu'u nlô be ne zañe jangan, a minnôm mi bôt, be too *mvendé a ésoo,

¹¹ ye wo biasé mvolane Zambe a volô wo *nlem, a nkobô bia kobô wo a évôvoé'

¹² Amu jé nleme wôé wo dutu wo' A amu jé wo nyete mise môé'

¹³ Amu Zambe nye ñhe wo yaa nye, a nye fe anyu dôé da kobô kane *minkobô wo kobô nyô.

¹⁴ Môt a ne jé ane a ne nguleya bo *mfuban' A nyô a nga bialé be minga ke jé ane a ne nguleya bo *zôsôô'

¹⁵ Nge Zambe a nji tabe mimfufube mié ndi, nge yôp e nji bo *mfuban asu dé,

¹⁶ kô fé ététéa é ne *abé a ndaman, môta binam, nyô a nyu *abé ane mendim'

Asu'ulane mbia môt

¹⁷ Vô'ôlô'ô ma, ma zu liti wo, ma ye kañete wo jam me yeneya,

¹⁸ jam mimfefek mi nga kobô, jam be nga bo teke solé, e so'o be b'ésaa bap;

¹⁹ si é nga veban ve be be étam, a teke mone bikuu a nga lôte be zañ.

²⁰ Mbia môt a lôte melu mese y'ényiñe jé v'éndeñela'a été. Ntibili bôt a kôsa nyiñe abui mimbu,

²¹ metyiñ me woñ ve ndeñele melo mé. Eyoñ a nyiñ e *mvo'é été, nje ntyame mam a ye vasane be nye.

²² A nji buni na a ye kôlô dibi été, amu nkpwaté mekôn wo yabe nye.

²³ A ke a ndeñ asu ya jeñe bidi, a yeme na e *môs ô ne dibi wo yange nye.

²⁴ Olun a biyebé bia bo nye na *a ko woñ, bia kubu nye nyô ane njô bôt a ne nkômesane ya wosan.

²⁵ Amu a sameya wo wé na a wosane Zambe, a dañe Nyô-A-Ne-Ngul'ése.

²⁶ A nga kôme bo ayo'o ya ke mbile be nye, a too ébene jé si,

²⁷ avoñ e yale ny'asu, a mevele ki me to nye anen;

²⁸ ve a ye tabe bitison bi ne ntyaman, e menda me ne bifut, me ntoo bebé ya su'ulane si.

²⁹ A ye bo te beta bik, akume dé fe teke tabe, afo'o dé da ye bo te fe beta mialane *si nyô.

³⁰ A se nguleya kandane dibi, nkaba'a nduan wo ye kôtô bifa'alé bié, a Zambe a ye vaa nye a mvebe y'anyu dé.

³¹ A bo'o te tabe momo mebun! A za du'uban. Amu momo a ye vebane be nye ane ma'an.

³² Jame te da ye boban te na asu'ulane ya melu mé e kpwaan. A ntyaé wé wo ye bo te beta bo nyumi.

³³ A ye li'i teke jôm, ane ndi'i woon wo dimili bibuma bié bi too biyoé, same jé ja ye kutan ane nyô ôlivié.

³⁴ Nda bôte mbo *abé ja ye bo nkôkôm, a nduan ja ye mine menda bindelé me môt a du'ubane tyi'ibi.

³⁵ Nsimesane ya simesan *abé wo biaé bidim, a ve môte nleme medu'an.